Luc Smolderen

Biografía
Nacemento	Luc Hyppolite Marie Smolderen 7 de febreiro de 1924 Anveres, Flandres, Bélxica.
Morte	3 de xullo de 2013 (89 anos). Uccle, Bruxelas-Capital, Bélxica.
Cargos
Presidente da Sociedade Real de Numismática de Bélxica
Período	1990 – 1996
Antecesor	Tony Hackens
Sucesor	Hubert Frère
Presidente da Academia Real de Arqueoloxía de Bélxica
Período	2002 – 2005
Embaixador de Bélxica en Siria
Período	1972 – 1976
Embaixador de Bélxica en Marrocos
Período	1981 – 1985
Embaixador de Bélxica en Francia
Período	1986 – 1989
Datos persoais
País de nacionalidade	Belga.
Educación	Universidade Católica de Lovaina.
Tese académica	Jacques Jonghelinck, sculpteur, médailleur et graveur de sceaux (1530-1606) (1993).
Director de tese	Tony Hackens.
Actividade
Campo de traballo	Diplomacia, historiografía, numismática.
Ocupación	diplomático, historiador, numismático
Membro de	Sociedade Real de Numismática de Bélxica. Academia Real de Arqueoloxía de Bélxica.
Familia
Pai	Joseph Smolderen
Premios
Gran Oficial da Orde da Coroa. Comendador da Orde de Leopoldo. Comendador da Orde de Leopoldo II.
Lista Ambassador of Belgium to France (en) 1986 – 1989 – Alfred Cahen (pt)  → Ambassador of Belgium to Morocco (en) 1981 – 1985 Presidente Royal Academy of Archaeology of Belgium (en) Lista  Gran Oficial da Orde da Coroa  Commander of the Order of Leopold II (en)  Commander of the Order of Leopold (en)

Luc Hyppolite Marie Smolderen, nado en Anveres o 7 de febreiro de 1924 e finado en Uccle, Bruxelas, o 3 de xullo de 2013, foi un diplomático, historiador e numismático belga.

Luc Smolderen, nado en 1924 en Anveres, era fillo de Joseph Smolderen, un recoñecido arquitecto e urbanista,^[1] e profesor do Instituto Superior de Belas Artes de Anveres.^[2]

Cursou a súa educación secundaria no Ateneo Real desa cidade e posteriormente ingresou na Universidade Católica de Lovaina, onde en 1947 se graduou dos seus estudos de Filosofía e Letras na sección de Historia Moderna,^[1][3] cunha tese titulada Introduction à l’histoire du règne de Jean sans Peur ("Introdución á historia do reino de Xoán sen Medo"), dirixida por Léon van der Essen.^[2]

No mesmo 1947 obtivo a súa habilitación para a docencia no ensino medio, e en 1950 acadou o seu doutoramento en Dereito na mesma universidade.^[1][2][3]

Smolderen comezou a súa actividade como avogado no Tribunal de Apelación de Bruxelas, mais de camiño accedeu mediante exame ao Servizo Exterior,^[1] no curso 1952-1953. A partir dese momento ocupou diversos postos diplomáticos de relevancia, como membro da delegación belga ante as Nacións Unidas (1956-1959), e ante a OTAN en París (1959-1964), xefe da delegación do seu país ante a Axencia Internacional da Enerxía Atómica en Viena (1976-1980), ou secretario xeral adxunto do Ministerio de Asuntos Exteriores de Bélxica (1986), entre outros.^[4]

Como embaixador, encabezou a representación de Bélxica nas embaixadas de Siria (1972-1976) e Marrocos (1981-1985), e rematou a súa carreira diplomática como embaixador en Francia (1986-1989).^[3][4]

En paralelo á súa actividade profesional, Smolderen foi desenvolvendo o seu interese polo coñecemento histórico e artístico. Durante as súas viaxes como diplomático aproveitou para visitar escavacións arqueolóxicas como as que estaba a levar a cabo unha misión belga en Damasco, e tamén as coleccións de institucións como o Museo de Historia da Arte en Viena ou a Biblioteca Nacional en París, interesándose sinaladamente polo estudo da numismática e en particular, a medallística do Renacemento. Estas experiencias e os seus estudos deron lugar a unha gran cantidade de publicacións.^[4]

As súas investigacións durante tres décadas levárono a defender en 1996 unha tese de doutoramento en Historia na Universidade de Lovaina titulada Jacques Jonghelinck, sculpteur, médailleur et graveur de sceaux (1530-1606) ("Jacques Jonghelinck, escultor, medallista e gravador de selos"), dirixida por Tony Hackens, que foi publicada posteriormente como monografía,^[5] en 1996.^[1][3][4] Nos anos seguintes publicou tamén,^[6] en 2009, un amplo tratado sobre a historia da medalla en Bélxica.^[7]

Ao longo da súa vida, Smolderen estivo moi vinculado á Sociedade Real de Numismática de Bélxica, na que ingresou como membro correspondente o 4 de marzo de 1956 e xa de pleno dereito o 21 de marzo de 1965. Nesta entidade ocupou os cargos de secretario (1966-1970), vicepresidente (1986-1989), e finalmente presidente (1990-1996)^[3] e, consecuentemente, director da Revue belge de Numismatique. A partir dese momento pasou a ser presidente de honra da entidade.^[4]

Outra institución á que Smolderen lle dedicou gran parte dos seus esforzos foi a Academia Real de Arqueoloxía de Bélxica, en cuxa revista publicou un bo número de artigos. Ingresou nesta academia como membro correspondente o 6 de febreiro de 1980 e pasou á condición de titular o 18 de febreiro de 1989. Nesta entidade, ocupou os cargos de vicepresidente (2001-2002) e presidente (2002-2005).^[3][8][9]

Luc Smolderen finou en Buccle, Bruxelas, o 3 de xullo de 2013, aos 89 anos.^[1][9][10]

Ao longo da súa traxectoria, Luc Smolderen foi merecedor de diversos recoñecementos, entre eles os seguintes.^[9]

• 2008: Premio Arthur Merghelynck, Academia Real de Bélxica (clase de Artes).
• 2009: Premio quinquenal do Centro de Estudos Numismáticos de Bruxelas.

• Gran Oficial da Orde da Coroa.
• Comendador da Orde de Leopoldo
• Comendador da Orde de Leopoldo II.
• Cruz cívica de primeira clase.
• Gran Cordón da Orde do Mérito de Siria.
• Gran Oficial da Orde da Coroa de Carballo, de Luxemburgo.
• Comendador da Orde do Mérito de Italia.

Smolderen foi un prolífico autor de máis dun cento de artigos acerca dos seus temas de interese, publicados en diversas revistas especializadas como as belgas Revue belge d'archéologie et d'histoite de l'art; Revue belge de Numismalique et de sigillographie; Revue de archéologues et hisloriens de l'art de Louvain e Jaarboek Konink-lijk Museum voor Schone Kunsten Antwerpen; a francesa a Revue Numismalique ou a británica The Medal,^[8]

Estes son os traballos monográficos publicados por Luc Smolderen ao longo da súa traxectoria:^[11]

• (1972). La Statue du duc d’Albe à Anvers par Jacques Jonghelinck (1571). Académie royale de Belgique, Bruxelas.
• (1996). Jacques Jonghelinck, sculpteur, médailleur et graveur de sceaux (1530-1606). Université catholique de Louvain, Louvain-la-Neuve. ISBN 978-2960046243
• (2004). Les Waterloos, graveurs bruxellois de médailles et de sceaux (xvii^e siècle). Association de numismatique professeur Marcel Hoc, Louvain-la-Neuve. ISBN 296004620X ^[12]
• (2009). La Médaille en Belgique des origines à nos jours. Wetteren. ISBN 9789090240398 ^[13]

• Doyen, J-M. (2013). "Nécrologie. Luc Smolderen (1924-2013)". En Bulletin du Cercle d'Études Numismatiques. Vol. 50. Nº 3. Páxinas 211-212.
• Moucharte, G. (2013). "Luc Smolderen (1924-2013)". En Revue belge de Numismatique. Société royale de numismatique de Belgique. Páxinas I-X.
• Van Laere, R. (2013). "Luc Smolderen". En Revue belge d'archéologie et d'histoite de l'art. 82. Páxinas 232-233.