Poŝtkodoj en Germanio, Postleitzahl (pluralo Postleitzahlen, mallongigo PLZ), konsistas nuntempe el kvin ciferoj kiuj indikas la larĝan zonon (unuaj du ciferoj) kaj la poŝtdistrikton (lastaj tri ciferoj). La aktuala sistemo estis enkondukita je la 1-a de julio 1993. Por serĉi nunan germanan poŝtkodon: Deutsche Post.

Antaŭ la reunuiĝo de Germanio, kaj Federacia Respubliko Germanio (ekde 1962) kaj Germana Demokratia Respubliko (ekde 1965) uzis kvarciferajn poŝtkodojn. Okcidenta Germanio en sia numeraro antaŭvidis ciferojn por orienta Germanio (1001-1999, 2500-2999, 3600-3999 kaj 9000-9999), la numeraro de orienta Germanio uzis ĉiujn ciferojn kaj ne antaŭvidis eblan integrigon de la okcidenta landoparto. Dum la unuaj monatoj post la ŝtata reunuiĝo, provizore pluuziĝis la du antaŭaj sistemoj, nur ke forfalis la du naciaj kodoj, kaj anstataŭe uziĝis komenca litero "W" (okcidento) kaj "O" (oriento): do D-2000 Hamburg iĝis D-W-2000 Hamburg, DDR-2000 Neubrandenburg iĝis D-O-2000 Neubrandenburg. En julio 1993 oficialiĝis unueca nova poŝtkodaro: Tamen oni ne uzis la antaŭpreparitan okcidentan sistemon, sed anstataŭe instalis novan kodaron, unuflanke por pli libere adapti la numeraron al la ŝanĝiĝintaj strukturaj bezonoj de la nacia poŝto, kaj aliflanke por ne doni la impreson ke "la oriento plian fojon devas adaptiĝi al la okcidento", ke "oriente ŝanĝiĝu ĉio, okcidente nenio".

En la sekva listo menciiĝas nur la ĉefaj urboj, centroj de "poŝtkodaj regionoj". Ĉirkaŭ la centraj urboj grupiĝis komunumoj de similaj poŝtkodoj: ekzemple 6101 estis la kodo de Roßdorf (apud Darmstadt), dum 6100 estis tiu de la proksima granda urbo Darmstadt.

¹ Tiu kodo en 1961 estis antaŭfiksita por Orienta Germanio.