PROFILPELAJAR.COM

Saint-Cergue
	Blazono de Saint-Cergue
	Blazono de Saint-Cergue
	Preĝejo de Saint-Cergue
	Preĝejo de Saint-Cergue
komunumo en Svislando
Kantono	Vaŭdo
Distrikto	Nyon
Koordinatoj	46° 26′ 45″ N 6° 9′ 29″ O / 46.44583 °N, 6.15806 °O (mapo)Koordinatoj: 46° 26′ 45″ N 6° 9′ 29″ O / 46.44583 °N, 6.15806 °O (mapo)
Nombro de loĝantoj	2147
Areo	24,28 km²
Alteco	1041 m super marnivelo
Poŝtkodo	1264
Komunumkodo	5727
	Mapo de Saint-Cergue
	Situa mapo de Saint-Cergue
	v • d • r

Ne konfuzu ĉi tiun artikolon kun Saint-Cergues.

Saint-Cergue estas komunumo en la distrikto Nyon en Kantono Vaŭdo, Svislando. Ĝi havis 2147 loĝantojn je la 31-a de decembro 2012.

Geografio

La komunumo Saint-Cergue situas en la Ĵurasa Montaro. La komunumo konsistas el la vilaĝoj Saint-Cergue kaj La Cure (ĉe la franca landlimo), kaj la setlejoj Les Chesaux, La Chenalette, Les Pralies, Guinfard kaj Les Mouilles, kaj diversaj izolitaj bienoj.^[1]

La teritorio de la komunumo etendiĝas sur areo de 24,28 km², de kiuj 61,9% estas kovritaj de arbaro, 31,5% servas por agrikulturo kaj 5,8% por setlado. ^[2]

Najbaraj komunumoj

La komunumo Saint-Cergue limas en nordo al Arzier-Le Muids, en oriento al Givrins, en sudoriento al Trélex, en sudo al Gingins, en sudokcidento al Prémanon (Franĉ-Konteo, Francio), kaj en okcidento al Les Rousses (Franĉ-Konteo, Francio).

Trafiko

Tra Saint-Cergue pasas la kantona ĉefvojo n-ro 123 de Nyon al Les Rousses en Francio. Kaj de Saint-Cergue la kantona vojo n-ro 125 kondukas al Arzier. La plej proksima alveturejo al la svisa aŭtovojo A1 situas 10 kilometrojn sudsudoriente de la komunumo apud Nyon. Pere de la mallarĝspura fervojlinio de Nyon al La Cure, kiu ĝis 1958 kondukis ĝis al Morez en Francio, la komunumo estas konektita al la publika transportreto.

Historio

La unua dokumenta mencio de Saint-Cergue datiĝas el la jaro 1110 per la vortoj ecclesiam Sancti Cyrici. Sur la komunuma teritorio estis trovitaj restaĵoj de romia setlejo kaj tombokampoj el la La-Tène-epoko kaj la frua mezepoko. Ekde la jaro 1110 la regiono apartenis al la Abatejo Saint-Claude, kiu ĝin koncedis en la jaro 1279 kiel feŭdo al la Senjoroj de Thoire-Villars. Tiuj senjoroj konstruis en la jaro 1299 burgon, kiu estis detruita dum la Burgonjaj Militoj. En la jaro 1350 la abatejo koncedis la subvoktejon Saint-Cergue al la familio de Chalon kaj garantis en la jaro 1357 per letero liberecojn al la civitanoj. En la jaro 1412 la Grafoj de Savojo konkeris la burgon por kontroli la pasejon. En la 15-a jarcento la jurisdikcio pri la regiono estis koncedita al la savoja subvokto de Nyon, dum la rajtoj de la subvokto de la Abatejo Saint-Claude estis limigitaj al la urbeto Saint-Cergue. Saint-Cergue apartenis sub la berna regado de 1536 ĝis la Helveta Revolucio de 1798 al la Voktejo Nyon kaj ekde la Helveta Revolucio, ĝi estas komunumo de la Distrikto Nyon.^[3]