Portugal[1] es un stato de Europa sud-occidental que se extende sur le litoral atlantic del Peninsula Iberic, con bordos al nord e al est con Espania. Portugal es le pais le plus al west in Europa continental. Portugal es nominate pro su citate le secunde plus grande, Porto, cuje nomine latin esseva Portus Cale.
Portugal como es hodie esseva create in 1143 per su prime rege Afonso Henriques; ille creava le throno in 1139 e esseva recognoscite per Espania in 1143. Su confinios esseva mantenite practicamente inalterate desde le seculo 13 usque al die presente, essente un del statos independente le plus antique de Europa. Portugal esseva semper ligate al mar. Tosto le pisca e le commercio de ultramar esseva activitates economic importante. Le interesse de Henrique le Navigator in le exploration, gratias a alcun progressos technologic in le navigation, portava al expansion del territorio portugese e a grande developpamento in su cognoscentia geographic.
Post su apogeo como potentia mundial durante le seculos 15 e 16, Portugal perdeva multe de su ricchessas e stato con le destruction de Lisbona durante le seismo de 1755, le occupation durante le Guerras Napoleonic, e le perdita de su colonia le plus importante, le Brasil, in 1822. Un revolution in 1910 deponeva le monarchia portugese, e comenciava un periodo de republicanismo chaotic (le prime republica); in 1926 un colpo de stato militar nationalista dava initio a un periodo de plus de cinque decennios de governamentos fascista repressive.
In le annos que sequeva le colpo de 1974, Portugal abandonava rapidemente le institutiones non democratic usque stabilir se finalmente como un democratia constitutional. Le quatro organos de soveranitate es le Presidente del Republica, le Governamento , le Assemblea del Republica (le Parlamento) e le Judicatura.
Le presidente del republica, electe a un termino de cinque annos per suffragio directe universal, tamben es commandante in chef del fortias armate. Le poteres presidential include designar le Prime Ministro e le Consilio del Ministros, in le quales le presidente debe esser dirigite per le resultato del election del assemblea. Le Consilio del Stato, un organismo consultative presidential, componite per sex officiales civil major, le ex-presidentes anterior, electe desde 1976, cinque membros electe per le assemblea e cinque selectionate per le presidente.
Le governamento es dirigite per le Prime Ministro, qui nomina le Consilio de Ministros. Un nove governamento se require pro definir le schema general de su politica in un programma e pro presentar lo al assemblea pro un periodo obligatori de discussion. Le manco del assemblea in repeller le programma per un majoritate de deputatos confirma le governamento in carga.
Le Assemblea del Republica es un corpore unicameral constituite per 230 deputatos. Electe per suffragio universal secundo un systema de representation proportional, le deputatos servi per 4 annos, a minus que le presidente del republica dissolve le assemblea e convoca nove electiones.
Le Tribunal Supreme National es le corte de appello. Le cortes militar, administrative e fiscal se signala como categorias separate del corte. Un Tribunal Constitutional de 9 membros repassa le constitutionalitate del legislation.
Portugal continental es dividite in duo per su fluvio principal, le Tago. Al nord le paisage es montaniose. Le puncto le plus alte de Portugal es le Monte Pico in le Azores con 2.351 m. Le sud in Algarve offere super toto le extense planas e le climate hic es plus calide e sic que in le nord, plus fresc e plus pluviose. Altere fluvios importante include le Douro, le Minho e le Guadiana.
Portugal se converteva in un economia diversificate e de plus in plus basate in servicios desde su ingresso in le Union Europee. In le ultime decennio, le governamentos privatisava multe interprisas statal e liberalisava le areas dominante del economia, includente le sectores financiari e del telecommunicationes. Le pais se qualificava pro le Union Monetari Europee (EMU) in 1998 e comenciava circular su nove moneta, le euro, le 1 de januario2002, insimul con altere 11 economias membros del UE.
Le developpamento economic ha essite supra le media del UE durante un bon parte del ultime decennio, sed le PIB (Producto Interne Brute) per capite es de solmente 75% de illo del economias principal del UE. Le governamento non poteva controlar su deficit crescente e avantiar le reformas structural necessari pro altiar le competition economic de Portugal. Un systema educative debile, particularmente, esseva un obstaculo pro un major productivitate e crescimento. Portugal esseva substituite de plus in plus per le productores de basse costo in Europa Central e Asia como destino pro le inversion directe estranier.
.svg)
.svg){kind=small}
