La Pèrcha. Las fòrmas ancianas son ecclesia de Pertica, en latin, cap a 1300, Perchia, en occitan, al sègle XIII, castel de Perghia, en 1283, p. de Pertica, en 1520 [1]. Dauzat i vei lo latin pertica, al sens de « pèrga, lata », de « rebrot » o de mesura agrària [2], explicacion que convenç pas Bénédicte Boyrie-Fénié, que sièc Pierre-Henri Billy, que prepausa lo sens de « talhadís, talhada ». La dificultat es fonetica : lo resultat de pertica en lengadocian es pèrga e fuguèsse una fòrma nòrd-occitana, seriá pèrja [notem que los parlars brageiragués, se gardan ca intacte, camjan ga en ja; mas ont es l'isoglòssa ?]; se tròba que la prononciacion correspond a pèrcha [la'pɛr(t)sɔ] [1].
Moiracs, omonime de Moiracs, près d'Agen, es atestat priorissa de Moiraco en 1326 (preséncia d'un priorat, pas coneissut fòra d'aquela mencion) [3]. L'origina deu èsser la meteissa que pel vilatge de delà Garona : segon Bénédicte Boyrie-Fénié, Mauriacos (fundos), a l'acusatiu plural > *Mauriac(o)s > *Mòuriacs (assordiment de au- atòn en [ɔw]) > *Moriacs > Moiracs, prononciat [muj'rats] [4] (çò qu'es la sola diferéncia, perqué nòstre Moiracs se pronóncia probablament [muj'ras], segon l'usatge de Durengues qu'escriu Moiras). Doás observacions son a far : lo passatge de Mauriacs a Moriacs es pas regular ni necessari (dins lo cas de Mauriac (Auvèrnhe), aquò's diferent, perqué tot au- pretonic passa a [u] en auvernhàs : [mu'rja]) e justament una tendéncia a l'anteposicion pus aboriva de iòd auriá poscut accelerar la pèrda del diftongue : *Mòuriacs > *Mòuiracs > *Mòiracs > Moiracs; segondament, la conservacion de -s finala dins *Mauriac(o)s es pas çò pus probable; i a una autra solucion, que dona de resultats importants en Gironda : dins lo cas de gentilicis sense sufixe, encara utilizats dins lo departament (Fumèl, los fumèls), los abitants de *Moirac son los *moiracs, puèi al cap d'un moment, lo nom del vilatge o de la parròquia es confondut emb lo gentilici, coma per exemple a Leujacs.
Istòria
Aquesta seccion es voida, pas pro detalhada o incompleta. Vòstra ajuda es benvenguda !
La comuna es formada de doás parròquias d'Ancian Regime, Sent Blasi de Moiracs e Sent Gervasi de La Pèrcha. Dins lo temps que los de La Pèrcha devián tornar bastir lor glèisa, anavan als oficis a Moiracs (que Durengues escriu Moiras), sus òrdre de Claude Joli, avesque e comte d'Agen [5] (1663-1678).
De 1793 a 1801, la comuna èra del canton de Sent Bertomiu d'Agenés[6]. Abans la refòrma cantonala de 2014, aplicada en 2015, la comuna èra del canton de Lausun; es adara del canton de la Val de Dròt.
Lo pauc de populacion de 1793 fai supausar que La Pèrcha e Moiracs podián èsser de las comunas diferentas. En 1793, lo nom de la comuna es Laperche, en 1801, es La Perche et Moiras; es un indici, mès lo site Cassini dona ren sus una eventuala fusion de las doás entitats e sus la populacion de Moiracs en 1793 [6].
En 2018 la populacion èra de 132 abitants e la densitat èra de 15,68 ab/km².
Aquesta seccion es voida, pas pro detalhada o incompleta. Vòstra ajuda es benvenguda !
.svg){kind=small}
