Lo canton de Puèg l'Avesque es una division administrativa de Carcin, venguda dempuèi 2015 sonque circonscripcion electorala, situada dins l'arrondiment de Caors, lo departament d'Òut e la region d'Occitània ancianament de Miègjorn-Pirenèus. A la refòrma cantonala de 2014, aplicada a las eleccions de 2015, lo canton se conservèt e passèt de 16 a 27 comunas, que en 2020 son pas mai que 25.
NB. Per de rasons tecnicas, una partida de las informacions de l'Infobox (superficia, populacion, densitat, n° INSEE) son las de la situacion d'abans 2015. Lo n° INSEE es ara 4615. La superficia es de 376,16 km², la populacion de 11 517 abitants en 2017. La densitat es donc de 30,62 ab/km².
Lo canton se creèt lo 15 de febrièr 1790 [1],[2]. Lo canton foguèt modificat lo primièr còp lo 13 de brumaire an X (4 de novembre 1801) [3].
Segon lo site Cassini, i agèt tanben entre 1790 e 1801 un canton de Duravèl, pas citat per Prudhomme
e fusionat en 1801 ambe'l de Puèg l'Avesque [4],[5]. L'informacion sembla de mal verificar.
Lo canton foguèt agrandit a las eleccions departamentalas del 22 de març de 2015, en aplicacion del decret del 13 de febrièr de 2014 que delimita los cantons del departament d'Òut[6].
La composicion del canton foguèt trebolada per la creacion de Pòrta de Carcin lo 1èr de genièr de 2019, ambe las comunas del Bolben, Sauç, Sent Matre e Fargas.
Las tres prumièras comunas èran del canton novel de Puèg l'Avesque e la darrèra del canton novèl de Lusèg. Pel decret del 5 de març de 2020 que modifica lo del 13 de febrièr de 2014, tota la comuna novèla de Pòrta de Carcin passèt dins lo canton de Puèg l'Avesque [7]. Lo canton de Puèg l'Avesque passèt atal de 361,37 km² a 376,16 km² ambe una populacion que passèt de 11 364 a 11 517 abitants en 2017.
