يا راكبن وجـنـا عليها الـكـازي***مامونتن مدراجها مـن بنـي يـاس

لا من تنحت مـع حمـادن عـزازي***شبيـه ربـدا طالعـت زول قنـاص

ركابهـا ما هـوب تاجـر جـزازي***عميل هجنن لأشهب اللال قـد قـاس

يوصل سلامن مثل نقـش الغـوازي***قولـن للأدغـم كاتبينـه بقرطـاس

سلم علـى شيخـن بعيـد المغـازي***عبدالعزيز الحبس قطـاع الأرمـاس

قل كيـف ياللـي للمعـادي نحـازي***شيخن على شيخن عريب على ساس

وصلـت حبلن قاصـرن ما يساقـي***لينه تثنى فأزرق الجـم ثـم قـاس

وصقلت لك سيفن ثقيـل المـرازي***لين استوى له شذرتن تقطع الـراس

سيفك هل العوجاء فهـودن اعـزازي***صبيان عركاتن على الحـرب يبـاس

لا جاء نهارن فيـه كثـر التعـازي***ثم شب فيه ابليـس ضـون بمقبـاس

وردوا هل العوجاء بغيـر اهتـزازي***وكم طوعوا بسيوفهم من صعب راس

طير السعـد ما لـه حلين يـوازي***عدل المناكب لبرق الريـش عفـاس

إليا اعتلـى جـرد الرمـك ما يهـازي***عوق العديم اللي براسه قسـى بـاس

يا ما علـى ماجـوب شفـه نــلازي***نارد حياض الموت وندوس مـا داس

نوبن ينطحنـا إلـقـاح المـلاقـي***ونوبن يفرشنا العدو شيـن الأجنـاس

لعـل عـودن خلـفـه ما يـعـازي***ربي عسـاه بعالـي العـز جـلاس

ولعـل بطنن زهملـه ثـم بـازي***في جنة الفردوس والخيـر غطـاس

وأنا أذكـر الله عـد نبـت الخـرازي *** وعدة حصى الصمان ورمال الأطعاس

اليوم يا ناصر غزا شاربي شيب***من عقب ما كنه جناح العقابي

عقب العلوم وعقب ذيك التعاجيب***اليوم عود وفي مروفة أحبابي

يا ما رقينا في طويل المراقيب***دليلة للهجـن خضـع الرقابي

ويا ما جذبناهـن لدار الأجانيـب***برهراهتن يزمي وراها السرابي

وإن وردوا عدٍ قليل التشاريب***أدلهن رسن بعيدٍ وغابي

أدل من مشقاص هـدف العراقيب***لا وردت حوض مقفدات العقابي

وإن لحقت الفزعات مثل العياسيب***والجيش خف ولا بزاه الترابي

أردها لعيون زين التعاجيب***وأخرب الفزعه بضرب الصوابي

وأقدم على حوض المنايا إلياهيب***وإن هابوا الرديان مانيب أهابي

وإليا رزقنا الله بذودٍ حنازيب***أفرح اللي من ربوعي هقابي

ولا نيب دعبول هروجــه رباريب***سوه على ربعه غضير الشبابي

شري على الفزعة بكثر التصاويب***وأثني إلى نار الذليل الرعابي

يابنت والله مابهرجك خمالى***وانحاس بالى يوم طريتى الشيب

والشيب هو قبله وجيه الرجالي***زحول الرجال اللى تسموا على الطيب

كم أشمطن لاهاب بعض العيــالي***يارد على حوض المنايا لياهيب

وخطو الغليم لو بوجهه جمالى***يجيك دعبولن هروجه رباريب

كباي لكربت عليه الحبالي***نقاز في وجيه الدنايا الاصاحيب

يابنت ياللى مثل وصف الغزالي***يا أم الجعود اللى تنثر على الجيب

إنتي من اللى يبعدن المفالى***شقح البكار اللي زهن الدباديب

والامن عوس الغنم الطفالي***صفر العيون اللى يفرسهن الذيب

فلما سمعت ذلك أسفت على مابدر منها وقاطعته بان لايكمل فقال

خوذي كلامن مثل نقد الريالي***لابه عذاريبن ولابه شواذيب