La República de Xibuti o simplemente Xibuti[10] (en francés: Djibouti, n'árabe: جيبوتي, treslliteráu como Ŷībūtī) ye un país al este d'África asitiáu nel nomáu Cuernu d'África. Llenda con Eritrea al norte, con Etiopía al oeste y al sur, y con Somalia al sureste. Al este llenda col Mar Bermeyu y el Golfu d'Adén. El país, ún de los más pequeños d'África, tien una estensión de namái 23.200 km².
Na Antigüedá el territoriu xibutianu yera parte de la tierra de Punt. Dempués, xunta con otres zones del Cuernu d'África, formó parte de los territorios de los sultanatos medievales d'Adal y Ifat. A finales del sieglu XIX, tres un tratáu firmáu por Francia y los sultanes somalinos y afars, establecióse equí una colonia, nomada Somalia francesa, que camudó'l so nome pol de Territoriu Francés de los Afars y los Issas en 1967. Una década dempués el país votó pola independencia, qu'algamó'l 27 de xunu de 1977; tomó'l so nome actual, que yera'l de la so ciudá capital. Esi mesmu añu, el 20 de setiembre, Xibuti xunióse a les Naciones Xuníes[11]. A primeros de la década de los 90 del sieglu XX españó una guerra pol control del gobiernu ente'l partíu nel poder, el RPP (Concentración Popular pol Progresu) y l'opositor FRUD (Frente pola Restauración de la Xunidá y la Democracia), que nun finó hasta que los dos grupos firmaron un alcuerdu pa repartise'l poder nel añu 2000.
Xeografía
Mapa de Xibuti.
El país asítiase estratéxicamente a la vera del golfu d'Adén, una de les llinies marítimes más transitaes del mundu, y controla l'accesu al Mar Bermeyu y al océanu Índicu. A resultes de la so situación ye un puntu d'aprovisionamientu pa los barcos de carga, y tamién el principal puertu marítimu d'entrada y salida de productos pal so vecín Etiopía. Pol so calter de puntu estratéxicu hai en Xibuti delles bases militares foriates, ente les que destaca Camp Lemonnier, sede del U.S. Africa Command (USAFRICOM) de la Marina de los Estaos Xuníos. La capital del país ye tamién la sede de l'Autoridá Intergubernamental pal Desarrollu (IGAD), una organización de desarrollu rexonal qu'axunta a los países del este d'África.
Xibuti ye una nación multiétnica, con una población de poco más de 790.000 habitantes. Los dos mayores grupos étnicos son los somalinos y los afars; les llingues de so, del grupu afroasiáticu, son les dos llingües nacionales, magar que les llingües oficiales del país son l'árabe y el francés. el 94% de los sos habitantes son de relixón islámica.
.svg)
