Las fòrmas ancianas son Toloniacum in pago Reddensi en 827, Terra de Campo Liberio en 906, Villa Campiliberi en 1120, Campbiure en 1552, Cambiour en 1578, Campvieure en 1594, Cambieure en 1594, Camp Lieure en 1639, Cambieuré en 1655, Cambieure en 1781 . La prononciacion occitana es Cambiure[2], dins la grafia de l'abat Antòni Savartés, donc [kam'biwɾe].
Lo nom de *Tolonhago (fòrma orala probabla al sègle IX) a desparegut. Cambiure representa campum liberum en latin, doncas « camp, al sens de domeni, terrador, liure, afranquit de drets feudals (senhorals) » [3]. Un tal nom deviá èsser conservat preciosament, çò que deguèt ajudar lo nom ancian a tombar al debrembièr. Toloniacum, coma Tolonjac, èra format del nom latin d'òme Tolumnius, ambe'l sufixe gallés -ācon. Cambiure èra donc probablament una anciana granda proprietat antica qu'aviá per mèstre Tolumnius (res pròva pas, çaquelà, que Cambiure es a l'emplaçament exacte de *Tolonhago). Campliure evolucionèt probablament cap a Cambiure pr'amor de l'esfòrç articulatòri que cal per prononciar lo grop consonantic -mpl-. Una grafia Campbiure escriu dos còps lo p de camp, una grafia arcaïzanta Campliure permet pas de legir lo nom (-l- es amudit dempuèi, al mens, lo sègle XVI). La grafia es logicament Cambiure.
Istòria
Aquesta seccion es voida, pas pro detalhada o incompleta. Vòstra ajuda es benvenguda !
Abans la refòrma cantonala de 2014, aplicada en 2015, la comuna èra del canton d'Alanha; es ara del canton de La Piège-au-Razès (en francés), que se disiá de Bram abans lo 1èr de genièr 2016.