Jean-Baptiste Giard

Biografía
Nacemento	14 de febreiro de 1932 Lille, Francia
Morte	18 de maio de 2018 (86 anos) París. Illa de Francia. Francia
País de nacionalidade	Francesa.
Educación	École des Chartes.
Q89547790	Estudos de moeda da Antiga Roma.
Actividade
Campo de traballo	Historiografía e numismática.
Ocupación	conservador, historiador, numismático
Influencias	H. Mattingly. A. Alföldi.
Premios
- (1969): Premio Duchalais. - (1983): Premio Allier de Hauteroche. - (1989): Medalla da RNS
Lista (1977)  Cavalheiro da Ordem das Palmas Académicas (pt)

Jean-Baptiste Giard, nado o 14 de febreiro de 1932 en Lille e finado o 18 de maio de 2018 en París, foi un historiador e numismático francés vinculado ao Gabinete de Medallas da Biblioteca Nacional de Francia.

Giard naceu en 1932, décimo oitavo fillo dunha familia católica de Lille, e na súa infancia educouse no Colexio Sante Odile, desa cidade. A segunda guerra mundial fíxolle vivir a morte do seu pai e de dous dos seus irmáns, e o afastamento da súa nai durante un éxodo por diversas cidades francesas. De volta a Lille á fin da contenda, acabou o bacharelato en 1952 na escola xesuíta de Saint Joseph.^[1]

Posteriormente, en París, Giard graduouse en Arquivística e Paleografía en 1960 na École des Chartes, cunha memoria titulada La Monnaie de Saint-Quentin au temps de Charles VI et de Charles VII, 1385-vers 1447. Só un ano despois ingresou no Gabinete de Medallas da Biblioteca Nacional de Francia, institución á que se mantivo vinculado profesionalmente durante toda a súa carreira, primeiro como bibliotecario e conservador de moeda romana (1961-1992) e posteriormente como conservador xefe (1992-1997).^[1][2] En 1997 foi nomeado conservador honorario.^[3]

No curso 1966-1967 foi residente no Instituto Francés de Arqueoloxía en Beirut, por invitación do seu director, Henri Seyrig.^[1]

A súa experiencia como docente comezou na Escola do Louvre, onde ensinou Numismática Romana e Medieval entre 1960 e 1974. Os cursos seguintes foi profesor axudante no Instituto de Estudos Avanzados de Princeton (1974-1977),^[3] onde fixo amizade con Andreas Alföldi. Posteriormente exerceu a docencia na Escola Normal Superior e, entre 1985 e 2000, na Escola de Altos Estudos en Ciencias Sociais.^[1]

Aínda que os seus comezos como investigador estiveron relacionados coa numismática medieval, a súa carreira foi derivando cara á moeda da Antiga Roma, terreo no que foi un referente internacional. Unha das súas obras máis importantes foi a publicación do catálogo de moedas do Imperio Romano do Gabinete, en tres volumes, desde 1976 ata 1998, seguindo a clasificación establecida por H. Mattingly.^[1][2]

Outro dos seus proxectos máis destacables foi a elaboración do catálogo das cuñaxes da ceca de Lugdunum (Lión) desde os seus inicios en 43 a. de C. ata o reinado de Claudio (196-197), pechando así a serie iniciada por Pierre Bastien.^[1][2]

Como editor, Giard foi secretario (1962-1963 e codirector (1974-1996) da revista Revue de numismatique, e foi tamén o creador da serie Trésors Monétaires, da Biblioteca Nacional, na que se encargou da edición de 12 volumes.^[1][2]

Entre outros cargos, Giard foi membro do equipo directivo da Comisión Internacional de Numismática, entre 1979 e 1986. Tamén participou en tres edicións do Congreso Internacional de Numismática: Roma 1961, Nova York 1973 e Londres 1986.^[1]

• (1969): Premio Duchalais, da Académie des Inscriptions et Belles-Lettres, de París.^[1][2]
• (1977): Cabaleiro da Orde das Palmas Académicas.^[2]
• (1980): Membro honorario da Sociedade Numismática Romanesa.^[4]
• (1983 e 2001): Premio Allier de Hauteroche, da Académie des Inscriptions et Belles-Lettress.^[1][2]
• (1989): Medalla da Royal Numismatic Society, de Londres.^[5]

Giard foi un autor prolífico, con máis de 130 referencias publicadas, entre monografías e artigos.^[6][7]

• (1976-1998). Catalogue des monnaies de l'Empire romain. Bibliothèque nationale, París.
  • (1976). I. Auguste. ISBN 2-7177-1305-0
  • (1988). II. De Tibère à Néron. ISBN 2-7177-1776-5
  • (1998). III. Du soulèvement de 68 après J.-C. à Nerva. ISBN ISBN 2-7177-1304-2
• (1979). Choix de monnaies romaines et byzantines: Catalogue des ektachromes. Bibliothèque nationale, París. ISBN 9782717714883
• (1980). Le Portrait d'autrefois. Bibliothèque nationale, París. ISBN 2-7177-1563-0
• (1983). Le Monnayage de l'atelier de Lyon: des origines au règne de Caligula, 43 avant J.C.-41 après J.C. Ed. Numismatique romaine, Wetteren.
• (1988). Le Grand camée de France. Bibliothèque nationale, París. ISBN 2-7177-2045-6
• (1983-2000). Le Monnayage de l'atelier de Lyon. Ed. Numismatique romaine, Wetteren.
  • (1983). I. Des origines au règne de Caligula (43 avant J.-C.-41 après J.-C.). ISBN 9789071165092
  • (2000). II. De Claude Ier à Vespasien, 41 - 78 après J.C. et au temps de Clodius Albinus, 196 - 197 après J.C. ISBN 90-71165-09-4
• (1987-2009). Rispostiglio della Venèra: nuovo catalogo illustrato (editor). L'Erma" di Bretschneider, Roma.
  • (1995). I. Gordiano III - Quintillo (con S. Estiot). ISBN 9788870628722
  • (1995). II-1. Aureliano - S. Estiot (con S. Estiot). ISBN 9788870628920
  • (1987). II-2. Tacito e Floriano. (con S. Estiot).
  • (2009). III-1. La monetazione di Probo a Roma (con D. Modonesi e J. Guillemain). ISBN 9788871404011
  • (2000). IV. Caro - Diocleziano (con D. Gricourt e P. Bastien).

• Amandry, M. (2018). "Jean-Baptiste Giard (1932-2018)". En Coins Weekly. 30 de maio.
• Amandry, M. (2019). "In memoriam : Jean-Baptiste Giard (1933-2018)". En Revue numismatique. Vol. 176. Páxinas 3-14.
• Rambach , H. (2018). "Jean-Baptiste Giard (1932-2018)". En The E-Sylum. Vol. 21. Nº 39. 30 de setembro.

• Audiovisual: Les monnaies et l'histoire (1973). Coa participación de Giard.