Cabo Silleiro

Tipo	cabo península
Localización
División administrativa	Baredo, España
42°06′44″N 8°53′57″O / 42.1123, -8.8993

O cabo Silleiro^[1], é un cabo situado no suroeste de Galicia, na parroquia de Baredo (Baiona), que pecha a ría de Vigo polo sur, marcando o inicio das Rías Baixas cara ao norte. É o punto máis ó norte da costa de Baredo a Camposancos.

O Faro de cabo Silleiro, construído en 1866, ten unha altura de 9 metros sobre o chan e 85 sobre o nivel do mar, cun alcance de 30 millas.^[2]

Na década de 1940 construíuse na zona, a batería de artillaría costeira J4,^[3] con 200 metros de galerías subterráneas conectando catro pezas de artillaría Vickers modelo 1923 de 152,4/50mm de 1943, fabricados pola Sociedad Española de Construcción Naval en Reinosa, co obxectivo de protexer o porto de Vigo e a entrada á vila de Baiona.^[4]

A base foi abandonada durante os anos noventa. En 1998 retirouse o perímetro de seguridade. As intalacións pertenceron ao Ministerio de Defensa de España^[5] ata o ano 2021, cando, tras trinta anos de negociacións, as mercou o Concello de Baiona por 370.000 €.^[4]

Na súa costa hai moitos relevos:

• Illas: A Carral, A Negra e as Polveiras.
• Enseadas: Fornos, O Baleal, A Cova de Baredo (Os Loureiros), Pedra Alta e Tío Andrés.
• Puntas: O Peso, Niño do Corvo, Os Mouróns (Petóns de Fornos), Serreira e O Monete.
• Marcas e demais: O Lobo, O Lobiño, A Aguieira e O Cunchido.

Nas augas de cabo Silleiro afundiron dous barcos: o ABC e o Collingham (chamado polos baioneses O Cunichán).^[cando?][6]

Wikimedia Commons ten máis contidos multimedia na categoría:  Cabo Silleiro

• Península de Monterreal

• ORDEN 173/1998, por la que se suprimen diversas zonas de seguridad de instalaciones militares... Arquivado 05 de marzo de 2016 en Wayback Machine. BOE (en castelán).