Maio é o quinto mes do ano no calendario gregoriano e ten 31 días. O seu nome atribúese á deusa romana Maia ou á deusa romana Bona Dea, cuxo festival se celebraba neste mes.

• 1 de maio: Día Internacional dos Traballadores, festivo na maior parte dos países do mundo.
• 2 de maio: Sublevamento do 2 de Maio, en Madrid.
• Nos primeiros días de maio (1 ou 3) celébrase a festas dos maios.
• 17 de maio: Día das Letras Galegas, conmemorando a data de 1863 no que fora a primeira edición do libro Cantares Gallegos de Rosalía de Castro.
• O primeiro martes de maio celébrase o Día Mundial da Asma. Para o ano 2008 elixiuse o lema "Ti podes controlar a túa asma", co obxectivo de estimular os pacientes a tomar parte activa no control da súa enfermidade ^[1]
• O segundo sábado do mes de maio celébrase o Día Mundial do Comercio Xusto.^[2]
• O segundo sábado ou o segundo domingo de maio celébrase o Día Mundial das Aves Migratorias. Trátase dunha celebración dobre, xa que tamén se celebran actos o segundo sábado ou domingo de outubro ^{[3] [4]}

• Ata o corenta de maio non sáque-lo saio.
• Auga en maio, pan todo o ano.
• Día tras día, maio chega.
• En maio, de meu me caio, xa coa maiola, xa co traballo.
• En maio, inda a vella queima o tallo.
• Maio fai o trigo, e agosto o viño.
• Maio longo, San Xoán redondo.
• Maio me molla, maio me enxuga, maio me bota na sepultura.
• Maio pardo, San Xoán claro.
• O percebe e o salmón, en maio están en sazón.
• O que en maio se molla, en maio se enxuga.
• O touro, o galo, a troita e o barbo, no mes de maio.
• Tras de maio vén San Xoán.

Wikimedia Commons ten máis contidos multimedia na categoría:  Maio

• Maio do 68