O mar de Xava (en indonesio, Laut Jawa) é un mar perimetral pouco profundo do océano Índico, localizado na plataforma de Sonda xusto no límite sur do océano Pacífico. Sitúase no medio das illas indonesias de Borneo ao norte, Xava ao sur, Sumatra ao oeste e Célebes ao leste.
Formouse a finais da última Idade do xeo[1] e ten preto de 310.000 km².
Xeografía
Ao noroeste, o estreito de Karimata (entre as illas de Borneo e Belitung) conéctao co mar da China Meridional; ao sur, o estreito de Sunda (entre as illas de Xava e Sumatra) comunícao co Índico; ao nordés, o estreito de Macasar (entre a illa de Borneo e as Célebes), co mar de Célebes; e ao leste, comunica co mar de Flores e o mar de Balí.
Con máis de 3.000 especies de vida mariña na área, a pesca é unha importante actividade económica. A área en torno ao mar de Xava é un destino turístico moi popular. O mergullo ofrece a posibilidade de explorar e fotografar covas submarinas, corais, esponxas e outros tipos de vida mariña. Entre as áreas protexidas da rexión, pódense destacar o Parque Nacional de Ujong Kulon, preto de Iacarta, o Parque Nacional Karimun Xava, un parque nacional composto por 22 illas, e a illa de Menjagan, preto de Balí. Ademais do parque nacional mariño de Karimunjawa e Miles de Illas ou illas Seribu, que se atopan ao norte da parte continental de Iacarta.
Historia
O mar de Xava foi o escenario dunha das batallas navais máis sanguentas (para os Aliados) da segunda guerra mundial, en febreiro e marzo de 1942, coñecida como batalla do Mar de Xava. As forzas navais dos Países Baixos, Gran Bretaña, Australia e os Estados Unidos foron practicamente destruídas ao tentar defender a illa de Xava dun ataque xaponés.
Notas
