La prononciacion es [esplañ'ta] a La Clausa, près de Gresas, [splañ'ta] a Cubèl[2]. Cubèl es pus auvernhàs que Gresas e amudís e- dins es- inicial.
Las fòrmas ancianas son Castrum dels Plantats, en 1279, Castrum de Plantatis, en 1285, Castrum deux Plantatz, en 1364, Le lieu des Plantas en 1465 [3]. O la fòrma francesa de 1465 es d'una epòca que lo t d'Esplantats se prononciava encara, o lo t èra mut dins lo grop final -ts. Ara -s finala a quitament disparegut. Empacha pas que lo -ts etimologic se consèrve a l'escrit, doncas Esplantats.
Segon Dauzat, Esplantats ven delh latin plantatum, luòc plantat, compréner en aubres [4].
Istòria
Dins l'Ancian Regime, Esplantats èra de la diocèsi de Mende (doncas de Gevaudan)e de l'archipreirat de Saug. Sa glèisa, sotz lo patronatge de Nòstra Dòna, fondada en 1476, saguèt erigida en chapèla vicariala lo 22 de març 1826, e en sucursala, lo 3 de julhet 1843. Esplantats èra un fèu immediat de la corona e dependiá de la província e de la bailiá de Gevaudan [3].
Abans la refòrma cantonala de 2014, aplicada en 2015, la comuna èra del canton de Saug; es ara del canton de Gorges de l'Allier-Gévaudan (en francés), donc de las Gòrjas de l'Alèir-Gevaudan.
.svg){kind=small}
