República Democrática d'El Congu

República Democrática d'El Congu
République Démocratique du Congo
Repubilika ya Kongo Demokratika
Jamhuri ya Kidemokrasia ya Kongo
estáu soberanu
Bandera de la República Democrática d'El Congu Escudu de la República Democrática d'El Congu
Lema nacional Justice, Paix et Travail
Xusticia, Paz y Trabayu
Alministración
Nome oficial République démocratique du Congo (fr)
Capital Kinxasa
Forma de gobiernu República
Presidente de la República Democrática d'El Congu Félix Tshisekedi (dende 24 xineru 2019)
Primer ministro de la República Democrática del Congo (es) Traducir Sylvestre Ilunga (dende 7 setiembre 2019)
Llingües oficiales francés
División
Rellaciones diplomátiques
Miembru de
Xeografía
Coordenaes 2°54′S 23°42′E / 2.9°S 23.7°E / -2.9; 23.7
Superficie 2344858 km²
% agua 3,3 %
Costes 37 km
Llenda con 10.744 km
Puntu más altu Monte Stanley (es) Traducir
Puntu más baxu Océanu Atlánticu
Demografía
Población 105 789 731 hab. (2023)
Densidá 45,12 hab/km²
Xentiliciu congolés (masculín singular, femenín singular)
Esperanza de vida 59,621 años
IDH 0,479 (2021)
Tasa de fertilidá 6,006 (2014)
Economía
Moneda Francu congolés
PIB nominal 55 350 968 593 $ (2021)
Bancu central Bancu Central d'El Congu
Más información
Dominiu d'Internet .cd
Códigu telefónicu +243
Códigu ISO 180 / COD / CD
Estaya horaria UTC+01:00 y UTC+02:00
Cambiar los datos en Wikidata

La República Democrática d'El Congu[11] (en francés République démocratique du Congo (RDC)), tamién conocíu históricamente como Zaire, ye un país del África Central. Ye, por estensión, el mayor del África subsaḥariana, el segundu mayor de toa África (tres d'Arxelia) y el 11ᵘ mayor del mundu. La so población, d'alredor de 105 millones d'habitantes, conviértenlu nel país francófonu más pobláu del mundu, el cuartu más populosu d'África (tres de Nixeria, Etiopía ya Arxelia) y el 15ᵘ más pobláu del mundu. Llenda al norte cola República Centroafricana y Sudán del Sur, al este con Ruanda, Burundi y Uganda, con Zambia y Angola al sur, y con El Congu al oeste.

El territoriu de la RDC, centrada na conca del ríu Congu, tuvo habitada por pigmeos africanos dende va unos 90.000 años, y foi ocupáu nel contestu de la espansión bantú (hai ente 2.000 y 3.000 años)[12]. La fastera occidental del país, alredor de la desembocadura del ríu Congu, foi dirixida pol reinu del Congu dende los sieglos XIV a XIX. Nel noreste, el centru ya l'este, los reinos d'Azande, Luba y Lunde tuvieron la so dómina d'esplendor dende los sieglos XVI-XVII hasta'l sieglu XIX.

En 1870, xustu anantes de la Repartu d'África, entamó la esploración de la conca del Congu, primeramente de manes de Henry Morton Stanley col sofitu y subvención del rei belga Leopoldu II. Leopoldu adquirió derechos llegales sobro'l territoriu del Congu na Conferencia de Berlín de 1885, y declaró la tierra como so propiedá personal, col nome d'Estáu Llibre del Congu. Nesta dómina la xunidá militar colonial de Leopoldu, la Force Publique, forció a la población llocal a producir cauchu. Nesi contextu d'esplotación, les enfermedaes y la violencia usada pa obligalos a trabayar ficieron que millones de congoleses morrieran ente 1885 y 1908. Esi últimu añu Leopoldu, magar que nun quería renunciar al so derechu de propiedá, acabó cediendo'l nomáu Estáu Llibre a Bélxica; de resultes, el país entamó a ser conocíu como Congu Belga.

Esta colonia algamaría la so independencia'l 30 de xunu de 1960, col nome de República d'El Congu. El cabezaleru nacionalista Patrice Lumumba foi elixíu primer ministru, y Joseph Kasa-Vubu convirtióse nel primer presidente. La precariedá absoluta del nuevu estáu fizo españar un amagu de guerra civil, la nomada Crisis del Congu, por desalcuerdos sobre la forma d'organización alministrativa del territoriu. Les provincies de Katanga y Kasai del Sur intentaron, con apoyu belga, dixebrase del restu del país. Dempués de que Naciones Xuníes y los gobiernos occidentales refugaran ayudar a Lumumba esti proclamó que taba abiertu a l'axuda de cualesquier país, incluyida la Xunión Soviética, p'acabar cola crisis. Esti movimientu fizo recelar d'elli a Estaos Xuníos y Bélxica, que forciaron la so deposición del cargu por Kasa-Vubu el 5 de setiembre y favorecieron la so execución, por soldaos de Katanga dirixíos por militares belgues, el 17 de xineru de 1961.

El 25 de payares de 1965 el xefe del Estáu Mayor del exércitu, Joseph-Désiré Mobutu, que dempués tomó'l nome de Mobutu Sese Seko, xubió al poder al traviés d'un golpe d'estáu. En 1971 camudó'l nome del país pol de Zaire. El réxime de Mobutu yera una dictadura de partíu únicu, una y bones el so Movimientu Popular de la Revolución (Mouvement Populaire de la Révolution) yera l'únicu partíu políticu llegal. El so gobiernu, fondamente anticomunista, recibió por ello un sofitu importante d'Estaos Xuníos. La cayida del muru de Berlín y la propia dinámica política del país ficieron que, a entamos de la década de 1990, el gobiernu de Mobutu empezó a debilitase. La inestabilidá nel este del país, provocada pol xenocidiu de Ruanda y la desafección de la población Banyamulenge (congoleses d'etnia tutsi), acabó provocando una invasión del país pol exércitu de Ruanda. Esto provocó l'españíu de la Primer Guerra del Congu[13].

El 17 de mayu de 1997 Laurent-Désiré Kabila, cabezaleru de los tutsis de la provincia de Kivu del Sur, convirtióse nel presidente del país tres de la fuxida de Mobutu a Marruecos, y camudó otra vuelta'l nome del país, dándo-y l'actual. Les tensiones ente Kabila y les fuerces tutsis (autóctones y ruandeses) del país provocaron la Segunda Guerra del Congu, que duró ente 1998 y 2003. Nella participaron nueve países africanos y unos venti grupos armaos del país[14], nun conflictu que devastó'l país y causó la muerte a 5,4 millones de persones[15]. El presidente Kabila foi asesináu por ún de los sos guardaespaldes el 16 de xineru de 2001, y foi socedíu pol so fíu Joseph[16], que continuó cola política d'escasu respetu polos derechos humanos: desapariciones de persones, tortures, encarcelamientos arbitrarios y restricciones de derechos foron habituales demientres el so gobiernu[17]. Tres de les eleiciones xenerales de 2018, no que foi la primer transición pacífica de magar la independencia, Kabila foi sustituyíu nel cargu por Félix Tshisekedi[18].

La RDC ye un país perricu en recursos naturales, pero la so inestabilidá política, la falta d'infraestructures, la corrupción y sieglos d'esplotación colonial y comercial faen d'elli ún de los países menos desarrollaos del mundu. Neto la so capital, Kinxasa, que les dos ciudaes que la siguen n'importancia, Lumumbashi y Mbuji-Mayi, son poblaciones d'orixe venceyáu a la esplotación minera. Los minerales son, dafechu, la principal esportación del país; el so primer sociu comercial ye China, destín de la metá de les sos esportaciones en 2012. En 2019 el país ocupaba la posición 175, d'un total de 189 países, nel ránking de los países según el so Índiz de Desarrollu Humanu[19]. En 2018 estimábase que unos 600.000 congoleses colaran del país a otros vecinos pa escapar de la violencia política del centru y l'este del país[20]. Otros 4,5 millones de persones son desplazaos dientru del propiu país, y dos millones de neños tán en riesgu de desnutrición[21].

El país ye miembru de la Organización de Naciones Xuníes, el Movimientu de Países Ensin Alliniar, la Xunión Africana y el Mercáu Común d'África Oriental y Austral.

Historia

Divisiones alministratives

El país divídese alministrativamente, dende 2015, en 25 provincies y una ciudá-provincia, Kinxasa. Les provincies sodivídense en 145 territorios y 32 ciudaes.[22].

1. Kinxasa 14. Provincia d'Ituri
2. Provincia de Kongo Central 15. Provincia de Haut-Uele
3. Provincia de Kwango 16. Provincia de Tshopo
4. Provincia de Kwilu 17. Provincia de Bas-Uele
5. Provincia de Mai-Ndombe 18. Provincia de Nord-Ubangi
6. Provincia de Kasaï 19. Provincia de Mongala
7. Provincia de Kasaï-Central 20. Provincia de Sud-Ubangi
8. Provincia de Kasaï-Oriental 21. Provincia d'Équateur
9. Provincia de Lomami 22. Provincia de Tshuapa
10. Provincia de Sankuru 23. Provincia de Tanganyika
11. Provincia de Maniema 24. Provincia de Haut-Lomami
12. Provincia de Kivu del Sur 25. Provincia de Lualaba
13. Provincia de Kivu del Norte 26. Provincia de Haut-Katanga

Economía

Artículu principal: Economía de la República Democrática d'El Congu

Referencies

  1. ↑ URL de la referencia: https://www.interpol.int/Member-countries/World. Editorial: Interpol. Data de consulta: 7 avientu 2017.
  2. ↑ URL de la referencia: https://www.opcw.org/about-opcw/member-states/. Editorial: Organización pa la Prohibición d'Armes Químiques. Data de consulta: 7 avientu 2017.
  3. ↑ URL de la referencia: https://www.iho.int/srv1/index.php?option=com_wrapper&view=wrapper&Itemid=452&lang=en. Editorial: Organización Hidrográfica Internacional. Data de consulta: 8 avientu 2017.
  4. ↑ URL de la referencia: http://www.unesco.org/eri/cp/ListeMS_Indicators.asp.
  5. ↑ URL de la referencia: http://www.upu.int/en/the-upu/member-countries.html. Data de consulta: 4 mayu 2019.
  6. ↑ URL de la referencia: https://www.itu.int/online/mm/scripts/gensel8. Data de consulta: 4 mayu 2019.
  7. ↑ URL de la referencia: http://icdo.org/who-we-are/members/member-states.html. Data de consulta: 11 mayu 2020.
  8. ↑ URL de la referencia: https://public.wmo.int/en/members/congo. Data de consulta: 26 mayu 2020.
  9. ↑ URL de la referencia: https://www.who.int/choice/demography/by_country/en/. Data de consulta: 21 xunetu 2020.
  10. ↑ URL de la referencia: https://www.wcoomd.org/-/media/wco/public/global/pdf/about-us/wco-members/list-of-members-with-membership-date.pdf. Data de consulta: 16 marzu 2024. Páxina: 8. Supports qualifier: data de principiu.
  11. ↑ (2010) Cartafueyos Normativos. Nomes de los países del mundu y de les sos capitales y xentilicios. Uviéu: Academia de la Llingua Asturiana. ISBN 978-84-8168-500-8.
  12. ↑ Van Reybrouck D, Congo: the epic history of a people, chapters 1-2. Nueva York, HarperCollins, 2015. ISBN 9780062200129
  13. ↑ Congo, Democratic Republic of the, entrada na web The World Factbook. CIA, 2014 (actualizáu en mayu de 2021).
  14. ↑ Bowers C, World War Three, artículu na web My Direct Democracy (24 de xunetu de 2006).
  15. ↑ Robinson S, The deadliest war in the world, artículu na revista Time (28 de mayu de 2006).
  16. ↑ Joseph Kabila elected new president of DR Congo, artículu na web reliefweb.int (16 de payares de 2006).
  17. ↑ Democratic Republic of Congo in Crisis, artículu na web de la ONG Human Rights Watch.
  18. ↑ Mwanamilongo S, Anna C, Congo’s surprise new leader in 1st peaceful power transfer, artículu na web de l'axencia de noticies Associated Press (24 de xineru de 2019).
  19. ↑ Human Development Report 2020. The Next Frontier: Human Development and the Anthropocene, páxs. 343-6. United Nations Development Programme, 20 d'avientu de 2020. ISBN 978-92-1-126442-5
  20. ↑ Tounsi S, DR Congo crisis stirs concerns in central Africa Archiváu 2021-06-02 en Wayback Machine. Noticia de l'axencia France Presse, 6 de xunu de 2018.
  21. ↑ Dixon R, Violence is roiling the Democratic Republic of Congo. Some say it’s a strategy to keep the president in power. Artículu en Los Angeles Times, 12 d'abril de 2018.
  22. ↑ The National Assembly adopts the laws regarding the limits of the provinces in the Democratic Republic of the Congo Archiváu 27 xineru 2015 en Wayback Machine, National Assembly of the Democratic Republic of the Congo, 10 January 2015. (francés)

Enllaces esternos


África
Angola | Arxelia | Benín | Botsuana | Burkina Fasu | Burundi | Cabu Verde | Camerún | República Centroafricana | Chad | Comores | El Congu | República Democrática d'El Congu | Costa de Marfil | Eritrea | Etiopía | Exiptu | Gabón | Gambia | Ghana | Guinea | Guinea-Bisáu | Guinea Ecuatorial | Kenia | Lesothu | Liberia | Libia | Madagascar | Malaui | Malí | Marruecos | Mauriciu | Mauritania | Mozambique | Namibia | Níxer | Nixeria | Ruanda | Santu Tomé y Príncipe | Seixeles | Senegal | Sierra Lleona | Somalia | Suazilandia | Sudáfrica | Sudán | Sudán del Sur | Tanzania | Togu | Tunicia | Uganda | Xibuti | Zambia | Zimbabue

Dependencies: Islles Kerguelen | Mayotte | Reunión | El Sáḥara Occidental | Socotra | Tromelin