San Xoán de Botos é unha parroquia do concello de Lalín. En 2018 tiña 524 habitantes (296 homes e 296 mulleres), 132 menos ca en 1999. Ten 15 entidades de poboación.
Botos conserva dous pequenos castros, a cada lado do río Deza. O castro de Sestelo está composto por un recinto circular cun amplo sistema de defensas exteriores no sector setentrional. A coroa ten unha lonxitude de 75 m no interior e 110 m no exterior, no eixo norte-sur. Sese teñen en conta tamén as defensas externas, a lonxitude total do castro neste eixo é de 250 m. No eixo leste-oeste, a lonxitude no interior da coroa é de 55 m e no exterior 90 m. O recinto principal está rodeado por un terraplén cunha altura de 6 m a 7 m no sector oeste da coroa. Cara ao leste e sur, o terraplén ten continuidade coa caída natural do terreo. Presenta parapeto nos sectores suroeste, oeste e norte que acada unha altura máxima de 3 m no sector noroeste. No interior da coroa hai unha zona máis elevada no sector meridional con caída duns 5 m cara ao nordés. Nesta zona remata o parapeto e está o acceso a través dunha rampla en curva.[2]
Na igrexa parroquial consérvanse a portada modificada e a pía bautismal do románico. Ten dous retablos nos laterais do século XVIII e unha imaxe da Virxe, que aparece co Neno Xesús nos brazos.
Preto da igrexa parroquial hai un cruceiro destacable.
