Théodore Rousseau
Irudi gehiago
Bizitza
Jaiotzako izen-deiturak	Étienne Pierre Théodore Rousseau
Jaiotza	Paris, 1812ko apirilaren 15a
Herrialdea	Frantzia
Heriotza	Barbizon, 1867ko abenduaren 22a (55 urte)
Hobiratze lekua	Sena eta Marne
Heriotza modua	berezko heriotza: miokardio infartu akutua
Hezkuntza
Hizkuntzak	frantsesa
Irakaslea(k)	Jean-Charles-Joseph Rémond
Ikaslea(k)	ikusi Célestin Leroux (en)
Jarduerak
Jarduerak	margolaria, argazkilaria, artista bisuala, artista grafikoa eta marrazkilaria
Lan nabarmenak	ikusi Les Chênes d'Apremont (en) Le Printemps (en) La Gorge aux Loups (en)
Jasotako sariak	ikusi Ohorezko Legioko zalduna Ohorezko Legioko ofiziala
Influentziak	John Constable, Richard Parkes Bonington eta Caspar David Friedrich
Kidetza	Barbizongo eskola
Mugimendua	Barbizongo eskola
Izengoitia(k)	Rousseau, Theodore

Pierre Étienne Théodore Rousseau (Paris, 1812ko apirilaren 15a - Barbizon, 1867ko abenduaren 22a) Barbizongo eskolako frantziar margolaria izan zen. Gehienbat paisaiak margotzen zituen, izadiaren tratamenduan XVII. mendeko holandar artisten lanak oinarritzat harturik.

Parisen jaio zen, familia burges batean. Merkataritzan prestakuntza jaso zuen arren, laster margolaritzarako gaitasuna zuela erakutsi zuen. Hasieran, aitak joera hori deitoratu zuen baina, ondoren, Théodorek negozioak alde batera uztea onartu eta bizi guztian babestu zuen (aita semea baino gehiago bizi izan zen). 1830eko hamarkadako gainerako margolari erromantiko guztiek bezala, oztopo handiak izan zituen bere obrak Parisko Aretoan onartuak izan zitezen. Izan ere, itzal handia zuten heziketa klasikoko artistak erabat aurka zituzten^[1].

1831 eta 1834an margolanen bat erakutsi zuen Aretoan, baina 1836an, artista klasikoen botoengatik, La Déscente des vaches lan handia baztertua izan zen. Geroztik, 1848ko iraultza arte, beti errefusatua izan zen. Erbestealdi artistiko horretan bere lanik hoberenetako batzuk sortu zituen. 1851ko Parisko Aretoan Lisière de forêt (Baso bazterra) erakutsi zuen^[1].

1848 arte noizbehinka baino ez zen Barbizonen bizi izan. Urte horretan, ordea, Fontainebleauko basoaren ondoko herri horretara aldatu zen, eta han igaro zituen hil arteko egun gehienak. Parisko 1855eko Erakusketa Unibertsalean aurreko 20 urteetan errefusatuak izan ziren Rousseauren margolanak aurkeztu ziren. Hala ere, ez zuen inoiz arrakasta handia izan Frantzian, eta, 1861an bere obren enkante batek porrot egin ostean, Amsterdam, Londres edo New Yorkera alde egitekotan egon zen^[1].

Baina, orduan, zoritxarrak gaineratu zitzaizkion: emaztearen buruko eritasun larria, bezero urritasuna, lagun baten buru-hiltzea Barbizongo etxean...1863an Alpeetara, Mont Blanc mendiaren zirriborroak egitera, egon zelarik, biriketako gaitz bat erantsi zitzaion. Handik aurrera osasuna ahulduz joan zitzaion. 1867ko abenduaren 22an hil zen, Barbizonen, Jean-François Millet lagun mina ondoan zuela^[1].

Irudi bat handitzeko, klika ezazu gainean.

• 
  L'allée des châtaigniers, 1837-1840, 79 × 144 cm, Louvre museoa (Paris)
• 
  Un marais dans les Landes, 1844 ondoan, 41,7 x 56,7 cm, Walters Art Museum (Baltimore)
• 
  Marché en Normandie, 1845-1848, 29,5 x 38 cm, Hermitage museoa (San Petersburgo)
• 
  Vue de la plaine de Montmartre, 1848 aldean, 59.5 × 72 cm, Thyssen-Bornemisza museoa (Madrid)
• 
  La cabane du charbon de bois dans la forêt de Fontainebleau, 1855 aldean, 34.2 × 42.1 cm, Thyssen-Bornemisza museoa (Madrid)

Wikimedia Commonsen badira fitxategi gehiago, gai hau dutenak: Théodore Rousseau

• (Ingelesez) Théodore Rousseau Artcyclopedia.com