PROFILPELAJAR.COM

Saleta Fernández López
Biografía
Nacemento	15 de xullo de 1997 (27 anos); Monforte de Lemos, España
Residencia	Santander
Actividade
Ocupación	saltadora de altura
Deporte	atletismo
Adestrado por	Ramón Torralbo ; Ruth Beitia
Membro do equipo deportivo	A Gándara, Ría de Ferrol, F.C. Barcelona, València Esports

Para outras páxinas con títulos homónimos véxase: Saleta Fernández.

Saleta Fernández López, nada en Monforte de Lemos o 15 de xullo de 1997, é unha atleta galega especializada en salto de altura.^[1]

Foi tres veces campioa de España absoluta (dúas en pista cuberta e unha ao aire libre) e na actualidade posúe o récord galego de altura, con 1,90 m. Tras pasar por varios clubs, actualmente compite co València Esports.^[2]

Traxectoria

Saleta Fernández naceu en Monforte e fixo os seus primeiros estudos no colexio de A Gándara desta localidade, onde un profesor, Filipe Barata, apaixonado do atletismo, creou un club no colexio. A partir do ano 2009 Saleta comezou a gañar medallas, a primeira na categoría infantil a nivel galego e, a continuación, xa empezou a ir a campionatos nacionais.^[3]

En idade xuvenil, aos 16 anos, trasladouse ao Centro Galego de Tecnificación Deportiva de Pontevedra, do Consello Superior de Deportes de España, onde estudou o bacharelato.^[4] Alí saltou 1,75 m. Pero, debido a que neste Centro non había un equipo de saltos, e non adestraba adecuadamente, por consello de Ruth Beitia, á que coñeceu nunha concentración da selección absoluta de España, trasladouse a Santander para adestrar con ela e co seu adestrador Ramón Torralbo. A olímpica Beitia falou cos pais de Fernández e acolleuna na súa casa.^[3]

En 2014 proclamouse campioa galega tanto en pista cuberta como ao aire libre e foi seleccionada para os Xogos Olímpicos da Xuventude.^[5]^[6]^[7]^[8]

O 18 de febreiro de 2018 proclamouse campioa de España absoluta en pista cuberta en Valencia, cun salto de 1,82 m.^[9] Cinco meses despois gañou tamén a medalla de ouro no Campionato de España de Atletismo Sub-23, celebrado en Soria.^[10] O 31 de agosto de 2019 saltou 1,90 m no Campionato de España ao aire libre disputado en La Nucía, conseguindo o ouro e batendo o récord galego que ela mesma posuía.^[11] Tras varias medallas de prata, en febreiro de 2022 sumou o seu terceiro título absoluto de España, conseguindo o ouro en pista cuberta Ourense con 1,85 m.^[12]

Despois de superar unha lesión, en febreiro de 2023 gañou a medalla de prata no Campionato de España en Pista Cuberta celebrado en Gallur, Madrid,^[13] resultado que repetiu ao ano seguinte en Ourense, en ambas ocasións por detrás de Una Stancev.^[14]

Estudou mercadotecnia, publicidade e relacións públicas na Universidade de Cantabria.^[3]

Mellores marcas

Data	Especialidade	Lugar	Marca ^[15]
7 de xuño de 2018	Salto de altura (aire libre)	Soria	1,86 m ^[16]
11 de febreiro de 2018	Salto de altura (pista cuberta)	Salamanca	1,84 m

Participacións en campionatos en 2018

Aire libre

28 de abril de 2018, Campionato de España de Atletismo (clubs), Valencia, 1,78 m
19 de maio de 2018, Campionato de España de Atletismo, (clubs), San Sebastián, 1,85 m
27 de maio de 2018, Campionato de Europa de Atletismo Sub-23, Birmingham, 1,76 m
2 de xuño de 2018, Los Corrales de Buelna, 1,86 m
10 de xuño de 2018, Xogos Mediterráneos Sub-23, Jesolo (Italia), 1,76 m
16 de xuño de 2018, Campionato de España de Atlñetismo (clubs), Castelló, 1,78 m
7 de xullo de 2018, Campionato de España de Atletismo Sub-23, Soria, 1,86 m
21 de xullo de 2018, Campionato de España de Atletismo (clubs), Getafe, 1,71 m ^[17]

Pista cuberta

14 de xaneiro de 2018, San Sebastián, 1,76 m
27 de xaneiro de 2018, Campionato de España de Atletismo en pista cuberta (clubs), Valencia, 1,80 m
8 de febreiro de 2018, Meeting de Atletismo en pista cuberta, Madrid, 1,75 m
11 de febreiro de 2018, Campionato de España de Atletismo Sub-23 en pista cuberta, Salamanca, 1,84 m
18 de febreiro de 2018, Campionato de España de Atletismo en pista cuberta, Valencia, 1,82 m ^[17]

Progresión

Aire libre

Ano	Lugar	Data	Marca ^[18]
2018	Los Corrales de Buelna	2 de xuño de 2018	1,86 m
2017	Barcelona	23 de xullo de 2017	1,83 m
2016	Coslada	10 de xullo de 2016	1,76 m
2015	Xixón	22 de xullo de 2015	1,73 m
2014	Bakú	30 de maio de 2014	1,77 m
2013	Utrecht	18 de xullo de 2013	1,75 m

Pista cuberta

Ano	Lugar	Data	Marca ^[18]
2018	Salamanca	11 de febreiro de 2018	1,84 m
2017	Salamanca	19 de febreiro de 2017	1,83 m
2016	Madrid	6 de marzo de 2016	1,83 m
2015	Valencia	8 de marzo de 2015	1,71 m
2014	A Coruña	12 de xaneiro de 2014	1,76 m
2013	A Coruña	9 de febreiro de 2013	1,67 m

Recoñecementos

O 2 de abril de 2018 Saleta Fernández foi recibida no concello de Monforte, antes da Feira Medieval, para recibir das mans do alcalde José Tomé Roca unha réplica do emblemático edificio dos Escolapios como recoñecemento aos méritos deportivos acadados; entre eles o recente Campionato de España de salto de altura. O alcalde aproveitou a ocasión tamén para pedirlle que asinase no libro de honra do consistorio e lembrou que co acordo acadado por unanimidade no pleno anterior as pistas de atletismo da Pinguela levarán o seu nome, e que en breve se colocará unha placa para tal fin. Saleta tivo palabras de agradecemento ao Concello, ao club e aos familiares presentes no acto por recoñecer non só os méritos e medallas que se acadan, senón tamén o traballo e o esforzo que hai detrás deles. Así mesmo agradeceu que se pensase nela para que as pistas leven o seu nome e indicou que aínda que lle parecía «excesivo» este mérito ía estar moi orgullosa desta honra.^[19]

Efectivamente, os concelleiros do grupo dos Non Adscritos do concello de Monforte propuxeron que as pistas de atletismo da Pinguela levasen o nome de Saleta Fernández. A proposta saíu adiante no Pleno co voto favorábel de todo os grupos municipais. E o 7 de agosto de 2018 o alcalde, José Tomé, e a atleta monfortina descubriron unha placa nestas intalalcións deportivas, acompañados de familiares, amigos e membros da corporaración.^[20] Saleta manifestou:

"Cando me falaron da proposta, a primeira sorprendida fun eu, pero a verdade é que estou moi orgullosa deste recoñecemento e de que as pistas leven o meu nome".^[20]