დედათყურძენი — ქართული აბორიგენული თეთრყურძნიანი საღვინე ვაზის ჯიში კახეთიდან.

ზრდასრული ფოთოლი საშუალოზე დიდი ზომისაა, მომრგვალო ან ოდნავ წაგრძელებული, ხუთნაკვთიანი. ფოთლის ქვედა მხარე აბლაბუდისებრადაა შებუსული. ყვავილი ორსქესიანია. მტევნები დიდი ზომისაა, მათი სიგრძე 24 სანტიმეტრს აღწევს. ცილინდრული ან ცილინდრულ-კონუსური ფორმის, საშუალო სიკუმსის. მარცვალი საშუალო ზომისაა, ოვალური, ზოგჯერ მომრგვალო. მომწვანო-მოყვითალო ფერის. რბილობი წვნიანია. კანი საკმაოდ სქელი და უხეში აქვს, ცვილისებრი ფიფქით უხვად დაფარული.

დედათყურძენი სხვა კახურ ჯიშებთან შედარებით ადრე მწიფდება და საშუალომოსავლიანია. დედათყურძენი იძლევა ხარისხიან სუფრის თეთრ ღვინოს.

• უჯმაჯურიძე ლ., კაკაბაძე გ., მამასახლიშვილი ლ., „ქართული ვაზის ჯიშები“, თბ., 2018, გვ. 101