Die beginpunt van die N1 sowel as die N2 is Nelson Mandela-boulevard in Kaapstad.Die N1 naby Vanderbijlpark.Die N1 soos mens Kaapstad inry, net verby Century City.Die N1 by die Hexrivierpas.Die N1 wat deur Midrand loop op pad na Johannesburg toe.
Die N1 begin as ’n snelweg in Kaapstad se sentrale sakegebied aan die noordereinde van Buitengrachtstraat, langs die ingang na die Victoria & Alfred Waterfront. Die eerste deel van die N1 word gedeel met die begin van die N2-snelweg; dit is 'n vierbaan verhewe snelweg wat loop oor 'n strook tussen die stadskern en die Kaapstad-hawe, noordoos verby Lugmagbasis Ysterplaat en Century City voor dit kruis met die N7 wat noordwaarts loop uit die stad na Namibië. Hierna beweeg dit noordoos uit die stad en ontmoet die M5-pad by die Koeberg-wisselaar, een van die hoof-arteriese roetes wat Milnerton met die Suidelike voorstede verbind.
Spitsverkeer op die N1 tussen die Koeberg-wisselaar en die Hugenotetonnel vind op weeksdae soggens en smiddags plaas. Die res van die N1 in die Wes-Kaap ondervind eerder oor bepaalde naweke of tydens sommige tydperke gedurende vakansieperiodes swaar verkeer, maar dra andersins matige verkeersvolumes.[2]
Verkeersongelukke
Die gevaarlikste trajek van die N1 in die Wes-Kaap is die roete tussen Laingsburg en Prins Albertweg, met ’n ongeluksyfer van 10,17 ongelukke per 100 miljoen kilometer gereis. Die tweede en derde gevaarlikse trajekte is onderskeidelik die roetes tussen Beaufort-Wes en Drie Susters, met 7,27 ongelukke per 100 miljoen kilometer gereis, en tussen die Hugenotetonnel en Worcester, met 6,67 ongelukke per 100 miljoen kilometer gereis.[2] Die veiligste trajek is die roete tussen die Koeberg-wisselaar en die Hugenotetonnel met ’n ongeluksyfer van 2 ongelukke per 100 miljoen kilometer gereis.[2] Hierdie statistieke kan vergelyk word met ’n nasionale gemiddelde ongeluksyfer van 11,7 ongelukke per 100 miljoen kilometer gereis in Suid-Afrika en 1,3 ongelukke per 100 miljoen kilometer gereis in die VSA.[2]
Die maand met die hoogste ongeluksyfer is Desember, wanneer vakansiegangers van die binneland via die N1 na Kaapse kusdorpe stroom.[2]
Vanaf die Oranjerivier hou die pad amper noordwaarts, gaan verby Springfontein, Trompsburg en Edenburg. Dit kruis dan die Rietrivier net voordat Bloemfontein bereik word. Hiervan is dit ’n snelweg wat wes om die stad lei (Bloemfontein Westelike verbypad). Net ná Bloemfontein gaan die N1 oor die Modderrivier, deur die Verkeerdevlei tolhek, ongeveer halfpad tussen Bloemfontein en Winburg, verder noord. Halfpad na Ventersburg word die Sandrivier gekruis. Die N1 gaan verby Ventersburg en is ’n snelweg verby Kroonstad, waar dit die Valsrivier oorsteek. Net suid van die Vaalrivier word die pad weer ’n snelweg verby Vanderbijlpark en Gauteng binnegaan. Waar die Vaalrivier gekruis word, is die Barrage net-net sigbaar aan die reisiger se regterkant.
Gauteng
Van duskant die Vaalrivier word die snelweg die "Kroonvaal Tolweg" genoem. Dit sluit dan by die Westelike Verbypad of "betonpad" aan. Net voor dié aansluiting, sluit die N12 eers by die N1 aan, dan noordwaarts na Pretoria waar dit die besigste pad in die Suidelike Halfrond vorm, nl. die Ben Schoeman-hoofweg, wat daagliks omtrent 300 000 voertuie tussen Johannesburg en Pretoria dra. Beide die N4 en N14 nasionale paaie sluit by die N1 aan. In Pretoria vorm dit die "Pretoria Oostelike verbypad" wat tot in Polokwane (Pietersburg) verleng. Halfpad tussen Pretoria en Bela-Bela (ou Warmbad) word die Limpopoprovinsie binnegery.
Limpopo
Die N1 hou reg noord, verby Bela-Bela, swaai dan noordoos, verby die Kranskop-tolhek tot by Polokwane. Die N1 kruis die Steenbokskeerkring sowat 53 km noord van Polokwane. Die pad gaan dan aan na Louis Trichardt (Makhado) en gaan oor die Soutpansberg via Wyliespoort, deur Musina voor dit by Beitbrug uitkom. By Beitbrug word die Limpoporivier gekruis. Na Beitbrug, word die pad nie meer die N1 genoem nie, omdat dit in Zimbabwe in beweeg.
_with_labels.svg)
