O VI Festival de Eurovisión Junior celebrouse en Chipre, na cidade de Limassol o 22 de novembro de 2008. O concurso celebrouse no Palais des Sports, e foi presentado por Axel Michael e Sophia Paraskeva. O país gañador foi Xeorxia, coa canción Bzz..., interpretada polo trío Bzikebi, que obtivo 154 puntos. Esta é a primeira vez, neste concurso, que gaña unha canción nun idioma inventado.[1]
Chipre gañou o concurso previo para organizar o Festival ante outros tres países: Portugal, Suecia e Ucraína. A televisión chipriota CyBC foi a encargada de organizar o espectáculo.
En canto aos cambios no formato, a organización decidiu reducir de oito a seis o número máximo de persoas no escenario durante unha actuación. Outro cambio importante foi a implantación dun xurado que ten o 50% dos votos de cada país. A orde de participación decidiuse o 13 e 14 de outubro.[2]
Slogan e escenario
O slogan desta edición foi Fun in the Sun, a pesar de que houbo tormentas o día do evento.[3] O escenario foi deseñado por George Papadopoulos e foi dado a coñecer o 6 de xuño de 2008. Consistía en varios arcos situados a cada lado do escenario xunto a unha pequena canle de auga ao longo da parte dianteira deste.[4]
Por primeira vez nos cinco anos que leva celebrándose o festival, o logo non é unha nena con coletas cantando.
Os países que participaron no festival foron un total de 15.[5]
Acerbaixán ía debutar nesta edición (no mesmo ano que debutou no Festival da Canción de Eurovisión 2008). Con todo, un tempo despois de confirmar a súa participación, informou que se retiraba sen chegar a participar ao non atopar unha forma adecuada de realizar unha selección nacional de representante.
.svg){kind=small}