Alexandros Svolos (grezieraz: Αλέξανδρος Σβώλος; Kruševo, 1892 – Atenas, 1956ko otsailaren 22a) greziar politikaria izan zen.
Kruševon jaio zen, Otomandar Inperioan (gaur egun Ipar Mazedonia), eta aromaniar etniakoa zen. 1911-1912an Konstantinoplan zuzenbidea ikasi zuen eta ondoren Atenasko Unibertsitatean. 1915ean unibertsitate honetako irakasle izendatu zuten. 1917tik 1920ra Ekonomia ministerioko lan eta gizarte saila zuzendu zuen eta Lanaren Nazioarteko Erakundearen arauak berresten lagundu zuen.
Ondoren, armada greziarrak okupatutako Bursa hiriko administratzaile izendatu zuten. 1929tik 1946ra Zuzenbide Konstituzionaleko katedraduna izan zen, baina ezkerreko ideiengatik barne-erbestera bidali zuten gobernu eskuindarren garaian.
Alemaniak Grezia 1941ean inbaditu ondoren, Svolos alemaniarren aurrean protesta egin zuenetako bat izan zen, Bulgariak Mazedonia eta Mendebaldeko Trazia bereganatu zituelako.
1944an ezkerreko gobernu bat eratu zen Grezia askatuan, Atenasko gobernu kolaborazionistaren eta erbesteko erregearen gobernuaren aurkakoa. Svolos 1944ko apirilean izendatu zuten gobernu horretako presidente, eta maiatzean Libanoko Konferentzian parte hartu zuen batasun nazionaleko gobernu bat osatzeko. Svolos gobernuaren buru izaten jarraitu zuen Grezia 1944ko urrian askatu arte. Gero Finantza ministro izan zen Georgios Papandreuren gobernuan.
Greziako zuzenbide konstituzionalean eta ideologia demokratiko eta sozialistan aditu handienetako bat izan zen.
