KAE Ligako 2023ko denboraldiaKAE Liga arraun lehiaketaren hemezortzigarren denboraldia izan zen. Lehen mailako txapelketa ekainaren 17an hasi zen Donibane Lohizuneko badian eta abuztuaren 20an amaitu Bilbo hiriko uretan; bigarren maila, aldiz, ekainaren 24an hasi zen Mutrikun eta abuztuaren 20an bukatu zen Bilbon; guztira, 24 estropada puntuagarri jokatu ziren[1]. Aurreko denboraldian KAE Ligako ordezkariek ez zuten TKE Ligara igotzeko txartelik lortu, beraz, lehen mailako berritasun bakarra Lapurdiko Arraun Taldearen parte hartzea izan zen, bigarren mailako txapelketa irabazi ostean OriorenB traineruaren lekua hartu zuena[2]. Guztira, 19 ontzik arraun egin zuten ligan, 12k lehen mailan eta 7k bigarrenean[3].
Denboraldi honetako txapelduna, bigarren urtez jarraian, Sanpedrotarra Arraun Elkartea izan zen[4]; guztira, 150 puntu eta sei bandera eskuratu zituzten gipuzkoarrek, eta 2023ko ontzi erregularrena beraiena izan zen. Igoera kanporaketan ere azkarrenak izan ziren eta 2024an TKE Ligan arituko dira arraunean[5]. KAE Ligako lehia, dena den, estua izan zen, Lapurdi igoberriak eta Arkote elkarteak gertutik jarraitu baitzuten Libia trainerua. LapurtarrekJoseba Fernandezen gidaritzapean egin zuten lehen mailara buelta eta urtea 148 punturekin, lau banderarekin eta igoera kanporaketa jokatzeko txartelarekin amaitu zuten. Denboraldia borobiltzeko, azken estropadan galdu zuten KAE Ligako garaikur nagusia eta igoera baino ez zitzaien falta izan. Bizkaitarrek, aldiz, lehenengo jardunaldian puntu asko galdu ostean, hirugarren egin zuten, 146 punturekin, eta San Juanekin batera ohorezko txanda osatu zuten; bina bandera irabazi zituzten[6].
Sailkapenaren beheko aldean, bestetik, Castrok maila galdu zuen. Kantabriarrak izan ziren ligako motelenak, 14 estropetatik 13tan azkeneko postuan gelditu ziren, eta hurrengo denboraldianbigarren ligan aritu beharko dira arraunean[6]. Deustu-Bilbo eta Busturialdea elkarteak, aldiz, 10. eta 11.enak hurrenez hurren, jaitsiera play-offean jokatu zuten aurreneko mailan jarraitzeko txartela; bilbotarrek mailari eutsi zioten eta bigarren egin zuten, baina Busturialdeko mutilak motelenak izan ziren bi estropadetan eta Castrorekin batera arituko dira 2024an bigarren mailan.
Azkenik, bigarren mailari dagokionez, Orioren B traineruak nagusitasun osoz irabazi zuen txapelketa; guztira, 9 bandera eta 68 puntu eskuratu zituzten oriotarrek, eta 10 estropadetatik 9tan azkarrenak izan ziren. San Nikolas ontziko mutilak, beraz, lehen mailan arituko dira hurrengo denboraldian Portugaleterekin batera[6][7].
Lehenengo maila
Partaideak
Guztira, 12 elkartek hartu zuten parte hemezortzigarren denboraldian; horietatik 5 gipuzkoarrak izan ziren, 3 bizkaitarrak, 3 kantabriarrak eta bat lapurtarra. Aurreko denboraldiarekin alderatuz gero, Lapurdik (bigarren mailako txapeldunak) Orio Bren tokia hartu zuen[3].
Kanporaketa honetan lau ontzik hartu zuten parte: denboraldia 10. eta 11. postuan amaitu zuten elkarteek, Deustu-Bilbok eta Busturialdeak; eta bigarren mailako 2. eta 3. ontzi azkarrenek, Portugaletek eta Donostiarra Bk[6].
Deustuko mutilen ontziak Donostiarrako bigarrenak baino azkarrago osatu zuen kanporaketa; 42:59:45 behar izan zuten bizkaitarrek eta 43:02:01 gipuzkoarrek[6].
Bigarren maila
Partaideak
Guztira, 7 elkarte izan ziren bigarren mailan parte hartu zutenak; horietatik 5 gipuzkoarrak izan ziren eta bizkaitar eta kantabriar bana. Aurreko denboraldiarekin alderatuz gero, berritasunak lehen mailatik jaitsi zen OriorenB trainerua eta berriro ere itsasoratu zen San JuanenB taldea izan ziren. 2022ko Castro Bren, Santoñaren eta Trintxerperen ontziak, aldiz, lehorrean gelditu ziren[3].
