Las Clòtas. Nom d'un ostal que podiá dificilament èsser lo caplòc de la comuna abans 1903. La comuna deviá portar aquel nom pr'amor de l'abondància de las clòtas e de las fonts [5], mas en realitat, coma lo nom es atestat al sègle XIII, las Clotas[6], èra benlèu un vilatge e una parròquia (remplaçada per la Sausièra bassa, ont i a la glèisa actuala ? una autra parròquia dispareguda ?).
La Sausièra, atestat en 1259, la Sauzeira es un derivat de sause. Es una formacion del segond millenari. Salés, salessa, de *saliceus, *salicea son de fòrmas pus ancianas pel sens de « ensemble de sauses » [7]
Sant Joan. La fòrma modèrna es francizada : Sant Jan[8]. En general, dels dos sant Joan, es Joan Baptista puslèu que l'Evangelista qu'es onorat dins los noms de glèisa.
(de) Senèspa (nom escrit sus una placa en occitan, grafia classica, que se vei sus la RD 105, al caireforc ambe'l camin de Sant Joan). La finala es rara e se tròba benlèu dins Saint-Genès-Champespe. Ernèst Negre dona pas cap explicacion dins Les Noms de Lieux du Tarn. Es benlèu un nom gallés, basat sus senos, « vièlh, ancian », plan productiu, e una finala en -èspa (indoeuropèu *-eskwa ?)
Istòria
La comuna es formada de las parròquias de Sant Jòrdi (fòrma supausada) de la Sausièra e de Sant Joan de Senèspa [9].
Lo nom de la comuna èra Lasclottes, en occitan Las Clòtas, fins al decret del 14 de novembre 1903. En 1903, lo caplòc passèt al vilatjòt de La Sausièra [10],[11] (mès ont èra abans ? A la Sausièra Bassa, ont i a la glèisa Sant Jòrdi ? a Sant Joan de Senèspa ? I a un lòc nommat Las Clòtas, mas es pas qu'un ostal sol, a la devesa de Salvanhac [12]; i a pr'aquò d'ancians camins que i menan). Es benlèu una marrida interpretacion del site Cassini e lo caplòc cambièt benlèu pas de plaça, quitament se la comuna cambièt de nom.
Abans la refòrma cantonala de 2014, aplicada en 2015, la comuna èra del canton de Salvanhac; es ara del canton de Vignobles et Bastides (en francés), doncas de Vinhals e Bastidas.
.svg){kind=small}