Ametzagainako parkea
Martxoan aranondoak loretan
Kokapena
Herrialdea	Euskal Herria
Probintzia	Gipuzkoa
Udalerria	Donostia
Koordenatuak	43°18′32″N 1°57′12″W / 43.30881°N 1.95345°W / 43.30881; -1.95345

Ametzagainako parkea Donostiako parke bat da, Intxaurrondo, Loiola eta Martutene auzoetan, izena ematen dion Ametzagaina muinoan. Otxoki parkea eta Garbera merkatal-gunea alboan dauzka. Hiri barruko parkerik zabalena da Donostian, denera 380.000 metro karratu ditu.^[1][2][3]

Donostiako historian oso garrantzitsuak diren bi elementu daude parke barruan: Donostiako giza-aztarnategi zaharrena (historiaurrekoa, orain dela 25.000 urtekoa) eta XIX. mendeko gerra karlistetan erabili zen gotorleku bat.

Hosto zabaleko baso aberatsa eta zelai zabalak ditu parkeak. Izenean jasota dagoen bezala, haritzaren generokoak diren ametzak dira zuhaitz aipagarrienak; ametzez osatutako hainbat multzo ikusgarri zeharkatzen dituzte parkeko bideek. 2010eko hamarraldiko hasieran Donostiako udalak muino osoa berrantolatu zuen, ordura arte zeuden kontrolik gabeko ortu eta zabortegiak kendu eta parkerako sarbide berriak, pasealekuak eta jolaslekuak prestatu zituen, 3 milioi euroko aurrekontuarekin.

Parkea inauguratu eta gero, hasieran mantentze-lanak ez ziren modu egokian egin. 2013an konpondu egin zen egoera hura parkea ondo garbitzeko eta txukuntzeko hainbat kexa plazaratu ondoren.^[4]

Donostia inguruan baziren giza finkapenak orain dela 25.000 urtetik gutxienez, harria lantzen zuen garai horretako industria litikoaren arrastoak aurkitu izan baitira Ametzagaineko goiko aldean. Lehen arrastoak Aranzadi elkarteko Paco Barriok aurkitu zituen, ezustean, 2005ean. Geroago ikerketa sakonagoak egin dituztenean harriz egindako industria litikoari dagozkion hainbat pieza berreskuratu dituzte.^[5]

Aranzadi Zientzia Elkarteak aspaldi zituen usteak baieztatu zituen: ehiztari biltzaileek Ametzagainako muinoa hartu ohi zuten aldi baterako bizilekutzat. 2014an Journal of Anthropological Research aldizkarian argitaratu zuten aurkikuntza guztiak artikulu zabal batean.^[6]

Garai hartan harria antzera lantzen zuten beste herri eta kulturekin komunikatuta egon behar ziren. 100 kilometroko erradioan daude beste aztarnategi hauek: Le Basté, Tercis. Pujo-le Plan, Brasempouy, Isturitze, Gatzarria, Lezia, Alkerdi, Amalda, Irikaitz, Ekain, Aldatxarren, Aritoliñako koba, Bolinkoba, Prado, Pelbarte, Coscobilo, eta Mugarduia Sur.^[6]

• 
  Martxoko loraldi arrosa
• 
  Ametza urtarrilean
• 
  Parkea biluzik urtarrilean
• 
  Ametzagaina eta Aiako Harriak Amaratik
• 
  Amara auzoa eta Donostiako zentroa Ametzagainatik
• 
  Parkeko jolastokietako bat

Parkeko bigarren elementu historikoa Karlistaldietako Ametzagainako gotorlekuaren aztarnak dira (XIX. mendekoak).^[7][8]

Gerra karlista bakoitzean gotorleku bat antolatu zen Ametzagaineko gailurtxoan (123 m). Beraz, hasierako gotorlekua, lehen gotorlekua, 1833 eta 1840 urteen artean eraiki eta erabili zen, Lehen Gerra Karlistan. Orduan oinplano angeluzuzena zuen, bi kanoirekin armatuta eta babes-erreten batez inguratua, eta toki batzuetan sei metroko lodiera zuen parapetoarekin.

Bigarren gotorlekua aurrekoaren gainean eraiki zuten, azkeneko Gerra Karlistan (1873-1877) eta haren hondakinak dira gaur egunean bisitatu daitezkeenak. Barruan gurutze formako oinplano eta hiru solairu zituen kaserna, bolborategia, eta sukaldeak zituen. 130 soldadu bizi zitezkeen han; sei kanoi-zulo, kanoi birakari baten plataforma bat, eta fusilekin tiro egiteko saietera asko zituen. Ordurako Donostiak bere harresiak kenduta zituen eta Donostia liberala defendatu zuten tropek behin-behineko gotorlekuak eraiki zituzten hiru lerrotan, hiriaren inguruan presaka eraikiak ere. Hauek ziren lehenengo lerroko gotorlekuak: Hernandez, Farola, Lugaritz, Puio, Ametzagaina, Altza, Miracruz y Almirante (Platako itsasargitik gertukoa). Tropa karlistei aurre egiteko erabili zen, kanoien bidez karlisten eskuetan hurbil zeuden San Marko gotorlekua (3,5 km ekialdera) eta Santiagomendikoa (4 km hegoaldera) erasotzeko; baita, badaezpada ere, Ametzagainako magalean abandonatuta zegoen Uba komentua karlistek ez hartzeko ere.

Gerra bukatu ostean soldadu talde txiki bat han babestu zuen, 1891ko udara arte. Horren ostean gotorlekua bertan behera geratu zen.

• 
  Iparraldeko sarrera
• 
  Barruko patioa
• 
  Iratze handia
• 
  Hegoaldeko sarrera
• 
  Gotorlekuaren iparraldeko harresia.
• 
  Hegoaldeko muturra

• Ubako baseliza (Donostia)
• Garbera
• Loiola auzoa
• Martutene
• San Markos gotorlekua
• Otxokiko Parkea

• (Gaztelaniaz) Aranzadi Zientzia Elkartea. Los primeros habitantes de Donostiamultimedia-ibilbidea. Ondarebideak (2016-11-24)
• Uba aterpetxea. Green Nest Hostel San Sebastián.
• Ametzagaina parkea. Neguan argazki bilduma Flickr-en (113 argazki libre).
• EL BOSQUE HABITADO. El bosque de Ametzagaña. Mr Argoma-ren bideoa Ametzagaina basoko animaliekin: urtxintxa, amilotx mottoduna, kardantxiloa, eskinosoa, eta zozo leizismoduna (zuribeltza). Txikoria-belarra ere bai

	Donostiako parkeak
Aieteko parkea • Alderdi Eder • Ametzagainako parkea • Arabako parkea • Arbizketa parkea • Arkazieta parkea • Basoerdi parkea Bidebietako parkea • Boulevardeko parkea • Castelao parkea • Erregina Erregenetearen parkea • Errotaburuko parkea • Etzieta parkea Eustasio Amilibia parkea • Frantziako pasealekua • Kristina Eneako parkea • Gipuzkoa plazako parkea • Harriako parkea • Koldo Mitxelena parkea • Larratxoko parkea • Luis Villasante parkea • Melodi parkea • Miramar Jauregiaren parkea • Miramoneko parkea Okendo plazako parkea • Ondarretako lorategiak • Orio parkea • Oroitzapenaren lorategia • Otxokiko parkea • Pagola-Damazelai parkea • Puioko parkea • Salvador Allende parkea • Santa Katalinako parkea • Serafin Baroja parkea • Siustegi parkea • Uliako Mintegietako parkea • Uliako parkea Urgullgo parkea • Zaragoza plazako parkea • Zilegi parkea • Zubimusuko parkea