La serranía de Cuenca ye la zona montanyosa de lo nord-este de la provincia de Cuenca, en Castiella-La Mancha, que fa part d'una mesma rechión natural con la serranía d'Albarracín (Teruel). Corresponde con una macrocomarca homonima que incluye unas cuantas comarcas naturals mas chicas que no s'han convertiu en comarcas oficials.
Toponimia
L'oronimo serranía s'ha feito servir en aragonés medieval pa nombrar unas cuantas zonas montanyosas como esta. Se fa mención especifica de la serranía de Cuenca y la zona mugant de lo Reino de Valencia en un texto sobre lo carmelita frai Pero de Tarragona, que en 1382 baixaba dende Castiel Fabib enta Valencia y pasó por Moya, a on que fue acusau de contrabando y li confiscoron las suyas posesions:
de
la Serranía e predicando la paraula de Dios, vino caso que pluvio en aquellas partidas e el dito freyre con su companyero se quisiesse venir aqui a Valencia a su monasterio con un asno cargado de muytas cosas,...
[1]Orografía
Las sierras de la serranía de Cuenca perteneixen a la branca castellana de lo Sistema Iberico. Son sierras d'esta serranía Bascuñana, Campalvo, Las Cuerdas, El Escornadero, las Majadas, Mira, Palancares, Santerón, Tragacet, Val de Meca, Val de Minguet, Valdecabras y Zafriella.[2]
Hidrografía
Parte d'esta serranía ye en la cuenca hidrolochica de lo río Tacho (río que naixe cerca) con los ríos Cuervo y Escabas travesando a parte norueste, abocando las suyas auguas en l'oceano Atlantico, pero atra parte ye en la versant mediterrania de la peninsula, con lo río Guadalaviar, Xúcar y los suyos afluyents entre los que destaca lo río Cabriuel.
Cheolochía
Los materials predominants d'estas sierras son calsineras de lo Mesozoico, a sobén karstificadas con torcas u dolinas. Tamién bi ha espectaculars foces, estreitos u canyons fluvio-karsticos.
Bi ha una representación de lo Paleozoico en los nuclios d'un anticlinorio alpín conoixiu como "Anticlinal de la Serranía de Cuenca", que s'estendilla dende Tragacet dica Chelva con direccions NO-SE.[3]
Vechetación
La vechetación predominant son los pinars. Tamién bi ha carrascals u carrascals-caixigars y sabinars.
Fauna
La caza mayor ye abundant y i habió una reserva de caza dende 1973 dica 2007, huei esta reserva de caza s'ha incluyiu en una demarcación mas gran dita Parque Natural de la Serranía de Cuenca.
Referencias
