Steenwerk (Frans: Steenwerck) is een gemêente in Vrankryk in 't Noorderdepartement. 't Ligt in Fransch-Vlaenderen in de Leiedaele. De Leie strôomt langs de zuudgrenze van de gemêente en twèis deur 't stadje lôopt de Grote Beke, die uutmoundt in de Leie.
Geografie
Steenwerk grenst an de gemêentn Belle, Niepkerke, Erkegem an de Leie, Sailly an de Leie, Stegers en Zoetestede.
Deur't middn van 't groundgebied van Steenwerk passeert d'yzerboane vo den TGV tusschn Rysel en Kales en an den nôordkant lôopt d'yzerboane vo de geweune trings tusschn Rysel en Haezebroek en stoat de staesje van Steenwerk. Steenwerk stoat ôok in verbiendienge me Rysel en Duunkerke via de ottostrade A25 die deur de gemêente lôopt.
Geschiedenisse
Steenwerk es gesticht gewist deur de Frankn en wierd vo den êestn kêe vermeld in 1160 lyk Steinwerc. Derachter es de noame nog geciteerd gewist op verschillige schryfwyzn: in 1182 lyk Estenwerck, in 1260 lyk Stuuinwercke, in 1331 lyk Steinwerck en in 1332 lyk Steenwerc. In dien tyd wos ter ôok e redelyke commerce in Steenwerk langsn de Grote Beke die gekanaliseerd wos en veurzien van sluuzn. Textielwevers leverdn ulder loakn in't center van't stadje wa ton langsn de Leie noar Armentiers wierd gebrocht vo verder te verandeln. Der wos ôok e redelijke commerce van en noar Belle. Bystn den Êestn Weireldoorloge es Steenwerk hillegansn verwoest gewist.
Bezienswoardigeedn
- De Sent-Jan-den-Dooperskerke die in 1923 achter de verwoestinge van d'oude kerke in den Êestn Weireldoorloge erbouwd es gewist. D'ôorsprounkelyke kerke wos ol vermeld in de twoalfde êeuwe.
- De kerke van de Ouze-Lieve-Vrouwe van de zeevn smartn uut de neegntiende êeuwe in 't gehucht La Croix du Bac.
- 't Vlamsch huus in neogothischn styl die gebouwd es an 't ende van de neegntiende êeuwe (round 1890) in ipdracht van Pierre Dutrie die zelve zot wos van't uutzichte van Brugge.
- 't Stadhuus van 't joar 1856
- 't "Musée de la Vie rurale"
- 't "Deutscher Soldatenfriedhof Steenwerck" me de groavn van 2048 Duutsche soldoatn uut den Êestn Weireldoorloge. De mêeste van die dôo zyn gevolln byst den Vierdn Slag om Ieper in april 1918 en in de periode derachter tout in oest 1918.
- Drie Britse begroafplekkn:
- 't Croix-du-Bac British Cemetery
- Le Grand Beaumart British Cemetery
- 't Trois Arbres Cemetery
-
De kerke van Steenwerk
-
't Vlamsch huus
.svg)
