PROFILPELAJAR.COM

Melodi Grand Prix 1998;
Dato
Finale	28. februar 1998
Vertskap
Finale	Studio 2, NRK Marienlyst, Oslo
Programleiarar	Rune Gokstad og Øystein Bache
Kringkastar	Norsk rikskringkasting
Deltakarar
Deltakarar	8
Vinnar
Song	«All I Ever Wanted Was You»
Artist	Lars A. Fredriksen
Resultat i Eurovision Song Contest 1998
Finalepoeng	79
Finaleplass	8.
Noreg i Eurovision Song Contest

Melodi Grand Prix 1998 var den 37. utgåva av Melodi Grand Prix, Noregs nasjonale uttaking til Eurovision Song Contest. Åtte finalistar deltok i finalen 28. februar 1998 som blei arrangert på NRK Marienlyst i Oslo. Vinnarlåten blei «All I Ever Wanted Was You», framført av Lars A. Fredriksen. Låten er komponert av David Eriksen med tekst av Per Kristian Ottestad. Lars A. Fredriksen representerte også Noreg i den internasjonale finalen i Birmingham, der han framførte låten på norsk under tittelen «Alltid sommer». Bidraget enda på 8. plass med 79 poeng.

Sendinga

For fjerde år på rad blei finalen sendt frå NRK Marienlyst, denne gong med Rune Gokstad og Øystein Bache som programleiarar. Øystein Bache leia også finalen i 1989. For første gong opna NRK for at bidraga kunne syngjast på andre språk enn norsk i den norske finalen. To av dei åtte finalistane blei framførte på engelsk, og «All I Ever Wanted Was You» var den første songen som blei framført på engelsk i ein norsk finale. «Winds of the Northern Sea» blei framført på norsk med engelsk refreng. Bakgrunnen for endringa var at NRK ville gjere tevlinga meir attraktiv for nye låtskrivarar.^[1]

Dette året inviterte NRK erfarne komponistar til å levere bidrag. Mellom anna hadde Ingrid Bjørnov skrive melodien «Som en engel», medan Ulf Risnes i Tre små kinesere hadde skrive «Bare du og jeg». G'stén, eller Åge Sten Nilsen, skulle seinare vinne tevlinga i 2005, som frontfigur i Wig Wam. Elisabeth Andreassen var attende i tevlinga og var storfavoritt med «Winds of the Northern Sea». Men tv-sjåarane ville heller ha «All I Ever Wanted Was You», og låten fekk toppoeng frå alle landsdelar. Fagjuryen hadde G'stén som favoritt. Great Garlic Girls underheldt i pausen med parodiar av tidlegare Eurovision-låtar.

Resultat

Nr.	Tittel	Artist	Komponist	Tekstforfattar	Poeng	Plass
A	«All I Ever Wanted Was You»	Lars A. Fredriksen	David Eriksen	Per Kristian Ottestad	56	1
B	«Bare du og jeg»	Christin Hoff og Erik Jacobsen	Ulf Risnes		14	6
C	«Som en engel»	Gjermund Elgenes	Ingrid Bjørnov		5	7
D	«Always Will»	G'stén	Kyrre Fritzner	Kyrre Fritzner og Åge Sten Nilsen	31	3
E	«Winds of the Northern Sea»	Elisabeth Andreassen	Torhild Nigar	Rolf Graf	45	2
F	«På do»	Bjelleklang	Finn Evensen		23	4
G	«Nam nam»	Tore Holm	Geir Olav Bøkestad og Per Kristian Indrehus		4	8
H	«En ny mårran»	Malin Holberg	Stein Berge Svendsen	Nora Skaug og Malin Holberg	18	5

Røysting

Resultatet blei avgjort av telefonrøyster som blei fordelt på fem regionar. Kvar region gav 1, 2, 3, 5, 7 og 10 poeng. I tillegg sat ein ekspertjury i studio som gav 2, 4, 6, 10, 14 og 20 poeng. Fagjuryen bestod av: Ellen Foss-Sørensen, Tor Milde, Finn Bjelke, Olve Brekke, Stein Dag Jensen og Silje Stang. Det kom inn rundt 63 000 telefonrøyster.^[2]

Nr.	Tittel	Trondheim	Tromsø	Bergen	Kristiansand	Oslo	Ekspertjury	Totalt
A	«All I Ever Wanted Was You»	10	10	10	10	10	6	56
B	«Bare du og jeg»						14	14
C	«Som en engel»		1				4	5
D	«Always Will»	2	2	2	2	3	20	31
E	«Winds of the Northern Sea»	7	7	7	7	7	10	45
F	«På do»	3	5	5	5	5		23
G	«Nam nam»	1		1	1	1		4
H	«En ny mårran»	5	3	3	3	2	2	18

Hendingar

Gruppa Tre små kinesere mista ein spelejobb i Bø, fordi vokalist Ulf Risnes hadde levert eit av bidraga til Melodi Grand Prix. Tingingssjef Vidar Skeie ved Kroa i Bø meinte at bandet hadde «mista alt truverd». «Dette kan berre skje i Noreg,» svarte Risnes.^[3]

I sterk konkurranse med nye talentprogram som Stjerner i sikte, prøvde NRK å fornye Melodi Grand Prix. Derfor inviterte kanalen utvalde låtskrivarar og bad dei om ikkje å «ta på seg den vanlege MGP-hatten». Prosjektleiar Jon Ola Sand sa også at han ønskte å gjere tevlinga til den «mest attraktive staden å vise norsk mainstream popmusikk».^[4] Vinnaren fekk også ros, Dagbladet skreiv at «All I Ever Wanted Was You» ikkje var nokon dum låt å sende til Eurovision Song Contest.^[5] Også VG meinte beste melodi vann.^[6]

Før finalen var Elisabeth Andreassen usikker på om hun ville stille i tevlinga. Etter å ha rådført seg med platestudio og rådgivarar, bestemte ho seg for å stille til start.^[7] Dette var fjerde gong ho deltok i ein norsk finale, og første gong ho ikkje vann.

Også dette året blei det rapportert om problem med telefonrøystinga. Fleire tv-sjåarar melde frå om at dei ikkje fekk røysta, men Telenor avviste at dei hadde hatt tekniske problem. Den dåverande kapasiteten var på 6000 samtalar i minuttet, og Telenor rekna med at rundt 440 000 ikkje kom gjennom i telefonrøystinga. Rundt 63 000 røyster blei registrerte, omtrent det same om året før.^[2]^[8] ^[9] Dette var også første gong norske sjåarar kunne telefonrøyste i den internasjonale finalen. 1 271 000 sjåarar såg den norske finalen, 37 000 færre enn året før.^[10]

Fotnotar

↑ «Norsk Grand Prix på engelsk». Dagbladet. 14. februar 1998. s. 33.
↑ ^2,0 ^2,1 NTB Tekst (1. mars 1998). «Tror på suksess i Birmingham». Norsk Telegrambyrå.
↑ Grønneberg, Anders (2. februar 1998). «Kineser-boikott Skrev Grand Prix-låt, vraket av studenter». Dagbladet. s. 55.
↑ Risnes jr., Per A. (26. februar 1998). «Vil unngå Melodi Grand Kitsj». Bergens Tidende. s. 38.
↑ Grønneberg, Anders (1. mars 1998). «Den beste vant». Dagbladet. s. 34.
↑ Bakkemoen, Kurt (1. mars 1998). «Beste melodi vant». Verdens Gang. s. 45.
↑ Fossum og Rønneberg, Tommy og Anders (14. februar 1998). «Bettan vegrer seg». Dagbladet. s. 32.
↑ Bakkemoen, Kurt (2. mars 1998). «6000 i minuttet». Verdens Gang. s. 44.
↑ Grønneberg, Anders (5. mars 1998). «Den riktige vinneren vant …». Dagbladet. s. 41.
↑ Pettersen, Jørn (3. mars 1998). «Suveren GP-finale». Verdens Gang.