Gibran Rakabuming Raka, Kahiyang Ayu og Kaesang Pangarep
Háskóli
Gajah Mada-háskólinn
Starf
Stjórnmálamaður
Undirskrift
Joko Widodo (fæddur undir nafninu Mulyono þann 21. júní 1961), einnig kallaður Jokowi, er indónesískur stjórnmálamaður sem var sjöundi forseti Indónesíu. Hann var kjörinn í júlí árið 2014 og er fyrsti forseti landsins sem ekki á bakgrunn í stjórnmála- eða hernaðarelítu landsins. Hann var áður borgarstjóri Surakarta frá 2005 til 2012 og fylkisstjóri Jakarta frá 2012 til 2014.
Jokowi varð þjóðþekktur í Indónesíu árið 2009 vegna starfa sinna sem borgarstjóri Surakarta. Hann er meðlimur í Indónesíska lýðræðisbaráttuflokknum (indónesíska: Partai Demokrasi Indonesia Perjuangan eða PDI-P) og var frambjóðandi hans í fylkisstjórakosningum Jakarta árið 2012.[1] Jokowi sigraði sitjandi fylkisstjórann Fauzi Bowo[2] og tók við embættinu í október árið 2012. Jokowi hleypti nýju lífi í stjórnmál Jakarta með óvæntum eftirlitsferðum sínum til ríkisstofnana borgarinnar[3] og með umbótum sínum til að taka á spillingu í stjórnsýslukerfi borgarinnar. Sem borgarstjóri kom hann á almennri heilbrigðisgæslu fyrir borgarbúa, hreinsaði stærsta fljót borgarinnar til að koma í veg fyrir flóð og hóf byggingu á neðanjarðarlestakerfi.[4]
Jokowi, sem þá var álitinn rísandi stjarna í indónesískum stjórnmálum, var útnefndur forsetaframbjóðandi Lýðræðisbaráttuflokksins fyrir kosningarnar árið 2014.[5] Jokowi vann meirihluta atkvæða í kosningunum þann 22. júlí sama ár.[6][7]
Sem forseti hefur Jokowi einbeitt sér að uppbyggingu innviða og hefur hafið eða endurvakið ýmis verkefni til að byggja hraðbrautir, hraðlestarlínur, flugvelli og fleiri samgöngur til að tengja indónesíska eyjaklasann betur saman.[8] Ríkisstjórn hans hefur einnig lagt áherslu á að „vernda fullveldi Indónesíu“ með því að sökkva erlendum skipum sem veiða fisk ólöglega innan landhelgi landsins[9] og láta eiturlyfjasmyglara sæta dauðarefsingu þrátt fyrir mótmæli erlendra ríkja eins og Frakklands og Ástralíu.[10] Jokowi nýtur talsverðra vinsælda meðal Indónesa og var endurkjörinn árið 2019.[11]
