Kunsthøgskolen i Oslo
Den gamle Seglduksfabrikken er no ein del av KHiO.
Org.form	Organisasjonsledd
Org.nummer	977027233
Grunnlagd	1996
Kommune	Oslo kommune
Nettstad	http://www.khio.no/
Kunsthøgskolen i Oslo 59°55′32″N 10°45′16″E / 59.9255°N 10.75438889°E / 59.9255; 10.75438889

Kunsthøgskolen i Oslo, forkorta KHiO, er den største kunsthøgskulen i Noreg med om lag 500 studentar og 200 tilsette. Skulen tilbyr treårig bachelorstudium, toårig masterstudium og årsstudium. Ein kan få undervisning i emna biletkunst, kunst og handverk (tidlegare kalla kunstfag), design, teater, dans, opera og scenografi. Rektor er Cecilie Broch Knudsen.

Kunsthøgskolen i Oslo er ein av dei to sjølvstendige nasjonale institusjonane som tilbyd høgare utdanning innan visuell kunst og design. Den andre er Kunsthøgskolen i Bergen. Kunsthøgskolen i Oslo tilbyr også høgare utdanning innan scenekunst.

KHiO vart samla ved opninga av siste byggetrinn på den gamle Seglduksfabrikken på Grünerløkka, ved semesterstart 30. august 2010.

• Fakultet for visuell kunst (Kunstakademiet og kunstfag)
• Fakultet for design (visuell kommunikasjon, interiørarkitektur og møbeldesign, klede- og kostymedesign) dekan: Stein Rokseth
• Fakultet for scenekunst (teater, opera, dans og scenografi), dekan: Einar Solbu

Kunsthøgskolen i Oslo vart skipa 1. august 1996 gjennom samanslåinga av fem sjølvstendige høgskular:

• Statens håndverks- og kunstindustriskole (skipa 1818)
• Statens kunstakademi (skipa 1909)
• Statens teaterhøgskole (skipa 1952)
• Statens operahøgskole (skipa 1964)
• Statens balletthøgskole (skipa 1979)

I 2003 vart dei tre scenekunstavdelingane samla i eitt fakultet, Fakultet for scenekunst. Same året vart avdelinga Statens håndverks- og kunstindustriskole (SHKS) delt i to avdelingar, Avdeling Design og Avdeling Kunstfag. I 2005 vart Statens kunstakademi og SHKS samanslegne til Fakultet for visuell kunst, og avdeling for design blei til Fakultet for design.

Stortinget fatta vedtak om full samlokalisering. I 2003 flytta scenekunstutdanningane dans, teater, opera og scenografi inn i nye lokale på Grünerløkka. Resten av utdanningane innan visuell kunst og design flytta inn i andre byggetrinn 30. august 2010 på same campus ved tidlegare Christiania Seildugsfabrik ved Akerselva, der Galleri Seilduken også er oppretta. Arkitekten bak byggetrinn 1 er Samark AS, medan Lund Hagem Arkitekter AS og Søyland Arkitekter AS står bak byggetrinn 2. Det totale arealet er på 40 000 kvadratmeter brutto.

Peter Butenschøn var rektor ved Kunsthøgskolen fram til 1. august 2007, då tidlegare rektor ved Einar Granums kunstfagskole, Cecilie Broch Knudsen overtok som rektor.

• Offisiell nettstad
• Statens Kunstakademi Arkivert 2007-10-10 ved Wayback Machine.
• Inspisientane på KHiO Arkivert 2012-12-16 ved Wayback Machine.