Baldur's Gate II: Shadows of Amn

Baldur's Gate II: Shadows of Amn es un videojuec desvolopat per Bioware e editat per Black Isle Studios. Es la seguida de Baldur's Gate e sortèt sus Microsoft Windows en setembre de 2000. Coma son predecessor, lo juec es basat sus l'univèrs dei Reiaumes Oblidats e sus lei reglas de AD&D 2^a Edicion. Utiliza lo motor de videojuec Infinity Engine, ja utilizat per lo premier òpus e per d'autrei juecs de Black Isles coma aquelei de la seria deis Icewind Dale.

Lo començament de Baldur's Gate II a luec rapidament après leis eveniments de Baldur's Gate e contunia l'istòria dau protagonista, lo fiu adoptiu de Gorion, que son eiretatge unic de fiu dau dieu Bhaal atira l'atencion dau masc Jon Irenicus, elfe descaigut e maudit. L'intriga es basada sus lei rescòntres e leis afrontaments entre lo protagonista e Jon Irenicus. Se debana dins la region d'Amn e de la ciutat d'Athkatla, au sud de la vila de Baldur's Gate ont aviá luec lo racònte dau premier òpus de la seria.

Lo juec recebèt un acuèlh critic fòrça favorable e unei jornaus de la premsa especializada li donèron lo títol de juec de ròtle de l'annada 2000. Mai de dos milions d'unitats foguèron vendudas e una expansion intitulada Baldur's Gate II: Throne of Bhaal sortèt lo 21 de junh de 2001. Apondèt un gròs donjon suplementari e una conclusion a l'istòria dau protagonista e dei Fius de Bhaal. Una version modernizada intitulada Baldur's Gate II: Enhanced Edition foguèt anonciada en 2012 e publicada lo 15 de novembre de 2013.

Baldur's Gate II: Shadows of Amn es un juec de ròtle informatic basat sus lei reglas de AD&D 2^a Edicion. La quista centrala dau juec dura environ una seissantena d'oras e lo juec complèt, inclusent lei quistas segondàrias, dura aperaquí 300 oras^[1]. Lo jogaire contrarotla un grop que pòu agantar sièis personatges, compres lo protagonista^[2]. Lo protagonista es lo personatge centrau car sa mòrt obliga de cargar una partida enregistrada o de tornar començar una campanha. Lo juec comença ambé la creacion dau protagonista a travèrs una seria d'ecrans de configuracion permetent de chausir sa classa de personatge, sei caracteristicas, son aparéncia e son alinhament^[3]. Un personatge ja existent pòu tanben èsser importat de Baldur's Gate o de son extension^{[2] [4]}. Puei, dins l'univèrs dau juec, lo protagonista pòu recrutar certanei personatges non jogaires (PNJ) per formar e completar son grop. Aquelei PNJ viatjan ambé lo protagonista e interagir amb eu o ambé leis autrei personatges dau grop entraïnant de dialògs, de romanças o de quistas especificas^[5].

L'accion dau juec es vita amb una perspectiva isometrica e l'ecran, que necessita pas d'èsser centrat sus lo protagonista, pòu èsser desplaçat ambé la soritz o lo clavier. La zòna de juec es desvelada ambé son exploracion per lei personatges dau grop dau protagonista. Una nèbla de guèrra esconde lei regions exploradas que se situan en fòra dau camp de vista dei personatges. Dins lo corrent de l'exploracion d'una zòna, lo jogaire pòu definir e modificar la formacion adoptada per son grop. Per quitar una zòna e intrar dins un autre sector dau juec, fau clicar sus una zòna de sortida (escaliers, pòrtas...) que permet de cargar la zòna novèla. Una carta dau Mond permet tanben au jogaire de se desplaçar sus de distàncias lòngas en seleccionant dirèctament sa destinacion.

Leis interaccions ambé leis autrei personatges o ambé leis objèctes necessitan de clicar dessüs. Lo desplaçament d'un personatge o d'un grop necessita de clicar sus la destinacion d'arribada desirada. L'accion dau juec a luec en temps reau mai se pòu totjorn far una pausa per estudiar una situacion o donar d'òrdres^[5]. Lei dialògs començan generalament amb un clic sus un personatge qu'es pas ostil o, de còps, son programats per començar dins una situacion donada. Pendent un dialòg, lo protagonista pòu generalament chausir entre unei respònsas diferentas dins una lista. Certanei dialògs marcan lo començament de quistas o permèton de descubrir d'informacions importantas. Clicar sus un personatge ostil dona l'òrdre au personatge seleccionat de l'atacar. Leis informacions regardant lei personatges, lei creaturas, certaneis objèctes o bastiments apareisson quand lo puntaire de la soritz es tengut dessüs.

Quand un personatge dau grop ganha l'experiéncia necessària, pòu ganhar un nivèu. L'experiéncia es ganhada gràcias a certaneis accions coma l'eliminacion d'enemics o l'acabament d'una quista. Lo grop a tanben una reputacion qu'es influenciada per leis accions e lei decisions dau protagonista. Aquela reputacion e lo carisme dau protagonista influencian lei relacions ambé lei PNJ. Lei personatges formant lo grop pòdon ansin se plànher o quitar lo grop (o de còps intrar en conflicte) se son alinhament s'aluncha tròp de la reputacion dau protagonista. Lo grop necessita tanben de far de pausas regularas per recuperar e dormir. Aquò permet de sonhar lei personatges bleçats o de memorizar de sòrts que pòdon èsser gitats après. D'efècte, lo juec a mai de 300 sòrts diferents. Franc dei mascs, lei personatges gitant de sòrts dèvon aperavans lei memorizar. Dins totei lei cas, gitar un sòrt prèn de temps e pòu èsser interromput per una ataca o un sòrt enemic.

Lo jogaire pòu accedir a unei sota-ecrans a travèrs l'interfàcia : lei cartas de zòna e dau Mond, lo jornau que permet de nòtar leis informacions importantas regardant lei quistas dau juec, la pagina d'inventari que permet d'equipar lei personatges, la pagina presentant lei caracteristicas de cada personatge dau grop, lo libre dei sòrts profans (utilizats subretot per lei magicians e lei mascs), lo libre dei sòrts divins (utilizats subretot per lei prèires) e la pagina d'opcions permetent de modificar certanei paramètres dau juec, d'enregistrar o de cargar una partida e de quitar lo juec.

Au començament dau juec, lo jogaire dèu chausir una raça e una classa de personatge basat sus lei reglas AD&D 2^a Edicion. I a sèt raças disponiblas que son uman, elfe, semi-elfe, gnòme, semi-òrca, halfelin e nan e que presentan d'avantatges e d'inconvenients. Franc deis umans, certanei raças permèton pas de chausir certanei classas de personatge. I a onze classas de personatge disponiblas que son guerrier, rodaire, paladin, raubaire, bard, magician, prèire, druida, barbar, monge e masc. Cada classa a de competéncias especialas e de restriccions. Per exemple, un raubaire pòu trobar e desamorsar una leca mai a de limitacions importantas regardant leis armas e leis armaduras que pòu utilizar. Dins certanei classas, existisse tanben d'especializacions qu'apondon d'avantatges e d'inconvenients suplementaris. Per exemple, lo chivalier es un paladin especializat dins lo combat còntra lei dragons o lei demons qu'a d'avantatges còntra aqueleis enemics mai pòu pas utilizar d'armas de trach. Dins lo corrent dau juec, lo protagonista pòu tanben venir lo mèstre d'un donjon qu'es definit per sa classa de personatge (un castèu per un guerrier, un teatre per un bard... etc).

Existisse un mòde multijogaire que permet de reünir sièis jogaires umans. Cada jogaire contrarotla un personatge creat o un personatge qu'es normalament un PNJ. Un jogaire incarna lo protagonista que son importància demora importanta (es a dire que sa mòrt necessita de cargar una partida enregistrada).

Lei Reiaumes Oblidats, onte se debana l'intriga de Baldur's Gate II, son un univèrs ficcionau basat sus un mond medievau onte lo fantatisc (creaturas imaginàrias, magia... etc) es una causa frequenta. La màger part de l'intriga a luec dins la region d'Amn que fa partida dau sota-continent de Fadaruna. La capitala Athkatla n'es la vila pus importanta. Es dirigit per lo Conseu dei Sièis, organizacion anonima que seriá formada per lei sièis marchands pus rics de la ciutat. Pasmens, parteja son poder ambé la guilda locala dei raubaires, lei Raubaires de l'Ombra, qu'a una influéncia fòrça importanta sus la vila, especialament lei quartiers paures. Aquela guilda dirigisse tanben d'operacions dins d'autrei vilas de la region coma Baldur's Gate. Enfin, la darriera organizacion poderosa de la region es lei Mascs Mascats que s'ocupa de la regulacion de la magia. Lei Raubaires de l'Ombra, lei Mascs Mascats e lei Joglars, un ret semi-secrèt d'aventuriers bòns o neutres, son lo centre d'unei quistas dau juec.

La vila d'Athkatla es lo centre d'una partida de l'istòria e es devesida entre sèt quartiers diferents (Quartiers Bas, Cementèri, Pònt, Pòrt, Caminada de Waukyne, Quartier Administratiu, Quartier dei Temples). Cada quartier presenta unei donjons esconduts. En fòra d'Athkatla, lo jogaire dèu tanben visitar l'illa de Brynnlaw e son asile de Spellhold, lei Fin Fons Sorns, la ciutat elfica de Suldanessellar e lo Plan Astrau^[2]. Pòu tanben anar dins lei Còlas d'Umar que son liadas a un temple malefic, dins lo fèu e lo castèu de l'Ostau De'Arnises, dins la vila de Trademeet, dins un bòsc sacrat dei Druids, dins lei Còlas de Windspear e dins una vila poblada de Sahuagins.

Lo juec se debana dins lo corrent de l'annada 1369 DR quauqueis annadas après lo Periòde dei Trèbols (1358 DR) entraïnat per lo raubament dei Tauletas dau Destin, un artefact magic poderós que permetiá de mantenir un equilibri entre lo Ben e lo Mau. En consequéncia, lo dieu Ao, divinitat suprèma dau panteon dei Reiaumes Oblidats, decidiguèt de castigar leis autrei dieus que foguèron obligats de venir d'èssers mortaus fins a la redescubèrta dei Tauletas. En despiech de sei poders, divèrsei dieus moriguèron o foguèron tuats dins lo corrent d'aqueu periòde.

Bhaal, lo dieu dau Murtre, ne'n fèt partida e foguèt tuat per un aventurier dich Cyric que venguèt un dieu après aqueu succès. Pasmens, sei capacitats de dieu deis assassins permetèron a Bhaal de preveire sa mòrt e d'organizar sa resureccion. Ansin, engendrèt uneis enfants que tenguèron una partida de son esséncia divina. Après la mòrt d'aqueleis enfants, que conoissèron generalament una vida agitada, aquela esséncia èra reünida au rèsta de l'arma dau dieu descaigut per permetre un jorn sa resureccion. Lo protagonista fa partida d'aqueleis enfants de Bhaal. Protegit per lo magician (e Joglar) Gorion, foguèt educat dins la fortalesa de Candlekeep. Li rescontrèt Imoen qu'èra tanben un enfant de Bhaal plaçada sota la proteccion de Gorion. Lo premier òpus conta l'assassinat de Gorion per un autre enfant de Bhaal, Sarevok, desirós de ressuscitar per captar lei poders dau dieu dau Murtre a son profiech e sa desfacha en fàcia dau protagonista.

L'istòria comença gaire de temps après la desfacha de Sarevok dins Baldur's Gate. Lo protagonista e sei companhons son capturats per d'ombras e l'eròi se derrevelha dins una gàbia^[5]. I venguèt l'objècte d'experiéncias magicas de part d'un masc dich Jon Irenicus. Pasmens, dins lo corrent de son estudi, Irenicus deguèt s'arrestar per defendre sa preson còntra l'ataca d'un grop de Raubaires de l'Ombra. Aquò permet au protagonista de s'escapar de la preson ambé lei subrevivents de son grop, compres Imoen. Arriba dins la vila d'Athkatla ont Imoen e Irenicus son arrestats per lei Mascs Mascats cargats d'aplicar la defensa d'utilizacion publica de la magia. Son teleportats au luench e estremats dins l'asile insuar de Spellhold. Pasmens, Irenicus aviá simulat sa desfacha dins lo corrent de son arrestacion. Capita de sortir de sa cellula puei chapla lei gardians de l'asila. Ne'n pren lo contraròtle e utiliza leis installacions dei Mascs Mascats per contuniar seis experiéncias.

D'aqueu temps, dins lei Quartiers Bas d'Athkatla, lo protagonista e son grop fan lo rescòntre d'un raubaire dich Gaelan Bayle que prepausa l'ajuda d'una organizacion poderosa, capabla de tornar trobar Imoen o Irenicus, en cambi de 20 000 pèças d'aur. Après, lo grop recebe una prepausicion similara de part d'una guilda rivala dirigida per un vampiri dich Bodhi. Lo jogaire es liure de chausir entre lei doas faccions mai quin que siegue son aliat, obtèn l'ajuda dau capitani Saemon Havarian per navegar fins a l'illa de Brynnlaw e l'asile de Spellhold. Lo protagonista e sei companhons capitan de passar lei defensas magicas de l'asila onte son capturats per Irenicus. Gràcias ai resultats de seis estudis, lo masc es capable de realizar un rituau magic li permetent de transferir l'arma d'Enfant de Bhaal dau protagonista vèrs son còrs. Aperavans, aviá fach una causa identica amb Imoen per donar son arma a Bodhi qu'èra en realitat son aliada. Puei, l'eròi e sei companhons son estremats dins un laberint de l'asile vengut lo terren de caça de Bodhi. Dins aquò, dins lo corrent de l'accarement entre lo grop e lo vampiri, Bodhi es suspresa e espaurida per la transformacion sobda dau protagonista que pren provisòriament l'aparéncia d'un avatar poderós dau dieu Bhaal (lo Pelaire). Aquò permet au grop de s'escapar dau laberint e de liberar lei presoniers de l'asile per atacar Irenicus qu'es finalament obligat de batre en retirada fins ai Fin Fons Sorns onte pòu se fisar d'una aliança ambé leis Elfes Negres de la ciutat d'Ust Natha.

Li es perseguit per lo protagonista e sei companhons que capitan de passar lei defensas deis Elfes Negres per agantar la superficia. Li fan lo rescòntre d'una armada d'Elfes de la vila de Suldanesselar. Aquela vila es atacada per Irenicus e seis aliats. Lei soudats elfes en fòra de la ciutat son a organizar una còntra-ataca mai a l'ora d'ara, son pas capables de passar lo blocus magic installat per Irenicus e lei mascs elfes negres a l'entorn de Suldanesselar. Una aliança es donc concluda entre lo protagonista e lo generau elfe Elhan que li demanda de trobar un artefact magic dich Rhynn Lanthorn. A la poissança necessària per rompre lo sòrt d'Irenicus mai es protegit per la guilda de vampiris de Bodhi. Après la recuperacion d'aquel objècte, lo protagonista pòu intrar dins Suldanesselar e agantar l'Aubre de Vida elfic. Irenicus a capturat la rèina de la vila e es a drenar l'energia de l'aubre per aumentar sa poissança e venir un dieu. Après una premiera batalha, es vencut per lo protagonista e seis aliats e leis armas dei combatents son atirats vèrs l'Infèrn. Un segond combat li a luec e s'acaba per la desfacha finala d'Irenicus e la recuperacion de son arma per lo protagonista.

• Jon Irenicus : masc malefic e antagonista principau. Elfe maudit e descaigut après un complòt mancat per venir un dieu, vòu s'emparar de l'arma divina dau protagonista per annular sa malediccion e assaiar tornarmai d'intrar au sen dau monde divin.
• Bodhi : sòrre d'Irenicus, participèt a son complòt mancat e conoissèt una deschasença identica. Per luchar còntra aquela malediccion, se transformèt en vampiri. Dins l'intriga, ajuda son fraire per s'emparar de l'arma divina d'Imoen.
• Gaelan Bayle : Raubaire de l'Ombra qu'es cargat per son cap Aran Linvail d'aprochar lo protagonista per prepausar l'ajuda de son organizacion còntra Irenicus.
• Aran Linvail : cap de la guilda dei Raubaires de l'Ombra e personatges fòrça poderós d'Athkatla. Es un enemic de Bodhi que pòu prepausar son ajuda còntra Irenicus e sa sòrre.
• Drizzt Do'Urden : eròi legendari dei Reiaumes Oblidats que pòu prepausar son ajuda per luchar còntra lei vampiris de Bodhi^[5].
• Elhan : generau elfe que s'alia ambé lo protagonista per rompre lo blocus magic de de la ciutat de Suldanesselar installat per Irenicus e intrar dins la vila.
• Ellesime : rèina elfica de Suldanesselar que foguèt a temps passat l'amanta d'Irenicus. Ajuda lo protagonista dins sa lucha còntra Irenicus.
• Saemon Havarian : pirata que comanda lo naviri permetent au jogaire d'anar sus l'illa de Brynnlaw. D'alinhament caotic neutre, es un aliat pauc fisable que cambia sovent d'aliança per servir seis interès.

• Aerie : elfe aisada prèire/magician d'alinhament leiau bòn. Capturat per de vendors d'esclaus, perdèt seis alas. Foguèt liberat per Quayle. Venguèt sa filha adoptiva e se convertiguèt a una divinitat dau panteon gnome. Dins lo juec, pòu venir amiga ambé Minsc, desvolopar una romança amb un protagonista masculin o ambé Haer'Dalis. S'opausa a Anomen e pòu quitar lo grop se Korgan ne'n fa partida.
• Anomen Delryn : guerrier/prèire uman leiau neutre equipat d'un bloquier eiretatge de son Ostau. Es un aprendís de l'Òrdre dei Paladins dau Còr Radiós que tèn sa pròpria quista personala liada a l'assassinat de sa sòrre e a la possibilitat de la venjar o non. Segon sa chausida, pòu venir paladin dau Còr Radiós e adoptar l'alinhament leiau bòn o quitar l'òrdre e adoptar l'alinhament caotic neutre. Dins lo juec, es l'unic personatge que permet de desvolopar una romança per un protagonista femenin. Dins lo grop, s'opausa a Aerie e a Keldorn s'es d'alinhament caotic neutre.
• Cernd : druide elfe neutre estricte. Presonier dins la vila de Trademeet, es cargat d'enquistar sus leis accions dei Druides de l'Ombra dirigits per Faldorn. Es equipat d'un baston e d'una capa magics. Sa quista personala es centrat sus son fiu menaçat per lo segond marrit (malefic) de son èx-frema.
• Edwin Odesseiron : magician uman leiau marrit, èra ja present dins Baldur's Gate. Fa partida dei Mascs Roges e, dins lo juec, se troba inicialament dins una guilda dei Raubaires de l'Ombra. Tèn un amulet magic e una quista personala centrat sus la recèrca d'un pergamin magic antic. Dins lo grop, s'opausa a Aerie, a Keldorn e a Valygar.
• Haer'Dalis : bard tiefelin caotic neutre. Capturat per un magician malefic, es equipat de doas espasas magicas. Après sa liberacion per lo protagonista, sa quista personala es centrada sus lo Teatre d'Athkatla. Dins lo grop, pòu desvolopar una romança amb Aerie. En causa d'una manca de temps, aqueu personatge foguèt parcialament desvolopat per lei creators dau juec e se pòu trobar divèrsei fichièrs non utilizats indicant de projèctes regardant una romança amb una protagonista femenina o una segonda quista personala.
• Imoen : raubaire/magician umana neutra bòna ja presenta dins Baldur's Gate, es lo premier personatge que compausa la còla dau protagonista. A l'origina, Imoen deviá morir dins lo corrent de l'evasion de la preson d'Irenicus au començament dau juec e un autre personatge, Nalia, deviá la remplaçar ambé de caracteristicas quasi similaras. Pasmens, en causa de la popularitat dau personatge au sen de la communautat deis afogats de Baldur's Gate, Imoen foguèt finalament gardada per lei creators mai aquò explica lo desvolopament limitat dei dialògs dau personatge après la premiera etapa dau juec.
• Korgan Bloodaxe : guerrier nan caotic marrit^[5]. Es equipat d'un destrau de guèrra magic e a una quista personala centrada sus la recèrca d'un libre magic. Dins lo grop, Aerie s'opausa a sa preséncia.
• Jaheira : guerrier/druida mieg-elfe neutra estricta que fa partida dei Joglars e que fa son aparicion tre la preson d'Irenicus au començament dau juec. Tèn una quista personala basada sus un complòt dei Joglars d'Athkatla dirigit còntra lo protagonista. Pòu tanben desvolopar una romança amb un protagonista masculin.
• Jan Jansen : raubaire/illusionista^[6] gnòme caotic neutre que tèn una panoplia complèta d'objèctes personalizats (coma una aubaresta especiala). Es un personatge excentric qu'a una quista personala centrada sus la malautiá de sa filha. Dins lo gro, a de dialògs comics ambé leis autrei personatges, especialament Minsc.
• Keldorn Firecam : inquisitor^[7] uman leiau bòn que tèn una armadura e una espasa magicas poderosas. Es un paladin de l'Òrdre dau Còr Radiós inicialament cargat d'enquistar sus la religion inquietanta qu'es apareguda dins lei conduchs d'Athkatla. Sa quista personala es centrada sus sei relacions ambé sa frema qu'es infidèla. En foncion de sa chausida, pòu quitar lo grop per viure tornarmai amb ela. Pòu tanben se venjar o la denonciar a la justicía e demorar dins lo grop. S'opausa a Viconia, a Edwin e a Anomen (dins lo cas d'una venjança d'Anomen après l'assassinat de sa sòrre).
• Mazzy Fentan : guerrier halfelina equipada d'una espasa e d'un arc magics e qu'a unei poders similars a aquelei d'un paladin. Enquistava sus lo Senhor de l'Ombra quand foguèt capturada. Sa quista personala es centrada sus la malautiá de sa sòrre.
• Minsc : rodaire uman caotic bòn ja present dins Baldur's Gate e disponible tre la preson d'Irenicus. A la capacitat Berserk dei barbars. A temps passat, recebèt una bleçadura grèva a la tèsta e es vengut parcialament fòl. Es l'amic d'un hamstèr e un adversari acarnat dau Mau. Dins lo grop, s'opausa a Edwin qu'èra l'enemic de Dynaheir dins l'òpus premier e pòu venir lo gardacòrs d'Aerie.
• Nalia De'Arnese : raubaire/magician umana caotica bòna. Es una aristocrata qu'a besonh d'ajuda per reconquistar son castèu ocupat per de monstres. Sa quista personala es centrada sus lo complòt d'un aristocrata rivau que vòu l'esposar per fòrça per prendre possession de son fèu. Es equipada amb un anèu magic. A l'origina, aqueu personatge deviá remplaçar Imoen dins lo juec e lei dos personatges an de caracteristicas quasi identicas.
• Valygar Corthala : tracaire^[8] uman neutre bòn. Es escondut dins lei Còlas d'Umar car es lo centre de la quista de l'Esfèra apareguda dins lei Bas Quartiers d'Athkatla. Es equipat d'una espasa e d'una armadura magicas poderos e aborrís lei magicians. Dins lo grop, s'opausa a Edwin.
• Viconia De'Vir : prèire elfe negre neutra marrida ja presenta dins Baldur's Gate qu'a la resisténcia magica fòrça importanta caracteristica de son pòble^[5]. Pòu desvolopar una romança amb un protagonista masculin. Dins lo grop, s'opausa a Keldorn.
• Yoshimo : caçaire de prima^[9] uman neutre estricte. Rescòntra lo protagonista dins la preson d'Irenicus mai es en realitat un traite obligat de servir per fòrça (en causa d'un sòrt magic) Irenicus. Lo protagonista es obligat de lo tuar dins lo corrent de la batalha de l'asila de Spellhold. A l'origina, aviá sa pròpria quista personala après leis eveniments de Spellhold que foguèt finalament pas desvolopada (ne'n resta de fichièrs non utilizats).

• Adalon : drac d'argent femèu cargat de susvelhar la pòrta permetent de passar dei Fins Fons Sorns a la superficia dei Reiaumes Oblidats. Tèn lei claus d'aquela pòrta e a un ròtle dins l'istòria durant leis eveniments que se debanan dins lei Fins Fons Sorns. Son sang permet tanben d'acabar l'ingredient permetent d'acabar l'armadura de carn umana.
• Ajantis : paladin present dins Baldur's Gate. Lo protagonista es obligat de lo tuar quand intra dins lei Còlas de Windspear.
• Branwen e Xan : personatges ja presents dins Baldur's Gate que participan a l'entraïnament dau protagonista dins l'ajuda au començament dau juec.
• Coran e Safana : personatges ja presents dins Baldur's Gate. Coran es totjorn amorós de Safana qu'es venguda l'aliada d'un grop de lops garons. Aqueu grop e Safana organizan una emboscada per capturar e liurar lo protagonista a Irenicus. Pasmens, la cap dei lops garons es venguda amorosa de Coran e assassina Safana. Coran pòu subreviure o morir dins la batalha generala entre lei lops garons e lo protagonista e sei companhons.
• Dynaheir : personatge present dins Baldur's Gate ont èra la masca oficialament protegida per Minsc. Fa partida dau grop dau protagonista capturat avans lo començament dau juec. Es torturada e tuada per Irenicus dins l'encastre de seis experiéncias e son cadabre es visible dins sa preson durant la premiera partida de l'intriga.
• Lavok : magician necromancian de l'Ostau Corthala (coma Valygar) qu'es a l'origina de l'aparicion de l'Esfèra dins lei Bas Quartiers d'Athkatla. Es lo centre d'una quista majora dau juec.
• Faldorn : druida malefica presenta dins Baldur's Gate. Es venguda l'arquidruida dau Bòsc deis Ombras e ataca leis umans de la vila de Trademeet. Cernd es cargat d'enquistar sus son accion e aquela quista s'acaba ambé la mòrt de Faldorn.
• Firkraag : dragon roge dei Còlas de Windspear. Es a l'origina de la mòrt d'Ajantis e lo centre d'una quista majora dau juec.
• Garrick : barda present dins Baldur's Gate. Se pòu trobar dins lo Pòrt d'Athkalt,a mai sembla pas de reconéisser lo protagonista.
• Khalid : guerrier e marrit de Jaheira que fa partida dau grop dau protagonista capturat avans lo començament dau juec. Coma Dynaheir, es torturat e tuat per Irenicus dins l'encastre de seis experiéncias e son cadabre sa tròba dins la preson dau magician durant la premiera partida de l'intriga.
• Montaron e Xzar : personatges malefics presents dins Baldur's Gate. Son tuats dins lo corrent d'una quista per lei Joglars.
• Phaere : aristocrata importanta au sen dau clergat deis Elfes Negres d'Ust Natha. A un ròtle primordiau dins leis eveniments que se debanan dins aquela vila.
• Quayle : magician gnome ja present dins Baldur's Gate. Es vengut lo proprietari d'un circ e lo paire adoptiu d'Aerie. Pòu morir o subreviure a la quista dau circ d'Athkalta.
• Solaufein : guerrier elfe negre que supervisa leis accions dau protagonista dins la vila d'Ust Natha. Au contrari de la màger part de sei congenères, es pas d'alinhament marrit.
• Tiax : magician gnome malefic ja present dins Baldur's Gate. Fa partida dei presoniers de l'asila de Spellhold. Accèpta de se revòutar còntra Irenicus e es tuat dins lo corrent de la batalha.

Baldur's Gate II foguèt desvolopat per Bioware e editat per Black Isle Studios. Sa sortida sus Windows aguèt luec en setembre de 2000. Après Baldur's Gate, Baldur's Gate II èra lo segond juec de ròtle important desvolopat per Bioware. Utilizèt tornarmai lo motor Infinity Engine ja utilizat per Baldur's Gate. D'efèct, dins lo corrent dau desvolopament de l'òpus premier, lei còlas de Bioware èran estadas obligadas de desvolopar en parallèl lo motor de juec e lo juec espereu. L'utilizacion dau meme motor de juec permetèt de se concentrar unicament sus la realizacion dau juec e l'accent foguèt donc plaçat sus la creacion d'intrigas melhoras susceptiblas d'interessar lei afogats de Baldur's Gate e tanben de jogaires novèus.

Aqueu desvolopament comencèt en genier de 1999. A partir d'una lista de suggestions de fans e de criticas de l'òpus premier, lo motor dau juec e son accessibilitat conoissèron unei melhoraments coma l'adopcion de resolucions grandas (coma lo 800 x 600 pixels vengut fòrça frequent sus leis ordenadors de la fin deis annadas 1990), lo melhorament de l'aspèct 3D, la possibilitat de dialògs sensa metre lo juec en pausa, lo melhorament dei botons de l'interfàcia, un desvolopament pus important de l'equipament dei personatges, la possibilitat per un personatge d'utilizar doas armas, un melhorament dau jornau e de la carta dau juec, l'inclusion de monstres novèus (coma lei dracs). La màger part d'aqueleis ajusts foguèron aisats.

Regardant lo juec, una lista de consignas foguèt impausada ai divèrsei departaments de Bioware per uniformizar certaneis aspècts dau juec e defugir certaneis errors constatadas dins Baldur's Gate. Per exemple, lei consignas principalas insistèron sus la presa en còmpte deis accions dau jogaire sus lo desvolopament de l'intriga. Ansin, se desvolopèt d'opcions diferentas per lei personatges bòns o marrits. D'autra part, per favorizar l'immersion, d'informacions sus l'intriga e leis accions de l'antagonista foguèron enclusas. Enfin, l'intriga foguèt tanben devesida entre unei capítols permetent d'aumentar l'interès de certanei zònas. Pertocant lo jogaire, la personalizacion dau protagonista, de sei companhons e deis interaccions au sen dau grop foguèron melhoradas permetent una diversitat pus importanta.

Lo procès de creacion dei nivèus foguèt lòng e malaisat. Comencèt ambé la creacion d'una trama generala d'una zòna per de designers. Puei, la zòna foguèt fisada a d'artistas cargats d'apondre de modèls (relèu, bastiment, aubre...) per la decorar. Après, la zòna foguèt tornarmai fisada ai designers per apondre de melhoraments grafics, d'efèctes especiaus, lo còde de deteccion dei collisions, leis creatures, leis objèctes, lei lecas e lei desenclavadors d'eveniments. Aquelei cambis entre còlas artisticas e tecnicas foguèron de còp malaisats. Posquèron entraïnar d'incoeréncias (generalament l'oblida d'una pòrta) que necessitèron una reflexion suplementària per decidir de la necessitat o non d'una correccion. Dins lo corrent dau desvolopament dau juec, BioWare durbiguèt un departament qualitat qu'aguèt un ròtle important per verificar lo foncionament corrèct de cada zòna e dei quistas diferentas.

La musica dau juec foguèt compausada per lo musician alemand Michael Hoenig qu'èra ja l'autor de la musica de l'òpus premier.

La sortida de Baldur's Gate II acomencèt lo 14 de setembre de 2000. Aguèt luec en America dau Nòrd lo 24 de setembre e en Euròpa lo 29. Una ediccion collector foguèt tanben editada. Segon Bioware, de 2000 a 2008, mai de dos milions d'unitats foguèron vendudas.

Una expansion dicha Baldur's Gate II: Throne of Bhaal foguèt desvolopada per Bioware e editada per Black Isle. Sa sortida se debanèt lo 21 de junh de 2001. Apondèt una seguida a l'istòria de Shadows of Amn e quauquei cambiaments au juec coma un donjon especiau dich Tor de Gach, una diversitat pus importanta ais especializacions dei classas de personatge, de nivèus d'experiéncia suplementaris e de sòrts novèus.

Divèrsei resortidas de Shadows of Amn foguèron organizadas. La premiera se debanèt tre 2003 amb una edicion gropada dau juec de basa e de son expansion. En 2004, sortiguèt una compilacion dei juecs de ròtle Bioware que gropava Baldur's Gate, Baldur's Gate II e Icewind Dale. Puei, en 2006, una compilacion novèla sortiguèt e gropèt lei dos òpus de Baldur's Gate ambé seis expansions (Tales of the Sword Coast e Throne of Bhaal). En novembre de 2010, foguèt publicat Baldur's Gate II Complete ambé lo format GOG.com e quauqueis apondons. Enfin, lo 15 de novembre, sortiguèt una version melhorada dau juec originau dicha Baldur's Gate II: Enhanced Edition.

Tre sa sortida, Baldur's Gate II recebèt de criticas fòrça positivas de part de la premsa especializada. Au sen de la premsa anglofòna, Metacritic lo classèt seisen melhor juec de l'istòria en 2012, IGN parlèt d'un juec incomparabla e sensa equivalent e GameSpot lo considerèt coma lo melhor juec de ròtle informatic. Baldur's Gate II (e son expansion) averèron donc unei prèmis decernits per lei jornaus anglofòns pus prestigiós. En França, lo site Jeuxvideos.com li donèt la nòta rara de 19/20.

Entre lei prèmis principaus de la premsa especialada, lo juec averèt :

• per Eurogamer : Melhor Juec 2001, Melhor personatge de supòrt masculin 2001 e Melhora direccion artistica 2001.
• per GameSpot  : Melhor Juec de l'Istòria (en 2006), Juec de ròtle de l'annada 2000 e Melhor Juec de l'Annada segon lei lectors 2000.
• per RPG : Juec de ròtle 2000.

• Baldur's Gate.
• Dungeons & Dragons.
• Reiaumes Oblidats.

• Baldur's Gate II: Shadows of Amn Game Manual, Black Isle Studios (2000), BioWare.

1. ↑ David Hancock, Games and Internet: NEW DRAGON'S HOT STUFF; Shadows Of Amn will keep you fired up from now until Christmas - and then some [1], The Mirror, 6 d'octòbre de 2000.
2. ↑ ^{2,0 2,1} et ^2,2 Matt Cappellini, Blockbusters Make Christmas Bright, The Beacon News, 30 de novembre de 2000.
3. ↑ Baldur's Gate II: Shadows of Amn Game Manual (2000), p. 7 e pp. 10-14.
4. ↑ Baldur's Gate II: Shadows of Amn Game Manual (2000), p. 10.
5. ↑ ^{5,0 5,1 5,2 5,3 5,4} et ^5,5 Lord Craxton, Baldur's Gate II: Shadows of Amn – Retroview, RPGamer, 12 de mai de 2009.
6. ↑ Especializacion de magician.
7. ↑ Especializacion de paladin.
8. ↑ Especializacion de rodaire.
9. ↑ Especializacion de raubaire.