Exiptu[11], oficialmente República Árabe d'Exiptu (árabe: مصر Miṣr), ye un país al nordeste d'África, magar qu'inclúi la Península del Sinaí, que ye parte d'Asia. La mayoría de la población asítiase a lo llargo del ríu Nilu y la mayor parte de la so superficie ocúpala'l Desiertu d'El Sáḥara cuasi toa ella non habitada. La capital ye El Cairu (القاهرة).
La riqueza qu'apurría'l fértil llimu tres los hinchentes añales del ríu Nilu, al pie de l'ausencia de poderosos pueblos pol so aislamientu, por cuenta de que'l valle del Nilu ta asitiáu ente dos amplies zones desértiques, dexaron el desenvolvimientu d'una de les primeres y más esllumantes civilizaciones na historia de la humanidá.
Los primeros pobladores d'Exiptu, algamaron les riberes del Nilu, daquella un conglomeráu de marismes y focu de paludismu, escapando de la desertización d'El Sáḥara. Les primeres comunidaes fixeron habitable'l país, y arrexuntáronse en rexones llamaes nomos. Pasáu'l tiempu y tres dómines d'alcuerdos y disputes los nomos arrexuntáronse en dos proto-naciones, denominaes l'Altu y Baxu Exiptu alredor del añu 4000 e.C. Exiptu unifícase alredor del añu 3100 e.C., dende'l faraónMenes (Narmer nel so nome exipciu).
La historia del Antiguu Exiptu estrémase en trés imperios con periodos entemedios de conflictos internos y dominación por gobernantes estranxeros. L'Imperiu Antiguu caracterizóse pol florecimientu de les artes y la construcción d'inmenses pirámides. Mientres l'Imperiu Mediu (2050-1800 e.C.), tres una etapa de descentralización, Exiptu conoció un periodu de rellumanza na so economía. Nel Imperiu Nuevu (1567-1085 e.C.) la monarquía exipcia algamó la so edá dorada conquistando a los pueblos vecinos y espandiendo los sos dominios so la direición de los faraones de la dinastía XVIII. La última dinastía foi derrocada polos perses nel añu 341 e.C., quien de la mesma fueron sustituyíos por gobernantes griegos y romanos, periodu qu'empezó hacia l'añu 30 e.C. como resultáu de la derrota de Cleopatra y Marcu Antoniu na batalla d'Actium, que traxo siete sieglos de paz relativa y estabilidá económica. Dende mediaos del sieglu IV, Exiptu formó parte del Imperiu Oriental, que se convirtió nel Imperiu bizantín.
.svg)
