Winter Light er det nittande studioalbumet til den amerikanske songaren Linda Ronstadt, gjeve ut seint i 1993.
Historie
Winter Light var det første soloalbumet til Ronstadt sidan Don't Cry Now som ikkje var produsert av Peter Asher. Ho valde å produsere seg sjølv i lag med George Massenburg. Ronstadt gjekk for ein stil med lag på lag med lyd i ein Enya-aktig New Age-stil, som på Anna McGarrigle sin «Heartbeats Accelerating» — den første hitsingelen på albumet — og Brian Wilson sin «Don't Talk (Put Your Head on my Shoulder)». Det vart laga ein musikkvideo til «Heartbeats Accelerating». Songen «Oh No Not My Baby» gjekk inn på topp 30 på Adult Contemporary-lista våren 1994.
Rolling Stone gav albumet fire av fem stjerner. Det selde derimot skuffande og nådde berre 92. plassen på Billboard-lista, og selde kring 250 000 eksemplar i USA.
Allmusic-kritikaren Jose Promis skreiv «Winter Light kan utan tvil reknast som det beste popalbumet til Linda Ronstadt i 1990-åra. Det er ingen dårlege spor på dette godt produserte albumet. Faktisk vert det betre ved kvar gjennomlytting. Dette undervurderte albumet er rett og slett ein juvel, og eit must for fans av songaren.» Dei gav likevel berre tre av fem stjerner til albumet.[1]
