Las fòrmas ancianas son Sanctus Johannes de Boregia, en latin, en 1286, Boregia, en latin, en 1319, Borregia, en latin, en 1334, Le lieu de Barreguier, en 1369-1587, Borige, en 1503-1589, Boriège, en 1571, Bouriège, en 1594 [1]. Segon Dauzat, Borièja vendriá benlèu de *Borridia, explicable per un nom galloroman d'òme, *Borridius, inferit del nom gallic Borrus[2]. Per Delamarre, *Bōrēdiā, d'un nom celtic *Bōrēdios, explicariá Borièja, « la propietat, las tèrras de *Bōrēdios »; lo nom *Bōrēdios es pas atestat, mès i a un nom de persona atestat, Boriedo (lo sens seriá *Bō-rēdo : « corsa en buòus » ?) [3].
Borièja a un diminutiu, Borijòla, i a un riu de Borijòla que passa près del vilatge del meteis nom e, benlèu pus interessant, un masatge nomenat Bourietch (grafia abat Sabarthès), Bouriech al sègle XVIII [4] e sus la mapa IGN. Borièg ? Borieg ? sembla pas un derivat de Borijòla, mes puslèu de Borièja; se pòt pas anar pus luènh.
Sant Sarnin
Las fòrmas ancianas son Universitas de Sancto Saturnino, en 1319, Rector Sancti Saturnini, en 1347, Taillable de Sainct Sernin, en 1594, Saint Serny, en 1647, etc [5].
Lo vilatge pòrta lo nom de l'avesque de Tolosa, Saturninus, martirizat en 257 [6],[7].
Istòria
Entre 1790 e 1794, La Plane, Saint-Sernin e Le Villa, doncas probablament La Plana, Sant Sarnin e Le Vilar foguèron annexats a Borièja [8]. Sus la mapa de Cassini, Sant Sarnin e Le Vilar pareisson coma parròquias annèxas e la Plana coma un lòc abitat quin que siá [9]; sus la mapa IGN actuala, Sant Sarnin es una aglomeracion, un masatge important, e La Plana e Le Vilar son de castèls situats al nòrd de la comuna [10].
Al mens a l'epòca de l'abat Sabarthès (començament del sègle XX), la glèisa es dedicada a Sant Sarnin, mes a Sant Joan (Baptista ?) al sègle XIII segon una atestacion de 1286 [11]. Justament, i a una anciana parròquia annèxa dins la comuna, ambe una glèisa encara, del nom de Sant Sarnin. Transferiment de dedicàcia ?
Abans la refòrma cantonala de 2014, aplicada en 2015, la comuna èra del canton de Limós; es ara del canton de la Région-Limouxine (en francés), donc de la Region Limosenca.
.svg)
.svg){kind=small}
