Kjörorð: لا إله إلا الله محمد رسول الله (arabíska) Lā ilāhā illā-llāhu; muhammadun rasūlu-llāhi „Það er enginn guð nema Allah; Múhameð er sendiboði Allah“
Stjórn Sómalílands lítur á sig sem arftaka stjórnar Breska Sómalílands sem hlaut sjálfstæði árið 1960 rétt áður en það sameinaðist Ítalska Sómalílandi og myndaði ríkið Sómalíu. Þegar ríkisstjórn Siad Barre hóf baráttu gegn aðskilnaðarsinnum í Hargeisa átti það þátt í að setja Sómölsku borgarastyrjöldina af stað. Eftir hrun miðstjórnarvaldsins árið 1991 lýsti Sómalska þjóðarhreyfingin yfir sjálfstæði Sómalílands. Sómalíland hefur ekki verið viðurkennt af neinni ríkisstjórn eða alþjóðlegri stofnun. Engu að síður hefur þetta ríki haldist stöðugt. Það hefur átt í átökum við Púntland (sem lítur á sig sem fylki í ríkjasambandi Sómalíu fremur en sjálfstætt ríki) um héruðin Sanaag og Sool.
Frá 1991 hefur Sómalíland verið undir stjórn lýðræðislega kjörinna ríkisstjórna sem sækjast eftir viðurkenningu alþjóðasamfélagsins. Nokkur ríki hafa sent fulltrúa til Hargeisa, og Eþíópía rekur viðskiptaskrifstofu þar. Ekkert ríki eða alþjóðastofnun hefur þó formlega viðurkennt sjálfstæði Sómalílands. Landið er félagi í Samtökum þjóða og þjóðarbrota án aðildar (UNPO).
Svæði sem stjórn Sómalílands gerir tilkall til
Heiti
Nafn landsins merkir einfaldlega „land Sómala“. Þetta svæði fékk þetta nafn þegar Bretar tóku við stjórn þess af Egyptalandi árið 1884, eftir að hafa gert nokkra samninga við soldána Sómala frá ættbálkunum Isaaq, Issa, Gadabursi og Warsangali. Bretar komu upp verndarríki á svæðinu sem var kallað Breska Sómalíland. Það fékk sjálfstæði sem Sómalíland árið 1960, en fjórum dögum síðar sameinaðist það Ítalska Sómalílandi og varð hluti Sómalíu. Þegar borgarastyrjöldin í Sómalíu braust út 1991, lýsti Sómalíland yfir sjálfstæði.
Á ráðstefnu í Burao árið 1991 var stungið upp á nokkrum nöfnum fyrir hið nýstofnaða ríki, þar á meðal „Púntland“, með vísun í hið forna ríki Púnt. Nú er það nafn notað á fylkið Púntland í Sómalíu. Annað nafn sem stungið var upp á var „Shankaroon“ sem merkir „betri en fimm“ á sómölsku, með vísun í fimm héruð Stór-Sómalíu.[1]
Landfræði
Hæðakort af Sómalílandi.
Sómalíland er norðvestan við Sómalíu, á milli 08°N og 11°30'N, og 42°30'A og 49°00 A. Það á landamæri að Djibútí í vesstri, Eþíópíu í suðri og Sómalíu í austri. Strönd Sómalílands er 850 km löng, að mestu leyti við Adenflóa.[2] Sómalíland er 176.120km2 að stærð.[3]
Loftslag í Sómalílandi er bæði vott og þurrt. Norðurhluti landsins er hæðóttur og á mörgum stöðum er hæðin milli 900 og 2.100 metrar. Héruðin Awdal, Sahil og Maroodi Jeex eru frjósöm og fjalllend, meðan Togdheer er að mestu gróðurlítil hálfeyðimörk. Awdal-hérað er líka þekkt fyrir eyjar undan ströndinni, kóralrif og fenjaskóga.
Guban er kjarrlend slétta sem liggur samsíða strandsléttunni við Adenflóa. Breidd sléttunnar er frá 12 km í vestri að 2 km í austri og þvert á hana liggja árfarvegir sem eru þurrir utan regntímans. Þegar tekur að rigna breytist lágvaxið kjarrið og grastóttir í iðagrænt landslag.[4]
Cal Madow er fjallgarður í austurhluta landsins. Hann nær frá norðvesturhluta Erigavo að svæði nokkrum kílómetrum vestan við borgina Bosaso í Sómalíu. Þar er hæsti tindur Sómalílands, Shimbiris, 2.416 metrar á hæð.[5] Klettótt Karkaar-fjöll liggja líka innan við strönd Adenflóa.[4] Í miðhéruðunum renna fjöllin í norðri saman við hásléttur og þurra árfarvegi sem nefnast Ogo-fjöll. Vesturhluti Ogo-fjalla rennur svo saman við Haud þar sem eru mikilvæg beitilönd.[4]
Stjórnmál
Stjórnsýslueiningar
Kort sem sýnir héruð Sómalílands
Sómalíland skiptist núna í sex héruð: Awdal, Sahil, Maroodi-Jeeh, Togdheer, Sanaag and Sool. Héruðin skiptast síðan í 18 umdæmi.[6][7][8]
↑actionaid.orgGeymt 10 janúar 2017 í Wayback Machine ActionAid International Somaliland (AAIS) supports poor and marginalised communities in three of six Somaliland administrative regions.
.svg)
