Between the Buttons er det femte britiske og sjuande amerikanske studioalbumet til The Rolling Stones og kom ut i 1967 som oppfølgjaren til Aftermath.
Plata vart spelt inn i to omgangar i Los Angeles i august 1966 og London i november same året. Between the Buttons synte The Rolling Stones i ein periode der dei flytta seg inn i eit meir kunstnerisk landskap og bort frå R&B-røtene deira. Med album som The Beatles sitt Revolver, The Beach Boys sitt Pet Sounds og Bob Dylan sitt Blonde on Blonde, samt deira eige Aftermath og singlande deira frå 1966, hadde rocken fått ein kraftig utvida musikalsk horisont. The Rolling Stones prøvde å ta eit ytterlegare kunstnerisk steg frå Aftermath, og synte påverknad frå andre britiske band på denne tida som The Kinks.
Som Aftermath vart Between the Buttons gjeve ut i to forskjellige utgåver i Storbritannia og USA. Den britiske utgåva kom ut i januar 1967 på Decca Records, samstundes med ein separat singel, «Let’s Spend the Night Together» med «Ruby Tuesday» på baksida. Sidan det var vanleg i den britiske plateindustrien på denne tida å ikkje ta med singlane på studioalbuma, var ikkje denne med på «Between the Buttons». Albumet vart generelt godt teke i mot og nådde tredjeplassen på albumlista i Storbritannia. I Noreg låg albumet seks veker samanhengande på andreplassen, bak filmmusikken til The Sound of Music
I USA vart singelen med «Let's Spend the Night Together» og «Ruby Tuesday» ein del av albumet og «Back Street Girl» og «Please Go Home» fjerna. Dei to sistnemnde kom seinare med på den amerikanske plata Flowers. «Ruby Tuesday» gjekk til topps på singellista i USA og drog Between the Buttons med seg til andreplass.
Between the Buttons vart det siste albumet som vart produsert av Andrew Loog Oldham, som The Rolling Stones skilde seg sommaren 1967. Oldham hadde større innverknad på dette albumet enn tidlegare album, og nytta mellom anna Phil Spector-liknande lagvise lydspor på «Yesterday’s Papers», «My Obsession» og «Complicated», samt ukreditterte korvokalistar (kanskje mellom anna Graham Nash) gjennom heile plata. Brian Jones held fram å eksperimentere med eksotiske instrument og spelte mellom anna munnspel, blokkfløyte, piano, orgel og elektrisk dulcimer.
I åra etter ho kom ut vart Between the Buttons på ein eller annan måte oversett. I dag er derimot både kritikarar og tilhengjarar langt meir entusiastisk. I 2003 plasserte musikkmagasinet Rolling Stone albumet på 355. plass på lista deira over dei 500 største albuma gjennom tidene.
I USA vart albumet gjeve ut på London Records den 11. februar 1967. «Let's Spend the Night Together» og «Ruby Tuesday» vart putta inn på albumet, medan «Back Street Girl» og «Please Go Home» vart fjerna (desse kom ut på det neste amerikanske albumet, Flowers i juli 1967). Med «Ruby Tuesday» på toppen av singellista, klatra Between the Buttons opp til andreplassen på den amerikanske albumlista, og selde til gullplate.
I 2012 vart den amerikanske utgåva av albumet rangert på 357. plassen på lista til magasinet Rolling Stone over dei 500 beste albuma gjennom tidene.[4]
Innhald
Alle spor skrivne av Mick Jagger og Keith Richards
