Las fòrmas ancianas son : castri Montis Gaudii... in castro nostro Montis gaudii en 1255, Mons Gaudii en 1259, castri de Montigaudii en 1270, Monte Gaudio en 1271, bastida de Monte Gaudii en 1272, etc, Montis Jovis en 1326, Monte Gaudio cap a 1400, Mons Gaudium al sègle XIV, Montjoye en 1470, gleya de Montjoy... locum Montis Gaudii, Montjoy(e) en 1526, Beata Maria montis Gaudii en 1580, Beatae Mariae de Montjoye en 1640, Montjoy (mapa de Cassini)
[5].
Segon Dauzat e Rostaing, los Montjòis son formats ambe mons [montem] e l'etimologia de la segonda partida es malsegura; segon los autors, vendriá de mons gaudii, « mont del gaug » o del germanic mundgawi, « proteccion del territòri »; designa una eminéncia caracteristica long d'un camin, sovent un tumulús, o una construccion que sèrv de senhal [6]; segon los Feniés, aquel nom representa de pilòts de pèiras qu'ensenhan lo camin a seguir o remembran un eveniment important [7].
Burgan e Lafon remembran los articles d'Anne Lombard-Jourdan de la Nouvelle Revue d'Onomastique, 1990, p. 281-282 e 1993, p. 159-180. Cap a la fin del sègle X, un montjoie designava d'auturas situadas près de lòcs sents; lo nom es atestat Mons Gaudii en 997. S'aplicava mai que mai al tumulús ont Sent Danís seriá estat escapitat. La tuca èra lo punt de recampament de las tropas reialas abans un combat, en cridant « Montjoie-Saint-Denis ! ». Èra donc lo crit de guèrra dels cavalièrs franceses. L'etimologia es un compausat germanic, format de Mund, « apara ! », a l'imperatiu, e de Gau/Gawi, « país, territòri ». Seriá a l'origina una crida a un protector del territòri dels francs, çò qu'explica lo sens de crit de guèrra. Foneticament, lo passatge de *mundgawi a montjoie es regular en francés e lo nom foguèt latinizat en montem gaudii e cristianizat per lo ligam a Sent Danís. Lo toponime s'espandiguèt suls camins de pelegrinatge e prenguèt lo sens de « montet que sèrv d'observatòri », de « pilòts de pèira o d'edicul per ensenhar lo camin o gardar un remembre » e quitament de « quantitat, abondi » [5].
.svg){kind=small}