Kaester

Kaester Caëstre

Kaester in 't arroundissement Duunkerke
Geografie
Regio	Hauts-de-France
Departement	Noorderdepartement
Arroundissement	Duunkerke
Kanton	Belle
Coördinoatn	50°45′NB 2°36′OL
Ippervlak	10.2 km²
Inweuners
Inweuners Bevolkiengsdichtheid	1979 (2022) 173 inw./km²
Andere
Burgemêester	Jean-Luc Schricke 2020-2026
Postcode	59190
Webadres	Officiëln site

Kaester^[1] of Koaster (/kɔːstər/) (Frans: Caëstre, Nederlands: Kaaster) es e gemêente in Vrankryk in 't Noorderdepartement. 't Ligt in Frans-Vloandern in 't Houtland.

Geografie

't Grenst an de gemêentn Eke, Vleeter, Pradeels, Borre, Haezebroek, Oundegem en Sint-Silvester-Kapel.
In de gemêente liggn ôok nog de gehuchtjes Den Busseboom, Den Poopelier en 't Roo Kruus.

Geschiedenisse

Toponymie

De noame van de gemêente es geduurende d'historie ip verschillige maniern vermeld gewist. G'attesteerde noamn zyn:

1174: Castris
1328: Le Caestere
1335: Castres

Legende van de drie moagdn

't Groundgebied van Kaester es ôok de settienge van e religieuze legende. In 't joar 851 zou'n der drie vrêe gelôovige jounge meistjes, na da ze vertelln de drie dochters van keunienk Kewulf van Wessex, ip bedevoart gewist zyn na de groavn van d'Illige Petrus en Paulus in Rome. Achter da ze Grôot-Brittannië verloatn ad'n en 't Kanoal ad'n oovrgestookn, kwoamn ze an land by Mardyk en paktn ze d'oude Romeynsche heirboane die richtieng Atrecht gienk. Achter da ze langs Kassel gepasseerd woarn, wierdn ze in en bus woar da nu de gemêente Kaester ligt, oovrvolln en ip wrêede wyze vermôord deur struukrovers. Te zelfdn tyd a nie verre doavan d'hêre van Stroazele, nen blendn ridder, e verschynienge woargenoomn van de moagd Maria. Zy zei da tie em na de plekke moeste goan woarda de drie meistjens vermôord woarn en da tie me under bloed in zyn oogn moeste frottn en da tie ton were zo kunn'n ziene. De ridder volgde de road van Maria en koeste ezo were zien en uut dankboareyd bouwde die e kapelle ter êere van de drie vermôorde meistjens. De kapelle wierd e plekke van vereerienge en vanof de neegnde êeuwe wos ter ieder joar e bedevoart vo Maria oar genoade.

Tempelierscommanderye

De Tempeliers adn in Kaester e commanderye, die achter d'ofschaffienge vande Tempeliersorde in 1312 oovrgienk na d'Orde van Malta. D' oeve wierd in den Êestn Weireldoorloge in 1918 bikkans hillegans verwoest, mo toch zyn der nog gedeeltes bewoard uut 1570 (e muurvlak me deure en e vèister) en 1746 (e toegangspôorte). Oloewel da ze dêels ligt ip 't groundgebied van de gemêente Eke es de commanderye van d'Orde van Malta genoemd en gekend lyk la Commanderie de Caestre.