La serreta d'el Corral Nou ye una aliniación montanyosa con dirección NE-SW que fa part de la unidat morfoestructural dita "serranías marguinals" de lo Sistema Iberico teruelano. Se troba en la part oriental de la provincia de Teruel en la comarca de lo Matarranya.
La superficie de la serreta d'el Corral Nou perteneixe a los termins municipals de Beceit, Cretas y Val de Robres.
Altarias
La cima mes vistable y caracteristica ye lo tozal d'en Querol con bels 782 m, pero ye mes alto lo Brosquill (823 m).[1]
Cheolochía
La serreta del Corral Nou ye formada por uns materials terrichenos d'edat eocena y oligocena que cerca de Matarranya se presentan baixo un cabalgamiento de materials churasicos y cretacios.
Los materials cenozoicos (eocenos y oligocenos en conchunto) corresponden a lo costau norueste d'un plego anticlinal que tiene lo suyo eixe en lo cuello d'en Selma y lo costau sud-este dillá d'este cuello en Penyagalera. Los materials oligocenos presentan un cambio lateral de facies dende almendrons de marguin de cuenca dica lutitas y salagons de posicions mes centrals.
Lo cabalgamiento mesozoico recibe la denominación d'"unidat de Foz Espalda",[2] u "unidat Periganyol".[3] u "anticlinal cabalgant de Val de Robres",[4] y contina dilla de lo río Matarranya por las sierras de l'Arca y d'el Cavaller.
Hidrografía
La versant sud-este desaugua enta lo río Ulldemó, que caye en Matarranya auguas enta baixo de Beceit. La versant norueste desaugua enta barrancos tributarios de Matarranya como lo río Sec y Matallops. La versant nord-este desaugua enta lo río Algars.
Referencias
Bibliografía
