Lo Pont del Casse. La prononciacion es [lu,pun del 'kase]. Lo nom apareis sus la mapa de Cassini, al nòrd de Merens (escrit Merreins) [2]. Es al limit de la comuna, près de Bajamont. Lo sens es evident e sa motivacion deu èsser un pont situat benlèu sul recent camin grand que mena a Tornon d'Agenés e a Caors, al passatge de la Masse (nom francés). Èra pas una parròquia e lo nom podiá permetre d'unir sense gelosiá las parròquias divèrsas arremosadas a l'entorn de Merens, novèl borg (notem de fregada qu'una aviá dejà Cass- dins son nom e qu'una autra aviá mai o mens la referéncia a un pont dins lo seu). Jacques Astor, citat per B. Boyrie-Fénié, obsèrva que se tracta d'un casse blanc [1].
Merens deu èsser lo luèc citat per Dauzat. Las fòrmas ancianas èran Merenx (Sancti Petri de ~), en 1318, Merenchiis (de ~), en 1501, Merenx (Sancti Petri de ~), en 1520 e 1593 (segon Bénédicte Boyrie-Fénié), Merencs al sègle XII segon Dauzat, s'es pas un autre luèc. Lo nom s'explica per un nom germanic (gotic ?) Meris (Dauzat, que sièc Gamillscheg), o Mero (los Féniés, per Merens las Vals), o Mirus (B. Boyrie-Fénié), associat al sufixe germanic -ingos[3],[1],[4]. Sent Pèir de Merens èra una annèxa de Sent Grapasi d'Agen[5]
Senta Fe de Jerusalèm
Sent Ferriòl (nom supausat)
Casson (nom supausat a partir del latin Cassone[6] e del francés Cassou)
Sent Danís del Pont (o de las Gorgas)
La Cassanha es pas una parròquia, mès un castèl situat al sud de la comuna. B. Boyrie-Fénié cita, per 1307-1317 (los Rôles Gascons), las fòrmas ancianas Cassanea, Cassaneta, Cassania, Cassanya, Cassana, Cassaneu, La Cassayne[1]. Lo nom es pas en rapòrt ambe lo de la comuna e s'explica per cassanea, derivat de cassanum, ambe un sufixe collectiu -ea.
Istòria
La comuna del Pont del Casse se creèt a la revolucion dins lo districte d'Agen e lo canton d'Agen a partir de las parròquias del Casson (o de Casson) [6], de Merens, de Sent Ferriòl, de Senta Fe de Jerusalèm e de Sent Danís del Pont (o de Las Gorgas [6]).
De 1973 a 1983, la comuna de Bajamont foguèt annexada al Pont del Casse [7].
.svg){kind=small}