Albumet var det første av to album med den australske gitaristen Trevor Lucas og den amerikanske sologitaristen Jerry Donahue. Begge hadde tidlegare spelt i lag med tidlegare Fairport-medlem Sandy Denny, som Lucas var gift med, i det kortliva Fotheringay. No hadde dei erstatta Simon Nicol, som hadde slutta i Fairport for å spele med eit anna tidlegare bandmedlem, Ashley Hutchings, i The Albion Band. Dermed var bandet utan originale medlemmar fram til Nicol kom attende til bandet i 1976.
Trommeslagar Dave Mattacks vart òg med i the Albion Band ei stund, men kom attende til bandet under innspelinga av Rosie. Han speler berre på fire av ti spor. På dei andre spelte Tim Donald og Gerry Conway trommer. Som Donahue og Lucas hadde òg Conway tidlegare spelt i Fotheringay, og vart sjølv medlem av Fairport i 1999 og er framleis med i dag.
