სოფელი
ერედვი
ნანგრევებად ქცეული ერედვი თანამგზავრულ ფოტოზე (NASA, 2010)
ქვეყანა	საქართველო
სპეციალური ერთეული	სამხრეთ ოსეთის დროებითი ადმინისტრაციულ-ტერიტორიული ერთეულისამხრეთ ოსეთის ადმინისტრაცია
მუნიციპალიტეტი	ერედვის მუნიციპალიტეტი
თემი	ერედვი
კოორდინატები	42°14′46″ ჩ. გ. 44°02′20″ ა. გ. / 42.24611° ჩ. გ. 44.03889° ა. გ. / 42.24611; 44.03889
საქართველო სამხრეთ ოსეთის ადმინისტრაცია ერედვის მუნიციპალიტეტი

ერედვი — სოფელი საქართველოში ერედვის მუნიციპალიტეტის ადმინისტრაციული ცენტრი. 2008 წლიდან ოკუპირებულია რუსეთის ფედერაციის მიერ.

ერედვი მდებარეობს მდ. პატარა ლიახვის მარჯვენა მხარეს, ზღვის დონიდან 1010 მ-ზე, ქალაქ ცხინვალის აღმოსავლეთით, 5 კმ-ში.

ერედვი წერილობით წყაროებში ცნობილია XIV საუკუნიდან. ის იხსენიება XIV-XVIII საუკუნეების ისტორიულ საბუთებში, ვახუშტი ბაგრატიონის, იოანე ბაგრატიონის და იოჰან გიულდენშტედტის თხზულებებში. ვახუშტის მიხედვით: „ქრცხილოვანის აღმოსავლით, პატარა ლიახვისკენ, არს ერედვის ციხე და ეკლესია მას შინა წმიდის გიორგისა სასწაულიანი“.

XIV-XVIII საუკუნეებში ერედვი მცხეთის საკათოლიკოსო მამულების სიაშია. აქ მამულები ჰქონდათ თავად ფავლენიშვილებსაც. ქართლის აჯანყების (1742-1745) დროს ერედვის ციხიდან ებრძოდა თეიმურაზ II გივი ამილახვარს. 1801-1922 წლებში შედიოდა გორის მაზრაში. 1918 წლის მარტში სოფელში მოხდა შეტაკება ბოლშევიკების მეთაურობით ამბოხებულ ოსებთან.

1922 წელს, სოფლის მოსახლეობის პროტესტის მიუხედავად, ერედვი სამხრეთ ოსეთის ავტონომიურ ოლქს შეუერთეს.^[1] 1989 წლისთვის ის ცხინვალის რაიონის ბერულის სოფსაბჭოში შედიოდა. სამხრეთ ოსეთის ავტონომიური ოლქის გაუქმების (1990) შემდეგ სოფელი შედიოდა გორის რაიონში, 2006 წლიდან კი ერედვის მუნიციპალიტეტი ცალკე გამოიყო დროებითი ადმინისტრაციულ-ტერიტორიული ერთეულის სახით.

1990-იანი წლების ქართულ-ოსურმა კონფლიქტმა ერედვი მნიშვნელოვნად დააზარალა. 1991-1992 წლებში და, მოგვიანებით, 2004 წლის ივლის-აგვისტოში სოფელსა და მის შემოგარენში მოხდა არაერთი შეიარაღებული ინციდენტი, რასაც თან სდევდა მსხვერპლი და ნგრევა. 1990-იან წლებში სოფლის მოსახლეობის ოსური ნაწილი იძულებული გახდა ერედვი დაეტოვებინა. მომდევნო წლებში ერედვი წარმოადგენდა საქართველოს ცენტრალური ხელისუფლების მთავარ დასაყრდენს პატარა ლიახვის ხეობაში. სოფელში (ნიქოზთან და აჩაბეთთან ერთად) განთავსებული იყო ქართული სამშვიდობო ბატალიონის ერთ-ერთი პოსტი.

რუსეთ-საქართველოს 2008 წლის ომის პერიოდში, 2008 წლის 1 აგვისტოდან ერედვი კვლავ გახდა ცხინვალიდან თავდასხმების სამიზნე. 8 აგვისტოდან რუსეთის ჯარებმა სოფელზე ინტენსიური საჰაერო და სახმელეთო იერიში მიიტანეს, 11 აგვისტოს კი მოახდინეს მისი ოკუპაცია. ერედვი მთლიანად დატოვა ადგილობრივმა მოსახლეობამ. ომის აქტიური ფაზის მომდევნო პერიოდში, რუსეთის ოკუპაციის პირობებში, ერედვი მთლიანად გაძარცვეს და გადაწვეს ოსმა სეპარატისტებმა, ნასოფლარს კი ოსური სახელი ერედი (ოს. Еред) უწოდეს.

ერედვი არქეოლოგიურად შეუსწავლელია. სოფლის ცენტრში დგას ბურჯებით გამაგრებული კოშკებიანი ციხე, რომლის გალავნის შიგნით ორი ეკლესიაა: წმინდა გიორგის სამეკლესიანი ბაზილიკა (წარწერით დათარიღებული 906 წლით) და ახლოსვე პატარა დარბაზული ეკლესია. ერედვსა და ბერულას შორის, გორაკზე, დგას ძლიერ დაზიანებული სამეკლესიანი ბაზილიკა, რომელიც ცნობილია „ბერის საყდრის“ სახელით. თარიღდება X ს-ით. სოფლის განაპირას, „ბერის საყრის“ მახლობლად დგას წმინდა ელიას დარბაზული ეკლესია. თარიღდება XIV ს-ით.

წელი	მოსახლეობა	კაცი	ქალი	ეთნოსი
1989[2]	1 103	527	576	ქართველები (75 %) ოსები (24 %)
2002[3]	918	470	448	ქართველები (96 %)
2015[4][ა]	0	—	—	—

• ქართული საბჭოთა ენციკლოპედია, ტ. 4, თბ., 1979. — გვ. 177.

• გვასალია ჯ., მეფისაშვილი რ., ცინცაძე ვ., ენციკლოპედია „საქართველო“, ტ. 3, თბ., 2014. — გვ. ?.

• ქართლის ცხოვრების ტოპოარქეოლოგიური ლექსიკონი, გვ. 203, თბ., 2013 წელი.

ხ • გ • რ ერედვის მუნიციპალიტეტის დასახლებული პუნქტები სოფლები ალბირი ანდორეთი არგვიცი არდისი არკინარეთი არცევი აშატური აძვისთავი აწრისხევი ახალისა ახსარგინა ბელოთი ბენდერი ბერიჯვარი ბერულა ბიეთი ბისოითა გაბილაანი გერი გოიათა გუდისი გუჩმასთა დელაგინი დვალიანთკარი დიდი ღრომი დიდხევი დისევი დმენისი ელტურა ერედვი ვალითა ვანათი ზემო ბიყარი ზემო გორეთი ზემო ვილდა ზემო ზონკარი ზემო კორკულა ზემო მახისი ზემო ოტრევი ზემო სარაბუკი ზემო სნეკვი ზემო ფრისი ზემო ქერე ზემო ქლივანა თელაგინა თლიაყანა ივრეთი იკორთა ინაური ისროლისხევი კლარსი კოხათი კულბითი ლაცაური მალძიგათა მამისაანთუბანი მარალეთი მარმაზეთი მიფარეთი ნანიაური ნიში ნოგყაუ ორტევი პანტნაური პატარა ღრომი საბოლოკე სათიხარი საკვირეთი საცხენეთი სიათა სოწი ფრისი ქარჩითი ქვემო გორეთი ქვემო ვილდა ქვემო ზონკარი ქვემო კორკულა ქვემო მახისი ქვემო ოტრევი ქვემო სარაბუკი ქვემო ქლივანა ქნოღო ქსუისი ღვრია ღორტევი შამბიეთი შელეური შუა მახისი შუაცხვირი შულაური ჩსიათა ჩხარაული ძიყი წიარა წიფორი წყალწმინდა ჭალისუბანი ჭარები ხადურიანთკარი ხელჩუა ხოშური ხუგასთა ხურითა ჯვარეთი ჯოჯიანი ნასოფლარები გნასური დისიგინი საკანაფო ფარაზი ხაჩირანთკარი