Dave Grohl
(2019) Irudi gehiago
Bizitza
Jaiotzako izen-deiturak	David Eric Grohl
Jaiotza	Warren, 1969ko urtarrilaren 14a (55 urte)
Herrialdea	Ameriketako Estatu Batuak
Bizilekua	Encino
Lehen hizkuntza	ingelesa
Hezkuntza
Heziketa	Bishop Ireton High School (en) Thomas Jefferson High School (en) Annandale High School (en)
Hizkuntzak	ingelesa
Jarduerak
Jarduerak	gitarra-jotzailea, bateria-jotzailea, abeslaria, kantugilea, film-zuzendaria, zinema aktorea eta musikagilea
Jasotako sariak	ikusi Grammy Sariak Rock and Roll Hall of Fame
Kidetza	Nirvana Foo Fighters Them Crooked Vultures The Backbeat Band Scream Harlingtox A.D.
Izengoitia(k)	Late!
Genero artistikoa	rock rock alternatiboa heavy metala sludge metal (en)
Ahots mota	tenorra
Musika instrumentua	gitarra ahotsa bateria
Sinesmenak eta ideologia
Alderdi politikoa	Ameriketako Estatu Batuetako Alderdi Demokrata

David Eric Grohl (Warren, Ohio, 1969ko urtarrilaren 14a - ) estatubatuar rock musikaria da. 1990 eta 1994 urteen bitartean, Nirvana taldeko bateria-jotzailea izan zen. Kurt Cobain gitarra-jotzaile eta abeslariaren heriotzaren ostean, Nirvana utzi eta Foo Fighters taldea sortu zuen 1995ean. Grohl zenbait bandaren partaide izan zen 80. hamarkadan (Scream aipagarriena da) eta, geroago, Queens of the Stone Age, Garbage, Tenacious D eta Killing Joke bezalako taldeen grabaketetan esku hartu zuen. 2004an Probot izeneko diskoa editatu zuen, gustukoen zituen heavy metaleko abeslarien parte hartzeaz.

Grohl txikia zela, bere familiarekin batera Ohio utzi eta Alexandriara, Virginian, joan ziren, hots Washington DC-tik gertu dagoen eremu batera. Handik hiru urtera, gurasoak banandu eta Dave amarekin geratu zen. Grohl abizenak Alemanian du jatorria.

Hamabi urterekin, gitarra klaseak jasotzen hasi zen, baina 15 urterekin utzi zuen. Geroztik, lagunekin jotzen hasi zen eta handik urtebetera, punk rockarekiko interesa piztu zitzaion. Izan ere, uda hartan bere lehengusu Tracyri bisita egin zionean, hark Grohl zenbait kontzertutara eraman zuen.

Hurrengo urteetan, Dave bere hiriko zenbait taldetako gitarra-jotzailea izan zen, besteak beste, Frek Babyrekin: horiek banandu zirenean, Mission Impossible hardcore punk, Scream hardcore eta Dain Bramage hardcore/post-punk taldeetako partaide izan zen. Bateria-jotzaile moduan hasi zen urteetan, Queen-eko Roger Taylor eta Led Zeppelin-eko John Bonhamen eragina jaso zuen batik bat. Hori zela eta, Bonhamen en hiru zirkuluko logoaren irudia eskumuturrean tatuatu zuen.

1990ean, Scream-ekin egindako biraren ostean, Grohl Nirvana-n bateria jotzen hasi zen. Talde horrekin Nevermind, In Utero eta MTV Unplugged in New York albumak grabatu zituen. 1994an Davek bere lagun Greg Dullirekin batera disko bat grabatu zuen: handik aste betera, Foo Fightersen lehen albuma izan zen.

Nirvanarekin lan egiten zuen bitartean, Grohlek taldearen estilotik at zeuden zenbait abesti ondu zituen. Horregatik, Late! izenarekin Poketwatch demoa sortu zuen. Ehun bat ale editatu ziren soilik, Davek eremu pertsonalean banatu zituenak. Bertan, Color Pictures of a Marigold abestia ageri da, gerora Kurt Cobainekin batera Heart-Shaped Box Singlean berreditatu zena. Azkenik, 1997ko martxoaren 11n, Touch izeneko albuma editatu zuen Late!-ek: Touch izena ere zeukan filmaren soinu-bandan agertzen da.

Aste batean, Grohlek “Foo Fighters” izeneko albuma grabatu zuen, abesti guztiak berak konposatu zituelarik. Hau promozionatzeko, Pat Smear (gitarra, Nirvanarekin jo zuena), Nate Mendel (baxua) eta William Goldsmithekin (bateria) bira bat egin zuten. Geroago "The Colour and the Shape", "There's Nothing Left to Lose" eta "One by One" diskoak grabatu zituzten eta Chris Shifflet taldearen gitarra-jotzaile eta Taylor Hawkins bateria-jotzaile izan ziren. Horretaz gain, Dave Grohlek Probot albuma editatu zuen: bertan, zenbait abeslarirekin (Motörhead-eko Lemmy Kilmister edo King Diamond aipagarrienak) heavy metal abestiak agertzen ziren, eta Garbage, Queens of the Stone Age eta The Prodigy taldeen zenbait diskotan bateria jo zuen. Bere bizitza pribatuari dagokionean, 2003an Jordyn Blumekin ezkondu zen eta bi alaba izan dituzte: Violet Maye Grohl (2006-4-15) eta Harper Willow Grohl (2009-4-17).

2009an Dave Grohl, John Paul Jones (Led Zeppelin) eta Josh Hommek (Queens of the Stonage) talde berri bat sortu behar zutela esan zuen, Them Crooked Vultures deitua. Urte berean, Slash-en Slash albumeko Watch This/Watch This Dave abestia grabatu zuen. "Wasting Light" Foo Fighters-en album berria izan zen, 2011n argitaratua.

Grohlek publikoki onartu du gustukoen duen musika taldea Led Zeppelin dela, eta talde horretako John Bonhamen eragin berezia jaso duela. Bere burua eskaini zuen 2007an Londresko O2 Arenan Led Zeppelin-en bateria jotzeko, baina azkenean Bonhamen semeak hartu zuen lan hori. John Paul Jones eta Jimmy Pagek Grohl eta Taylor Hawkinsekin batera, Led Zeppelinen bi abesti jo zituzten 2008an Wembley Stadiumean Foo Fighters-en kontzertu batean. Talde moduan, Queen-ek ere eragin handia izan du Grohlengan. Davek talde horrekin VH1 Rock Honors saria jaso zuen eta 2001ean jo zuen.

Wikimedia Commonsen badira fitxategi gehiago, gai hau dutenak: Dave Grohl