Nordenskiöld Land nasjonalpark er ein nasjonalpark på Svalbard, utlagt ved forskrift 26. september 2003 med heimel i lov av 15. juni 2001 nr. 79 om miljøvern på Svalbard (svalbardmiljølova).
Nasjonalparken omfattar Nordenskiöldkysten, Reindalen med sidedalar og mellomliggande kyst og dalar. Sjøarealet i Kaldbukta og i Fridtjovhamna, og ut til ei nautisk mil frå land ved lågvasslinja på strekninga Steinneset til Båtodden inngår i nasjonalparken. Han har eit landareal på 1207 km² og eit marint areal på 155 km².
Formålet med fredinga er mellom anna å ta vare på store areal med samanhengande og frodig vegetasjon og interessant moseflora, under dette òg Reindalen; det største av de isfrie dalføra på Spitsbergen.