Las fòrmas ancianas son : Ecclesia S. Pauli de Murs en 1252, Parochia S. Pauli prope castrum de Murs, Aniciensis dioc. en 1275, Saint Paul en 1379, Saint Poul en 1401, Pal-Sénoire en 1793 [2].
Sent Pal es la fòrma regionala delh latin Paulus, lo nom de l'apòstol [3]. Pasmens, la prononciacion aproximativa a Mauvèiras seriá [sem'paw de se'nujɾə]; mas l'informatritz z-es pas segura de la prononciacion [4].
Murs
Segon Dauzat e Rostaing, Mur, delh latin murus, « mur »; designa sovent una fortificacion, en general d'origina romana o preromana [5]. Segon Joan Arsac, i a, a 860 m d'altitud, a La Chapèla Bertin, de vestigis de muralhas que tresplomban la val de Senoire; pòdon èsser los murs citats dins l'ancian nom de la comuna[6].
Senoire (Senoira ?)
Las fòrmas ancianas son : Fluviolis qui dicitur Sinus Aureus, vès 1148, Aqua de Senoire en 1252, Senoyre en 1279, Aqua Sinus Auri en 1324, Sirenueyra, Sirenieyra en 1338, Cenoyre en 1359, Flumen Cynus Auri en 1371, Cynioures en 1373, La riv. de Sonoyre en 1561 [7].
I a un dobte (las fòrmas estranhas de 1338), mas lo nom sembla mai Senoire que non pas Senoira.
Segon Joan Arsac, Senoire auriá pres lo nom d'un oppidum, una fortalesa celtica, *Senodurum, dont demorariá eventualament lo nom de Murs[6]. Joan Arsac, que coneissiá totjorn la fòrma occitana e que malurosament la cita rarament, auriá (normalament !) pas supausat una tala origina se lo nom s'èra achabat en -a. Petita remarca : duron es pas una fortalesa, coma se cresiá a l'epòca de Joan Arsac (1922-1994), mas un merchat barrat, conta-rotlat (per permetre alh mèstre de prelevar de taxas) [8]. *Senoduron seriá « vielh merchat » (o benleu « merchat de Senos »).
Istòria
En 1789, Sent Pal de Murs dependiá de la província d'Auvernhe, de l'eleccion de Briude, de la subdelegacion de La Chaa Dieu e delh presidial de Riam. Sa gleisa parochala, diocèsi delh Puèi de Velai e archipreirat de Sant Pàulhan, èra delh vocable de Sant Pal; l'abat de la Chaa Dieu presentava a la cura [2]. Sent Pal èra doncas de Velai pelh religiós (indici de la preséncia delh pòble gallic, los Vellavi e pas los Arverni) e d'Auvernhe pelh civil.
En 1946, Sent Pal de Murs venguèt Sent Pal de Senoire[9].
.svg){kind=small}
