Xardíns da Mestranza

Vista dos Xardíns da Mestranza, no fondo o reitorado da UDC.
Tipo	xardín público
Localización
División administrativa	A Coruña, España
43°22′12″N 8°23′26″O / 43.3700837, -8.39048

Os Xardíns da Mestranza, tamén chamados Xardíns da Real Maestranza, son unha zona verde da cidade da Coruña. Situados entre o Paseo Marítimo e a Cidade Vella, ocupan un total de 1,96 hectáreas. Canda diferentes monumentos, coma esculturas, antigos canóns de artillaría e tramos da muralla, nos xardíns localízase a sede do reitorado da Universidade da Coruña.

O espazo que ocupan os Xardíns da Mestranza foron de uso militar dende mediados do século XVIII a fins do XX. O rei Fernando VI de España mandou construír a Real Mestranza da Coruña para o obradoiro e almacén de artillaría. As obras do edificio foron comezadas polo enxeñeiro Francisco Llobet en 1752, mais as protestas dos conventos limítrofes (Santa Bárbara, San Domingos e San Francisco) levaron a súa paralización.^[1] En 1771, Baltasar Ricaud reformou o edificio orixinal, de planta rectangular para dar lugar ao actual, cunha planta hexagonal irregular cun patio interior con corredores abertos con arcos sobre piares.^[2][3] Nas súas inmediacións instaláronse baterías de artillaría coa finalidade de protexer a ría do Burgo e o porto da Coruña.

A finais do século XX, no marco da modernización das forzas armadas de España, a Mestranza da Coruña perdeu a súa finalidade militar e foi desmantelado o cuartel. No 1984, o Concello da Coruña fíxose coa titularidade do espazo e urbanizou esta zona para a creación destes xardíns, o antigo edificio da Real Mestranza quedou restaurado en 1994 para acoller o reitorado da Universidade da Coruña.^[1][4]

Os Xardíns da Mestranza foron abertos ao público o día das Letras Galegas de 1993. A principios do século XXI os xardíns foron agrandados ao rematar a restauración do antigo cuartel de Macanaz como sede da Fundación Luis Seoane.^[5]

Ademais de varios tramos da muralla, da escavación da igrexa de San Francisco e do pozo do século XIV do convento dos franciscanos, existen outros monumentos nos Xardíns da Mestranza:

• Canón de artillaría Vickers 152,4/50 Modelo 1923.
• Unha estatua de corpo enteiro sobre pedestal de Diego del Barco, coruñés participante na Guerra de Independencia, obra de Francisco Groeiro Castro do ano 2008.
• Un busto inaugurado en 2006 de José de San Martín, obra de Francisco Groeiro Castro
• Un monólito en agradecemento a Ramón Luis García Barros, obra de Francisco Escudero colocado no 1997.
• Un monólito a Javier Fonte, obra de Francisco Escudero de 1997.
• Un monólito dos veciños da Cidade Vella a Charo, veciña falecida en 1992.

As especies arbóreas máis destacadas dos Xardíns da Mestranza son: ^[6]

• Álamos negros do Canadá (Populus x canadensis Moench)
• Tuias xigantes (Thuja plicata D. Don)
• Malváceas do tipo Lagunaria patersonii (Andrews) G. Don
• Abruñeiros dos xardíns (Prunus cerasifera Ehrh.)
• Piñeiros (Pinus sp)
• Piñeiros mansos (Pinus pinea L.)
• Bidueiros brancos (Betula alba L.)

• 
  Estatua de Diego del Barco
• 
  Busto de José de San Martín
• 
  Monólito en lembranza de Ramón Luis García Barros
• 
  Vista dos Xardíns co campanario da Venerable Orde Terceira no fondo.
• 
  Canón nos Xardíns
• 
  Monumento en lembraza dunha veciña da Cidade Vella.

1. ↑ ^{1,0 1,1} "Calle Maestranza: pasado militar y presente universitario - Pateando A Coruña". www.cope.es. Consultado o 2023-12-27. 
2. ↑ "Sede". www.udc.es. Consultado o 2023-12-27. 
3. ↑ "La antigua Maestranza de Artillería". La Voz de Galicia (en castelán). 2013-10-27. Consultado o 2023-12-27. 
4. ↑ "HEMEROTECA Manuel Fraga inauguraba el Rectorado en el cuartel de A Maestranza". La Voz de Galicia (en castelán). 2004-10-05. Consultado o 2023-12-27. 
5. ↑ "La remodelación de Macanaz costará cerca de mil millones". La Voz de Galicia (en castelán). 2001-07-06. Consultado o 2023-12-27. 
6. ↑ "Xardíns da Maestranza". Coruña Sostible. Consultado o 2023-12-27. 

A Galipedia ten un portal sobre: A Coruña