La prononciacion es [lu'temple 'dɔw]. Las fòrmas ancianas son Templum de Disclio (?), en latin, en 1311, domus Templi de Bruliis, en latin, en 1348, ecclesia Templi de Brolhio, en latin, en 1502, r. Domus militie Templi, en latin, en 1520, Le Temple de Bruil, en francés, en 1652 [1]. lo nom s'explica per una comandariá de l'Òrdre del Temple (dels Templièrs), de data pas coneguda. Los mots Brolhio, Bruil, etc, donan probablament lo nom d'origina del luèc. La fòrma de 1652 correspond probablament al gascon brulh (en lengadocian se ditz bruèlh), mès la comuna es pas gascona. Lo gascon s'arrèsta a La Fita e Bénédicte Boyrie-Fénié se pensa que podiá anar pus luènh a temps passat. Brulh o bruèlh venon del gallés brogilos, « pichon bòsc », a l'origina « pichon territòri », puèi « bòsc claus », derivat de brog(i), « territòri, region, frontièra, marca » segon Delamarre, « talhada, bartàs » en gallés, puèi en occitan « bòsc, riba boscosa », segon B. Boyrie-Fénié, « pichon bòsc embarrat d'una sèga o d'un mur », segon Dauzat[1],[2],[3].
Autres luècs
Saint-Caprais (nom francés) es probablament *Sent Grapasi, fòrma locala normala (veire Sent Grapasi de l'Èrm e Sent Grapasi de La Linda. Lo patron de la parròquia es Sent Caprasi, considerat coma primièr avesque d'Agen, martir al començament del sègle IV, e non pas l'abat de Lerins omonime, coma escriu lo Dauzat, en parlant de tots los Sent Caprasis. Lo nom a evolucionat en Grapasi per metatèsi de r [e sonorizacion de l'iniciala] [4],[5].
Saint-Gervais (nom francés) es benlèu *Sent Gervasi o *Sent Gervais. Lo nom de Sant Gervais (o Gervasi, fòrma mièja-sabenta) es lo d'un martir a Milan del temps de Dioclecian associat a son besson Protais (o Protasi) [6],[7].
Saint-Germain (nom francés) es probablament *Sent German. Sanctus Germanus es un avesque d'Auxerre, al sègle V; son nom, derivat de germen, « gèrme » aviá lo sens de « natural, autentic » [8],[9].
Istòria
Abans 1806, Saint-Jean-de-l'Air (= de l'Èrm) e Saint-Sulpice-de-Rivel foguèron annexats al Temple; en 1839, ne foguèt atal per Capraisy e Saint-Gervais segon lo siti Cassini [10]. Pels dos primièrs, pòt èsser una error. Sent Joan de l'Èrm es probablament de la comuna de Vilanuèva d'Òut e St Sulpice de Rivelede es a Vilanuèva o puslèu a La Salvetat de Leda (mas aquelas comunas ne fasián pas qu'una abans 1852). Las doás comunas son dins la lista del canton de Vilanuèva dins l’« Arrêté du 7 brumaire an 10 (29 octobre 1801) portant réduction des justices de paix du département de Lot-et-Garonne ».
Capraisy es al sud del Temple, escrit St Capraisy sus la mapa de Cassini e St-Caprais sus la mapa IGN. Saint Gervais es a l'oèst del borg, sus la RD 13 al sud de Castèlmauron d'Òut e al nòrd del caireforc entre la RD 13 e la RD 911. I a una autra parròquia sus la mapa de Cassini (segonda meitat del sègle XVIII), St Germain, a l'èst de la comuna [11],[12], probablament unida al Temple tanlèu la Revolucion.
.svg)
.svg){kind=small}