Lo planòl que va de Lobés a Somençac e qu'es a una altitud de 170-175 m es sul calcari blanc de l'Agenés [2], absent dels puègs situats pus a l'oèst e que culminan a 120-125 m. Se vei a 15 km de luènh.
La prononciacion es [ʃumɛŋ'ʃa]. Lo nom de Somençac vendriá del nom d'òme latin *Summentius, o *Sumentius, de Summius, derivat benlèu de summus o de Sumen, o per Delamarre, lo nom gallés *Sumentis, Sumantis, « bona pensada », emb lo sufixe -acum[3],[1],[4], latinizacion del sufixe celtic *-acon. Mès aquels noms son pas atestats (maugrat lo caractèr suggestiu de la proposicion de Delamarre). La parentat emb lo latin summum, « som, cima », per un vilatge situat en situacion dominanta, fai pensar que dempuèi la tèsi de Michel Roblin, se crei pas necessàriament que lo sufixe -ac es associat a un nom de persona. Compte tengut del fach que l'explicacion per un nom d'òme es pas assegurada, se poiriá pensar a un derivat de summus emb una connotacion de « lo vilatge/la fortalesa a la cima del planòl » o se se vòl un equivalent de Bèlvéser...
Lo nom de Gassac, parròquia dispareguda, fai pensar a Agaçac (Roergue) o a Agaçac (Gasconha, Nauta Garona), e tanben al castèl d'Agassac (Ludon de Medòc) : l'aferèsi es frequenta dins los noms que començan per -a; l'origina seriá Acatiacum, del nom d'òme latin Acatius (o puslèu Acaciacum, de sa varianta Acacius), emb lo sufixe -acum[5]. La bona grafia seriá donc Gaçac.
Las donadas de 1793 son eterogenèas emb las autras; La populacion de 1793, 1399 abitants correspond a Soumenzac et Saint Jean (en francés), donc Somençac e Sent Joan de Duràs[7],[8]; coma Sent Joan de Duràs aviá 709 abitants en 1800, las donadas juntan plan e se cal gardar d'imaginar una baissa catastrofica de la populacion de Somençac.
En 2018 la populacion èra de 230 abitants e la densitat èra de 20,14 ab/km².
.svg){kind=small}
