PROFILPELAJAR.COM

Terra Galega (Tega)
	Partido político de Galiza
Dirixentes e organización
Líder	Guillermo Sánchez Fojo; (Presidente); Pablo Padín; (Presidente de honra)
Historia
Fundación	4 de novembro de 2005
Posicións políticas
Ideoloxía	Galeguista; Centrismo progresista
Representación
Representación	sen representación parlamentaria
Concelleiros	10 / 3.766
Alcaldes	1 / 313
Outros datos
Sede	Vigo
Publicación	www.maisgalicia.eu/
Na rede
	http://www.terragalega.eu
	v; c; e;

Terra Galega (Tega) é un partido político de centro progresista e galeguista que se formou o 4 de novembro de 2005, aínda que está rexistrada dende maio dese ano.

Historia

Xurdiu da unión do Centro Democrático Independiente (CDI), Iniciativa Galega, Coalición Galega, Unidade por Narón e algunhas outras pequenas forzas locais que sumaban 4 alcaldes e 64 concelleiros en 32 concellos galegos; os estatutos de Terra Galega permiten a existencia de partidos federados no seu seo. No ano 2010 sufriu unha forte escisión, na que o seu Secretario Xeral Xoán Gato e gran parte da militancia abandonaron o partido para incluírse na formación Converxencia Galega.^[1]

Celebrou o Congreso Constituínte o 20 de maio de 2006 coa participación de 500 compromisarios que elixiron a Pablo Padín, exconselleiro de sanidade, como presidente e a Xoán Gato, alcalde de Narón, como coordinador xeral. Guillermo Sánchez Fojo foi elixido como Vice-Coordinador Zona Norte, Xosé Luis Vilas Martín como Vice-Coordinador Zona Sur, Marian Ferreiro Díaz como Coordinadora Nacional da Mocidade. As xuventudes do partido reciben o nome de Mocidade de Terra Galega.

En outubro de 2006 Unión Ourensana integrouse na coalición e tamén 6 dos doce concelleiros do Partido Popular de Galicia en Arteixo. Nas eleccións municipais de 2007 presentou 63 candidaturas, sobre todo na provincia da Coruña, e acadou 66 concelleiros. O 12 de xullo de 2008 celebrou o seu II Congreso, no que Pablo Padín saíu reelixido presidente e Xermán Tobío novo secretario xeral^[2]. Non obstante, o sector liderado por Xoán Gato impugnou o Congreso e conseguiu que, o 23 de agosto seguinte, o xulgado suspendese de forma cautelar os acordos tomados no mesmo, co que este recuperou o seu cargo de coordinador xeral ^[3]. A Xunta Electoral permitiu a Xoán Gato presentarse ás eleccións autonómicas levando as siglas de Tega, tendo que ir o outro sector do partido nunha coalición co Partido Galeguista chamada Máis Galicia.

O 27 de marzo de 2009 a xustiza deu a razón a Tobío e a Padín, desestimando a demanda presentada por Xoán Gato e outros. O sector de Xoán Gato convocou unha asemblea para o 25 de abril, para acordar se se integran no partido Terra galega ou forman un novo^[4]. Finalmente, en setembro de 2010 celébrase a asemblea constituínte de Converxencia Galega, o novo partido de Xoán Gato. No III Congreso celebrado o 10 de marzo de 2012 elixiu como secretario xeral a Guillermo Sánchez Fojo quedando Pablo Padín como presidente de honra ^[5].

Resultados electorais

En 2007 nas súas primeiras municipais obtiveron 3 alcaldías e 66 concelleiros, mellorando en 2 concelleiros os anteriores resultados dos membros da coalición situándose como cuarta forza política por enriba de EU. Os membros da coalición en 2003 tiñan: 24 concelleiros(CDI), 15(IG), 13(UN) e 12(CG).

En 2009 situáronse como quinta forza política detrás de UPyD.^{[Cómpre referencia]}

En 2011 obtiveron 1 alcaldía e 23 concelleiros.

Nas municipais de 2015 quedaron no sexto posto, cun total de 29 concelleiros e o 0,97 % do voto galego total, xusto por detrás da candidatura galeguista socialdemócrata: Compromiso por Galicia.

Nas municipais de 2019 quedaron no 12º posto, tiveron unha caída de 11 concelleiros rematando con 18 concelleiros e o 0,66 % do voto galego total. TEGA rematou por detrás do seu vello socio Compromiso por Galicia e de Compostela Aberta.

En 2023 TEGA experimentou outro notorio descenso perdendo 8 concelleiros, subindo pola desaparición doutras forzas que non concorreron a sexta forza municipal máis votada en Galicia cun 0,5 % do voto galego total. Democracia Ourensana e Alternativa dos Veciños quedaron por diante da organización.