Pospolo-lantegi bateko langilea izan zen eta CGT (Confédération Générale du Travail) sindikatuko idazkari nagusia 1909-1947 urteetan. Gerraren aurkako saioak egin zituen arren, frantses armadaren aldeko egitea eskatu zuen Lehen Mundu Gerraren garaian. Errusiako Iraultzaren aurka agertu zen 1918an, eta CGT banatu zenean (1921, GGTUren sorrera), idazkari nagusi izaten jarraitu zuen; beste hainbeste gertatu zen 1936an, bi adarrek bat egin zutenean.
1940an begiradapean ezarri zuen Vichyko Gobernuak, CGT debekatu ondoren, eta Buchenwaldeko kontzentrazio-esparruan eduki zuten naziek 1943-1945 urteetan. Gerraren ondoren kargu garrantzitsuak bete zituen nazioarteko erakundeetan, eta 1948an, CGT utzi eta CGT-FO (Confédération Générale du Travail - Force Ouvrière) sindikatua sortu eta Sindikatu Libreen Konfederazioa deituriko sindikatu-elkartea bultzatu zuen.
